Tag Archives: sauðárkrókur

Eldur kom upp í Steinullarverksmiðjunni á Sauðárkróki

Slökkviliðið í Skagafirði var boðað út rétt fyrir kl. 23.00 í gærkvöldi vegna elds í Steinullarverksmiðjunni á Sauðárkróki.
Um var að ræða eld í útblástursröri, sem liggur frá verksmiðjunni. Eldurinn náði að læsa sig í lauslegt dót sem var fyrir neðan rörið.
Útbreiðsluhætta var lítil og greiðlega gekk að slökkva eldinn. Eignartjón er minniháttar.

Takmörkun á skólastarfi hjá FNV

Samkvæmt 5. grein reglugerðar 958/2020 er skólastarf heimilt í öllum byggingum framhaldsskóla að því tilskildu að nemendur og starfsfólk geti haft minnst 1metra fjarlægð sín á milli og hámarksfjöldi nemenda í hverri kennslustofu fari ekki yfir 30. Blöndum nemenda á milli hópa er ekki heimil.

Þetta þýðir fyrir FNV að allt almennt bóklegt nám færist í Teams. Kennsla í skóla verður áfram á eftirfarandi námsbrautum/námsgreinum: Verklegt- og fagbóklegt nám á iðnbrautum og hestabraut, starfsbraut, kvikmyndagerð, nám fyrir grunnskólanema og helgarnám í húsasmíði, rafvirkjun og sjúkraliðanámi.

Nemendur í dreifnámi mæta í dreifnámsstofur á Blönduósi, Hvammstanga og Hólmavík. Kennarar og nemendur sem mæta í skólann skulu nota grímur.

Íþróttir: Nemendur í bóknámi, sem stunda nám eingöngu í gegnum Teams, sækja verklega íþróttatíma samkvæmt stundaskrá. Nemendur í staðnámi sækja ekki verklega íþróttatíma. Kennarar nemenda í Þreksportstímum og Jóga munu hafa samband við sína nemendur um útfærslu.

Heimavistin verður opin en gestir ekki leyfðir.

Hádegismatur verður fyrir nemendur í mötuneyti klukkan 12:30 – 13:00.

Hægt er að panta viðtalstíma hjá námsráðgjafa og félagsráðgjafa í síma 455-8000 eða á eftirtöldum netföngum: margret@fnv.is og adalbjorg@fnv.is.

Bókasafnið verður lokað, en hægt er að fá aðstoð með því að senda póst á netfangið gretar@fnv.is.

Reglugerð 958/2020 er hér: https://www.stjornartidindi.is/Advert.aspx?RecordID=d7c191c0-7f9b-466c-8354-ab06a6b959b6

Yfirlitsmynd af húsnæði skólans

Rafmagnsleysi í Skagafirði aðfararnótt 19. júní

Vegna vinnu í aðveitustöð í Varmahlíð verða rafmagnstruflanir og rafmagnsleysi í Skagafirði aðfararnótt föstudagsins 19. júní.
Rafmagnslaust verður í sveitum frá miðnætti til kl. 04:00 um nóttina.

Rafmagnstruflanir verða í Fljótum, Sléttuhlíð, Hofsós, Unadal og Deildardal kl. 23 að kvöldi fimmtudagsins og aftur að vinnu lokinni um kl. 04:00 aðfararnótt föstudags.

Keyrt verður varaafl á Sauðárkrók, Reykjaströnd og á austanverðum Skaga en búast má við truflunum og mögulegu rafmagnsleysi.  Íbúar eru kvattir til að stilla rafmagnsnotkun í hóf þessa nótt.

RARIK Norðurlandi.

