Tag Archives: gss

Nýr golfhermir í Skagafjörð?

Ágætu félagar í GSS
Að undanförnu hafa nokkrir félagar í GSS rætt sín á milli um kaup á golfhermi í nýja inniaðstöðu klúbbsins. Sá hermir sem helst kemur til greina er af gerðinni Double Eagle DE3000 sem er einn sá besti sem völ er á. Í herminum er hægt að spila marga heimsþekkta golfvelli og er grafík eins og best verður á kosið. Einnig er afar mikilvægt að nútíma golfhermar gefa mjög raunhæfa mynd af sveiflu og raunverulegri getu. Þetta er því ekki bara tölvuleikur, heldur tæki til að bæta sig í golfi. Auk þess að spila golfvelli er hægt að vera á æfingarsvæðinu og fá nákvæmar upplýsingar um högg, lengdir, sveifluhraða o.s.frv. á sama hátt og mæling fer fram hjá söluaðilum á golfkylfum.

Ákveðið hefur verið að kanna áhuga félagsmanna og stofna áhugamannafélag um kaup á slíkum hermi. Ljóst er að einungis verður hægt að festa kaup á slíku tæki með samstilltu átaki margra. Ákveðið hefur verið að fara þá leið að fara þess á leit við félagsmenn að þeir kaupi fyrirfram tíma í herminn með afslætti og þannig verði hægt að safna nægu fjármagni til að hefjast handa. Jafnframt er mikilvægt að hefjast þegar handa, þannig að hermirinn geti verið kominn í gagnið fyrir áramót.

Í stuttu máli er hugmyndin sú að áhugamannafélagið kaupi golfherminn, safni fjármagni í upphafi að upphæð 1 milljón króna, en síðan verði seldir tímar í herminn. Hver klukkustund í herminum kosti 2500 krónur fyrir félagsmenn, en allt að 5 manns geti spilað í einu. Utan félagsmenn munu greiða hærra gjald, 3-3500 krónur. Einn 18. holu hringur tekur um 2-3 klukkustundir, en kostnaður dreifist að sjálfsögðu eftir því hversu margir spila í einu. Þess má geta að á höfuðborgarsvæðinu kostar klukkutíminn 3000-3500 krónur og er þar um að ræða eldri gerðir herma. Heildarkostnaður vegna hermisins og uppsetningar hans er um 5 milljónir króna.

Alla fréttina má lesa hér.

Heimild: gss.is

Norðurlandsmótaröð barna og unglinga í golfi lokið

Síðasta mótið í  Norðurlandsmótaröð barna-og unglinga í golfi var haldið á Jaðarsvelii á Akureyri sunnudaginn 2. september s.l.  Jafnframt mótinu voru krýndir stigameistarar Norðurlands í hverjum aldursflokki.

Golfklúbbur Sauðárkróks eignaðist einn Norðurlandsmeistara en það var Arnar Geir Hjartarson sem sigraði í flokki 17-18 ára.  Hákon Ingi Rafnsson varð í þriðja sæti í flokki 12 ára og yngri.  Í flokki 14 ára og yngri varð Matthildur Kemp Guðnadóttir í 2. sæti og Elvar Ingi Hjartarson í 3.sæti.  Arnar Geir Hjartarson varð síðan í 2.sæti í flokki 17-18 ára. Þá hlaut Matthildur aukaverðlaun í púttkeppni og Arnar Geir hlaut verðlaun fyrir að vera næstur holu á 18.braut. Heildarúrslit í mótinu er hægt að sjá á www.golf.is og niðurstöðu í heildarstigakeppni sumarsins er að finna á nordurgolf.blog.is.

Heimild: www.gss.is

Flott golfmót á Sauðárkróki í sumar

Síðustu helgar hefur hvert golfmótið eftir annað verið haldið að Hlíðarenda á Sauðárkróki. Ágæt þátttaka hefur verið í hverju móti og veður leikið við keppendur.

Opna Hlíðarkaupsmótið var haldið 28. júlí og voru keppendur 47. Veitt voru verðlaun fyrir fimm efstu sætin í punktakeppni. Sigurvegari varð Jóhann Örn Bjarkason GSS, en í kjölfar hans komu þeir Ásmundur Baldvinsson GSS, Jakob Helgi Richter GA, Arnar Geir Hjartarson GSS, Brynjar Örn Guðmundsson GSS og Kristján Halldórsson GSS.

Á opna Vodafonemótinu sem fram fór 4. ágúst var keppt í höggleik í karla og kvennaflokki, auk þess sem verðlaun voru veitt fyrir flesta punkta. Sigurvegarar í karlaflokki voru þeir Einar Haukur Óskarsson GK og Bjarni Sigþór Sigursson GS, en þeir léku á 75 höggum. Elvar Ingi Hjartarsson GSS varð síðan í þriðja sæti, höggi á eftir þeim. Í kvennaflokki sigraði Dagbjört Rós Hermundardóttir á 83 höggum. Sigríður Elín Þórðardóttir og Árný Árnadóttir voru síðan jafnar í 2-3 sæti á 85 höggum. Punktakeppnina sigraði Dagbjört Rós á 43 punktum. Elvar Ingi fékk 42 punkta en í þriðja sæti varð Magnús Gunnar Magnússon með 36 punkta.

