Landsbankamót Tindastóls um næstu helgi

Landsbankamót Tindastóls fer fram helgina 24.-25. júní á Sauðárkróki og stefnir allt í að mótið verði það fjölmennasta fram að þessu. Mótið er fyrir stelpur í 6. flokki og hefur stækkað ört undanfarið en í ár eru skráð rúmlega 100 lið til leiks frá um 20 félögum. Liðin mæta á föstudagskvöld en mótið sjálft hefst á laugardagsmorgun. Kvöldvaka er haldin á laugardagskvöld þar sem Salka Sól mætir og skemmtir stelpunum. Mótinu lýkur síðan á sunnudeginum með úrslitaleikjum og verðlaunaafhendingu.