Auglýsing um skipan í kjördeildir við forsetakosningar 27. júní 2020

Skipan í kjördeildir í Sveitarfélaginu Skagafirði við forsetakosningar sem fram fara  laugardaginn 27. júní n.k. er sem hér segir:

Kjördeild í Félagsheimilinu Skagaseli,

þar kjósa íbúar fyrrum Skefilstaðahrepps – kjörfundur hefst kl. 12:00

Kjördeild í Bóknámshúsi FNV,

þar kjósa íbúar Sauðárkróks og fyrrum Skarðs- og Rípurhrepps

– kjörfundur hefst kl. 09:00

Kjördeild í Félagsheimilinu Árgarði, 

þar kjósa íbúar fyrrum Lýtingsstaðahrepps – kjörfundur hefst kl. 12:00

Kjördeild í Grunnskólanum að Hólum,

þar kjósa íbúar fyrrum Hóla- og Viðvíkurhrepps – kjörfundur hefst kl. 12:00

Kjördeild í Höfðaborg Hofsósi,

þar kjósa íbúar fyrrum Hofshrepps – kjörfundur hefst kl. 10:00

Kjördeild í Grunnskólanum á Sólgörðum,

þar kjósa íbúar fyrrum Fljótahrepps – kjörfundur hefst kl 12:00

Kjördeild í Varmahlíðarskóla,

þar kjósa íbúar fyrrum Staðar – og Seyluhrepps  – kjörfundur hefst kl. 10:00

Kjördeild í Heilbrigðisstofnuninni á Sauðárkróki,

kjörfundur hefst kl. 13:00

 

Kjörfundi má slíta 8 klst. eftir að kjörfundur hefst, enda sé þá hálf klukkustund liðin frá því að kjósandi gaf sig síðast fram, og hvenær sem er ef allir sem á kjörskrá standa hafa greitt atkvæði.

Kjörfundi má einnig slíta fimm klukkustundum eftir opnun ef öll kjörstjórnin er sammála um það, enda sé þá hálf klukkustund liðin frá því að kjósandi gaf sig síðast fram.

Kjörfundi skal slitið eigi síðar en kl. 22:00

Unnt er að kjósa utan kjörfundar hjá sýslumanni Norðurlands vestra á Sauðárkróki frá kl. 09:00 til kl. 15:00 virka daga fram að kjördegi og kl. 16:00-18:00 á kjördag þ. 27. júní  2020.  Lokað verður 17. júní.

Yfirkjörstjórn verður með aðstöðu í Bóknámshúsi FNV.

Sjómannadagurinn í Skagafirði

Um helgina fagna sjómenn og aðrir landsmenn sjómannadeginum með hefðbundnum hætti.  Hátíðahöld verða á Sauðárkróki á laugardeginum og á Hofsósi á sunnudeginum.

Laugardagurinn 1. júní hefst með skemmtisiglingu með Drangey SK 2 kl. 11:00 og boðið upp á fiskisúpu og pylsur að henni lokinni. Hátíðahöldin hefjast á hafnarsvæðinu kl. 12:00 og verður dorgveiðikeppni, carnival leikir, hoppukastalar og andlitsmálning ásamt kassaklifri og Hvolpasveitinni í boði. Skagfirðingasveit og Slysavarnadeildin Drangey verða með kaffisölu í neðri salnum á Kaffi Krók milli kl 12:00 og 16:00 sama dag.

Á laugardagskvöldinu er ball í íþróttahúsinu á Sauðárkróki þar sem hljómsveitin Stjórnin mun halda uppi fjörinu.

Sunnudaginn 2. júní hefst hátíðardagskráin á Hofsósi með helgistund við minnisvarðann um látna sjómenn kl 12:30. Að henni lokinni hefst dagskráin á hafnarsvæðinu þar sem verður m.a. dorgveiðikeppni, þrautabraut og sigling. Björgunarsveitin Grettir og Slysavarnardeildin Harpa verða með kaffisölu í Höfðaborg sem hefst kl 15:00.

Heimild: skagafjordur.is

Lesið úr nýjum bókum á Bókasafninu á Sauðárkróki

Í kvöld, miðvikudagskvöldið 14. nóvember  verður lesið úr nýjum bókum á bókasafninu  á Sauðárkróki og hefst samkoman kl. 20:00.

Rithöfundarnir: Arnar Már Arngrímsson, Davíð Logi Sigurðsson, Sigríður Hagalín Björnsdóttir og Þórdís Gísladóttir lesa úr nýútkomnum bókum sínum.

Jólate og konfekt

Allir velkomnir

 

Innritun í fjarnám Fjölbrautaskóla Norðurlands vestra

Innritun í fjarnám FNV er frá 25. nóvember 2014 til 4. janúar 2015. Upplýsingar um námsframboð og námsgjöld eru á heimasíðu skólans undir umsóknir fyrir fjarnema.

Allt fjarnám er án aldurstakmarkana (25 ára og eldri einnig velkomnir) Nánari upplýsingar veitir Sigríður Svavarsdsóttir umsjónarmaður fjarnáms. sirry@fnv.is

Ljótu Hálfvitarnir spila í Miðgarði

Ljótu hálfvitarnir ljúka starfsárinu með tónleikum í Miðgarði í Skagafirði föstudaginn 19. september næstkomandi. Fyrir vikið stefnir hljómsveitin á að hækka í botn og skrúfa vel frá öllum fíflalátakrönum.

Staðarvalið er vel við hæfi. Það er alltaf tilhlökkun í hálfvitarrútunni þegar keyrt er í Miðgarð. Þar er gott að spila og oft myndast ólýsanleg stemming, eða allavega stemming sem óráðlegt er að lýsa í smáatriðum í opinberum fjölmiðli. Fólk verður bara að vera þarna sjálft.

Forsjálir Skagfirðingar geta nálgast miða fram að tónleikunum hjá N1 á Sauðárkróki og í KS í Varmahlíð. Og svo bara við innganginn. Herlegheitin hefjast klukkan níu.

4689577622_e742be189f_z

Tindastóll áfram í undanúrslit í körfunni

Tindastóll tryggði sér í kvöld sæti í undanúrslitum Fyrirtækjabikars karla í körfuknattleik.

Tindastóll hafnaði í efsta sæti C-riðils þrátt fyrir tap gegn Stjörnunni 98-86 í Garðabæ en Stjörnumenn uðru í öðru sæti. Brian Mills og Justin Shouse skoruðu báðir 19 stig fyrir Stjörnuna auk þess sem Mills tók átta fráköst og Shouse 7 fráköst en hjá Tindastól var  George Valentine atkvæðamestur með 25 stig og 11 fráköst.

Hús rýmd á Sauðárkróki vegna snjóflóða

Þrjú íbúðarhús við Kambastíg á Sauðárkróki voru rýmd síðdegis í dag, sunnudaginn 18. nóvember, eftir að snjóflóð féll fyrir ofan þau og spýja féll að efsta húsinu. Mikil snjóhengja er í Nafarbrúnum fyrir ofan húsin og var því brugðið á það ráð að rýma þau. Fólkið sem þar býr hefur fengið inni hjá vinum og kunningjum.

Mikið hefur snjóað á Sauðárkróki og er meiri snjór í bænum en bæjarbúar eiga að venjast síðustu ár. Rýmingin gildir í það minnsta í nótt en staðan var metin á ný í hádeginu á morgun. Almannavarnanefnd tekur þá ákvörðun um framhaldið.

Ekki er vitað um önnur flóð á Norðurlandi en það sem féll á Sauðárkróki í dag. Þó getur verið að fleiri snjóflóð hafi fallið en fólk ekki orðið vart við það enda er fólk minna á ferli nú en venjulega vegna veðurs. Hætta er þó talin á snjóflóðum í giljum og hlémegin í fjöllum þar sem snjór hefur safnast saman.

Eigendur hesthúsa við Siglufjörð og Ólafsfjörð eru hvattir til að fara varlega enda er talin snjóflóðahætta í aðkomunni að hesthúsunum.

Heimild: Rúv.is

 

Króksmótið í minnibolta

Króksamótið, minniboltamót Tindastóls, verður haldið laugardaginn 3. nóvember. Um dagsmót er að ræða þar sem áherslan er lögð á skemmtun og fjör, en lítil sem engin á úrslit leikja.

Þetta er í þriðja skiptið sem mótið er haldið og hafa þátttakendur hingað til komið frá Akureyri, Skagaströnd og Hvammstanga. Um 120-130 krakkar hafa tekið þátt í mótinu s.l. ár.

Engin stig eru talin í leikjunum og áherslan meira á leikgleði og skemmtun.

Þátttökugjaldið er aðeins kr. 1.500 og allir fá gefins T-boli í boði FISK Seafood. Þá fá allir létta máltíð í lok mótsins.

Krakkar í 1. – 6. bekk eru hvött til þess að prófa að koma á æfingar í sínum flokkum og má sjá æfingatöfluna HÉR. Um að gera að prófa að æfa og taka þátt í þessu bráðskemmtilega móti.

Kvikmyndin Hross tekin upp á Sauðárkróki

Leikarar í kvikmyndum þurfa oft að leggja mikið á sig fyrir listina. Þannig fóru hross í samnefndri bíómynd í sjósund á Sauðárkróki.

Tökur á kvikmyndinni Hrossi hafa staðið yfir undanfarnar vikur, meðal annars á Kaldadal og Arnarvatnsheiði, í Hvítársíðu og nú síðast á Sauðárkróki.

Benedikt Erlingsson leikstjóri segir að þetta sé nokkurskonar innansveitarkrónika, dramatískar frásagnir af fólki sem lifir og hrærist í hestamennsku. „Þar sem hestar eru örlagavaldar í lífi fólks eins og er í raunveruleikanum. Hestar eru fjölskylduvinir og persónur og meðlimir í fjölskyldum á bæði beinan og óbeinan hátt,“ segir Benedikt í viðtali við Rúv.is.

Ein senan í myndinni var tekin í höfninni á Sauðárkróki og hér sundríða menn út að rússneskum togara, að því er virðist. Mörgum sem á horfðu leist ekki á blikuna, en Benedikt segir áhyggjur óþarfar því vel hafi verið fylgst með líðan hrossanna. „Það virðist vera meiri áreynsla fyrir hross að hlaupa 200 metra sprett á stökki en að synda í þrjár mínútur í sjó,“ segir hann.

Benedikt segir að fyrir kvikmyndagerðarmenn með lítið fé milli handanna sé ótrúlegt að finna fyrir þeirri hjálpsemi sem hann og hans fólk hafi notið um allt land. Þar hafi fólk lánað allt frá bóndabæjum upp í heilu togarana án þess að taka krónu fyrir.

Frétt frá www.ruv.is

Íbúafundur í Safnahúsi Skagfirðinga

Sveitarfélagið Skagafjörður stendur fyrir íbúafundi í Safnahúsinu á Sauðárkróki mánudaginn 10. september kl. 20:00. Á fundinum mun Haraldur Líndal fara yfir rekstrarúttekt sem hann vann fyrir sveitarfélagið.

Fleiri íbúafundir verða þriðjudaginn 12. september á eftirtöldum stöðum. Á Ketilási kl. 15:00, grunnskólanum á Hólum kl. 18:00 og loks í Miðgarði í Varmahlíð kl. 20:30. Á fundunum mun Haraldur Líndal fara yfir rekstrarúttekt sem hann vann fyrir sveitarfélagið.

Körfuboltabúðir Tindastóls byrjaðar

Körfuboltabúðir Tindastóls 2012 hófust í gær og verða fram á sunnudag. Þar munu þjálfarar yngri flokkanna vinna með hópana sína og hefja undirbúning fyrir keppnistímabilið. Rúmlega 90 krakkar eru skráðir í búðirnar.

Míkró- og minniboltakrakkar hófust með æfingu í gær og eftir það komu eldri flokkarnir inn. Síðan verða þrjár æfingar á laugardag og tvær á sunnudag og búðunum lýkur svo formlega um kl. 16 á sunnudag, með pylsugrillveislu.

Foreldrar vinna með starfsmönnum íþróttahússins að mönnun gæslu og umsjónar í húsinu, þann tíma sem engir húsverðir eru við störf og er afar gaman að sjá góðar undirtektir foreldra í þessu verkefni.

Áhugasamir eru hvattir til að láta sjá sig í húsinu um helgina.

Matráður óskast á Sauðárkrók

Leikskólinn Ársalir á Sauðárkróki óskar eftir að ráða matráð til starfa.

  • Ráðið er í stöðuna frá 17. september n.k. til 12. júlí 2013.
  • Um er að ræða  87,5% starf.
  • Laun samkvæmt kjarasamningi Launanefndar sveitarfélaga við Ölduna eða Starfsmannafélag Skagafjarðar.
  • Umsóknum skal skila á netfangið arsalir@skagafjordur.is.

Nánari upplýsingar gefur Anna Jóna Guðmundsdóttir leikskólastjóri í síma 4556090 eða 8991593.

UMSS sigraði heildarstigakeppnina í Þristinum

Þristurinn fór fram á Sauðárkróksvelli síðastliðinn miðvikudag. Þar kepptu UMSS, USVH og USAH sín á milli. Góðar aðstæður voru á Sauðárkrók til frjálsíþróttaiðkunnar þó að sólin hafi ekki látið sjá sig. Alls tóku um 70 keppendur þátt í mótinu, þar af voru um 30 í liði UMSS.

Úrslitin voru þau að UMSS vann heildarstigakeppnina en USAH var í öðru sæti og USVH í því þriðja.

Stigakeppni aldursflokkana var þannig að UMSS vann í flokki pilta 11 ára og yngri, stúlkna 12-13 ára og stúlkur 14-15 ára. USAH vann síðan stigakeppni stúlkna 9 ára og yngri , pilta 12-13 ára og pilta 14-15 ára.

Heimild: www.umss.is

Fimleikahringurinn á Sauðárkróki í næstu viku

Evrópumeistararnir í hópfimleikum munu enn og aftur sýna og kenna fimleika á ferð sinni um landið í sumar.  Hópurinn heimsækir Sauðárkrók nú í næstu viku.  Hópurinn verður með sýningu í íþróttamiðstöðinni á Sauðárkróki mánudaginn 30.júlí nk. klukkan 16:00.  Að sýningu lokinni gefst krökkum og unglingum kostur á að hljóta leiðsögn frá Evrópumeisturunum í fimleikum á um klukkustundarlöngu fimleikanámskeiði.  Þátttaka í fimleikanámskeiðinu kostar 1.000 kr.

Allur ágóði af kennslunni fer í sjóð til að fjármagna ferð hópsins á Evrópumeistaramótið í Århus í haust þar sem hópurinn freistar þess að verja Evrópumeistaratitil Íslands. Heimsóknin á Siglufjörð er liður í Fimleikahringnum sem er samstarfsverkefni Íþróttafélagsins Gerplu, UMFÍ og Olís.  Tilgangur Fimleikahringsins er að kynna hópfimleika fyrir landsbyggðinni og vekja athygli á Ungmennalandsmóti UMFÍ sem fram fer um Verslunarmannahelgina á Selfossi. Hér má finna tengil á fésbókarsíðu Fimleikahringsins en þar má finna myndir frá fyrri ferðum hópsins um landið. http://www.facebook.com/#!/fimleikahringurinn

Texti: Innsent efni / Björn Björnsson.

Ekki skamma mig séra Tumi á Sauðárkróki

Leik- og söngdagskráin „Ekki skamma mig séra Tumi“ verður sýnd á Bifröst á Sauðárkróki laugardaginn 28. júlí klukkan 20. Dagskráin er um vinina Jónas Hallgrímsson, rithöfund og ljóðskáld og vin hans og Tómas Sæmundsson. Guðrún Ásmundsdóttir rekur sögu þeirra sem hefur verið hulin íslenskum áhorfendum fram að þessu.

Guðrún hefur langa og mikla reynslu í því að flytja sögu sem þessi á lifandi og skemmtilegan hátt. Inn í verkið fléttast síðan ýmiskonar lög frá ýmsum tímum, sum eftir Jónas Hallgrímsson – t.d. Jeg elsker dig, önnur sem tengjast lífi hans og störfum á annan hátt. Alexandra Chernyshova sópran söngkona syngur. Leik- og söngdagskráin fjallar um ævi og störf Jónasar Hallgrímssonar og tengsl hans og vinar Tómasar Sæmundssonar á mismunandi tímum ævi þeirra. Verkið tekur einnig á þeim erlendum áhrifum sem Jónas var fyrir og koma þau vel fram í söngdagskránni en lögin eru sungin á fimm tungumálum alls. Inn í dagskránna fléttast síðan vídeóverk sem Arna Valsdóttir vídeólistamaður hefur gert um Hraundragana í Öxnadal og er tileinkað ljóði Jónasar “Ferðalok”. þrír hljóðfæraleikarar koma að verkinu en leikið er undir lögin á píanó, fiðlu og selló.

Markmið er að kynna fyrir íslenskum áhorfendum ævi og störf Jónasar Hallgrímssonar og vináttutengsl hans við Tómas Sæmundsson á léttan og skemmtilegan hátt með leik- og söngdagkrá. Guðrún Ásmundsdóttir er í hlutverki sögumanns og fléttar inn í söguna leik og söng eins og við á hverju sinni. Ýmislegt kemur fram í verkinu sem íslenskir áhorfendur vissu ekki um Jónas og Tómas og á það því fullt erindi til þeirra.

Sýning:  Bifröst á Sauðárkróki Laugardaginn 28. júlí klukkan 20.

Hlutverk:

Tómas Sæmundsson leikur Davíð þór Jónsson Jónas Hallgrímsson leikur Ragnar Kjartansson Sögumaður og höfundur handrits er Guðrún Ásmundsdóttir. Söngkona og leikandi er Alexandra Chernyshova. Myndlistarkonur og leikendur eru Ásdís Sif Gunnarsdóttir og Arna Guðný Valsdóttir Heiðursgestur og leikandi í sýningunni er Þráinn Karlsson.

 

Tindastóll burstaði Hött


Tindastóll og Höttur mættust í blíðskaparveðri á Sauðárkróksvelli þann 7.júlí. Fyrir leikinn munaði tveim stigum á liðunum.

Ljóst var fyrir leik að markmaður Hattar, Ryan Allsop myndi ekki spila í dag, Ryan hefur verið stórgóður á milli stangana og aðeins fengið á sig sex mörk.

Leikurinn hófst fjörlega þar sem liðin skiptust á að sækja. Tindastólsmenn pressuðu vel og uppskáru mark á 8.mínutu þegar Ben Everson skoraði laglegt mark. Mikil barátta var í leiknum og sóknir báðu megin þó svo að Hattarmenn hafi ekki að skapa sér neitt afgerandi færi.

Heimamenn náðu síðan hægt og bítandi yfirhöndinni í leiknum og voru þeir að skapa stórhættu í hverri sókn. Það var síðan gegn gangi leiksins að Hattarmenn jafna úr hornspyrnu, en þar var að verki Stefán Þór Eyjólfsson á 30.mín. Strax í næstu sókn fá Tindastólsmenn hornspyrnu og þar hoppar Dominic Furness manna hæst og skallar hann í netið og kemur Tindastóli aftur yfir.

Eftir þetta auka Tindastólsmenn enn frekar í sóknarleikinn og hver sóknin af annari dynur á Héraðsbúum. Það er síðan á 37.mín að yngsti Furness bróðirinn, Theo skorar fínt mark og staðan orðin 3-1. Stólarnir halda áfram að yfirspila Hattarmenn á miðjunni og bæta við fjórða markinu á markamínutuni miklu. Þar var að verki Theodore Furness í annað sinn.

Eysteinn Húni Hauksson þjálfari Hattar hefur væntanlega messað vel yfir sínum mönnum í hálfleik því allt annar bragur var á liðinu í byrjun seinni hálfleiks. Þeir náðu upp betra spili og höfðu undirtökin í leiknum. Það var svo á 60.mínutu að Stefán Þór Eyjólfsson skoraði sitt annað mark eftir klafs í teignum og Höttur eygðu þarna smá von. Stólarnir náðu að koma sér aftur betur inní leikinn og náðu markvissari sóknum sem skilaði sér í enn einu marki fyrir Stólana, Ben Everson bætti við sínu öðru marki í leiknum á 72.mínutu og staðan orðin 5-2.

Eftir þetta voru stólarnir komnir með öll tök á vellinum sóknir liðsins stórhættulegar og þeir hefðu hæglega getað bætt við 2-3 mörkum til viðbótar áður en varamaðurinn Max Toulute bætti við sjötta marki heimamanna á 89.mín. Í uppbótartíma voru Stólarnir klaufar að ná ekki að bæta við sjöunda marki sínu í leiknum.

Jan Erik Jessen dómari leiksins flautaði síðan leikinn af og sanngjarn 6-2 sigur heimamanna staðreynd. Eftir leikinn komu Stólarnir sér upp í fimmta sæti deildarinnar með 11.stig og markatöluna 19-17. Hattarmenn sem voru búnir að fá á sig sex mörk fyrir þennan leik eru stigi á eftir Stólunum í sjöunda sæti með markatöluna 10-12.

Tindastóll lagði Víking

Tindastóll 3 – 1 Víkingur R.

0-1 Evan Schwartz (’11 )
1-1 Fannar Freyr Gíslason (’12 )
2-1 Theo Furness (’59 )
3-1 Ben J. Everson (’90 )
Rautt spjald: Reynir Leósson (’87, Víkingur R. )

Víkingur Reykjavík mætti á Sauðárkrók í 6. umferð 1. deildar sumarið 2012. Fyrir leikinn voru liðin nokkuð jöfn á töflunni, Víkingar með sex stig en Tindastóll með fjögur en Víkingar töpuðu illa á móti Fjölni í síðasta leik meðan Tindastólsmenn náðu góðu jafntefli við granna sína í KA, í leik þar sem bæði liðin hefðu getað endað með stigin þrjú.

Á Sauðárkróki var veðrið skítsæmilegt, norðangarri þvert á milli hornfánana og Tindastólsliðið byrjaði með vindinn ská í bakið en Tindastólsmenn voru án unglingana Arnar Skúla og Fannars Kolbeins og þá var Haítíbúinn Max Touloute ,sem hefur verið að sýna frábær tilþrif að undanförnu, ekki með vegna meiðsla.

Víkingar byrjuðu leikinn töluvert betur, áttu nokkrar snarpar sóknir sem voru allar frekar svipaðar, þar sem boltinn kom nokkrum sinnum þvert inn fyrir vörn Tindastóls og að lokum endaði ein slík sókn með marki. Þversending, inn fyrir vörn Tindastóls frá vinstri kanti flaut yfir allan teiginn og endaði með því að hægri kanturinn Evan Swartz rak endapunktinn nokkuð auðveldlega.

Tindastólsstrákarnir voru hins vegar ekki lengi að jafna leikinn. Eftir gott uppspil náðu Tindastólsmenn að senda bakvörðinn Ingva Hrannar einan í gegn sem síðan renndi boltanum ákaflega óeigingjart til Fannars Freys Gíslassonar sem skoraði gott mark.

Nokkuð jafnræði var með liðinum það sem eftir leið hálfleiksins, ekki mikið af færum og Tindastólsmenn náðu að loka á þversendingar Víkinga sem reyndu í staðinn að fara upp miðjunni. En þar lentu þeir á bestu mönnum vallarins í dag, hinu mjög unga miðvararpari Tindastóls, Edvard Berki og Birni Antoni sem spiluðu vel allan leikinn.

Víkingar aðeins meira með boltann í síðari hálfleik en enginn færi til að telja litu dagsins ljós fyrr en 58. mínútu.  Theo smellti knettinum í hornið  og Tindastólsmenn komnir óvænt yfir.

Eftir markið féllu Tindastólsstrákarnir aðeins til baka en Víkingarnir náðu þó aldrei að vera neitt sérstaklega hættulegir nema þá kannski í föstum leikatriðum. Lang besta færi Víkinga til að jafna fékk Hjörtur Hjartarsson þegar boltinn datt fyrir framan hann en skotið fór langt framhjá markinu. Þá fékk Fannar Freyr gott færi fyrir Tindastól eftir gott uppspil en Þorvaldur Víkingsmarkvörður varði vel.

Í lok leiksins fékk Reynir Leósson sitt annað gula spjald fyrir að reyna stíga út framherjann Ben Everson í hraðri sókn Stólanna. Sanngjarnt spjald og Reynir hefði í raun átt að fá það mínútu áður þegar hann sýndi nákvæmlega sömu tilburði en í það skiptið fékk Ben Everson spjaldið fyrir eitthvað sem aðstoðardómari númer 2 sá.

Á síðustu mínútunni þegar Víkingarnir voru komnir vel framarlega náði títtnefndur Ben Everson að stela boltanum af Agli Atlasyni sem var aftasti maður Víkinga  og Ben brunaði að marki, lék á Þorvald markmann og rúllaði boltanum í markið.

Frábær sigur og sanngjarn hjá Tindastólsstrákunum. Nokkuð óvænt úrslit kannski fyrir utanaðkomandi en það hefur verið mikill stígandi í leik Tindastóls í síðustu leikjum. Tindastólsliðinu hefur gengið vel að skora, er það lið í deildinni sem hefur skorað næst flest mörk en að sama skapi verið það lið sem hefur fengið flest mörk á sig.

Leikskýrslu KSÍ má lesa hér.

Opna KS mótið í golfi

Opna KS mótið fór fram laugardaginn 9. júní í blíðskapar veðri á Sauðárkróki. Alls tóku tæplega 50 kylfingar þátt í mótinu sem tókst hið besta og var árangurinn frábær hjá mörgum kylfingum. Mótið var spilað með Texas Scramble fyrirkomulagi, þannig að tveir og tveir spila saman í liði og velja betra högg í hvert sinn sem þeir slá.

Í fyrsta sæti í mótinu urðu þau Árný Árnadóttir og Rafn Ingi Rafnsson. Þau komu inn á ótrúlega góðu skori eða 67 höggum brúttó, 5 höggum undir pari, en með forgjöf var skorið 63 högg.  Ingvi Þór Óskarsson og Arnar Geir Hjartarson léku á 68 höggum eða 65 með forgjöf í þriðja sæti urðu þau Dagbjört Rós Hermundardóttir og Ásmundur Baldvinsson á 67 höggum með forgjöf. Urðu þau jöfn þeim Ingibjörgu Guðjónsdóttur og Birni Sigurðssyni, Þóri Þórissyni og Auði Dúadóttur úr GA og Brynjari Guðmundssyni og Þorbergi Ólafssyni. Þau síðarnefndu voru með heldur lakara skor á seinni 9 holunum og hlutu þau Dagbjört og Ásmundur því þriðja sætið.

FISK Seafood á Sauðárkróki ályktar

Fundur haldinn með áhöfnum skipa FISK Seafood og stjórnendum þess 5 júní 2012 á Sauðárkróki.
Á fundinn mættu ríflega 90 manns.
Áhafnir skipa FISK Seafood senda frá sér eftirfarandi ályktun:

,,Fundurinn  fordæmir vinnubrögð núverandi stjórnvalda í framgöngu sinni í breytingum á fiskveiðistjórnunarkerfinu.

Frumvörpin sem lögð hafa verið fram eru vanhugsuð og bein aðför að okkur sem erum starfsmenn stærri sjávarútvegsfyrirtækja svo og landsbyggðinni allri.

Jafnframt skora fundarmenn á stjórnvöld að draga þessi frumvörp til baka í óbreyttir mynd, og vinni að frumvarpi sem leiði til sem mestra sátta á meðal þegna landsins ´´

Áhafnir:

  • Arnars HU 1
  • Málmeyjar SK 1
  • Klakks  SK 5
  • Örvars SK 2