Heimild: www.gss.is

Opna Icelandair golfers á Sauðárkróki

Eitt af stórmótum sumarsins í golfi fer fram að Hlíðarenda á Sauðárkróki  laugardaginn 21. júlí, Opna Icelandair golfers mótið. Hvetum við sem flesta til að skrá sig sem allra fyrst, enn eru lausir rástímar. Góð verðlaun eru í boði Icelandair Golfers, gjafabréf af ýmsu tagi. Skráning og nánari upplýsingar eru á www.golf.is

Golfmaraþon á Sauðárkróki

Á föstudaginn s.l. fóru börn og unglingar Golfklúbbs Sauðárkróks létt með að spila 1000 golfholur eins og þau hétu að gera til styrktar unglingastarfi klúbbsins. Það tók þau aðeins um 11 klukkustundir. Frábær stemming var meðal krakkanna og allir stóðu sig frábærlega, ekki sýst þau yngstu, sem gengu allan daginn og létu engan bilbug á sér finna.

 

Opna KS mótið í golfi

Opna KS mótið fór fram laugardaginn 9. júní í blíðskapar veðri á Sauðárkróki. Alls tóku tæplega 50 kylfingar þátt í mótinu sem tókst hið besta og var árangurinn frábær hjá mörgum kylfingum. Mótið var spilað með Texas Scramble fyrirkomulagi, þannig að tveir og tveir spila saman í liði og velja betra högg í hvert sinn sem þeir slá.

Í fyrsta sæti í mótinu urðu þau Árný Árnadóttir og Rafn Ingi Rafnsson. Þau komu inn á ótrúlega góðu skori eða 67 höggum brúttó, 5 höggum undir pari, en með forgjöf var skorið 63 högg.  Ingvi Þór Óskarsson og Arnar Geir Hjartarson léku á 68 höggum eða 65 með forgjöf í þriðja sæti urðu þau Dagbjört Rós Hermundardóttir og Ásmundur Baldvinsson á 67 höggum með forgjöf. Urðu þau jöfn þeim Ingibjörgu Guðjónsdóttur og Birni Sigurðssyni, Þóri Þórissyni og Auði Dúadóttur úr GA og Brynjari Guðmundssyni og Þorbergi Ólafssyni. Þau síðarnefndu voru með heldur lakara skor á seinni 9 holunum og hlutu þau Dagbjört og Ásmundur því þriðja sætið.

Golfkennsla fyrir fullorðna hjá Golfklúbbi Sauðárkróks

Thomas Olsen golfkennari mun bjóða upp á kennslu fyrir einstaklinga sem hópa í sumar á Sauðárkróki. Verð fyrir hvern einkatíma er 3000 krónur, en einnig er hægt að kaupa fleiri tíma með afslætti.

Byrjendanámskeið hefst þriðjudaginn 5. júní kl. 20. Um hópkennslu er að ræða, þar sem farið verður yfir helstu atriðin í golfíþróttinni. Byrjendanámskeið er nauðsynlegur undanfari þess að spila golf á vellinum, enda er þar einnig farið yfir reglur og umgengni um völlinn. Verð fyrir byrjendanámskeið er 6000 krónur og er gert ráð fyrir að námskeiðið sé í heild 10 klukkustundir og skiptist á nokkra daga.

Þá verður boðið upp á þá nýbreytni í sumar að bjóða upp á stutt hópanámskeið í einstökum þáttum s.s. púttum, að slá upp úr glompu o.s. frv. Námskeiðin verða auglýst betur síðar, en þau eru ætluð þeim sem eru komin nokkuð á veg í íþróttinni.

Hægt er að fá nánari upplýsingar hjá Thomas í síma 691 5075 eða senda fyrirspurnir í netfangið unnar.ingvarsson@gmail.com

Golfskóli Golfklúbbs Sauðárkróks

Golfskóli Golfklúbbs Sauðárkróks hefst þriðjudaginn 5.júní n.k. og verður starfræktur mánudaga til fimmtudaga  í sumar frá kl.10 – 15 og föstudaga kl.10 – 12. Golfskólinn fyrir 7 – 11 ára  (yngsti árgangur 2005 ) verður milli kl. 10 og 12.  12 ára og eldri  verða síðan á milli kl. 10 og 15.

Þeir allra yngstu geta einnig skráð sig í námskeið á vegum Sumar Tím hjá Sveitarfélaginu Skagafirði. Þar verður hægt að kynnast íþróttinni á vikunámskeiðum frá klukkan 08:00 – 10:00 frá mánudegi til fimmtudags.

Nú hefur Golfklúbburinn fengið að gjöf veglegan búnað sem notaður verður fyrir yngstu kylfingana, þar sem markmiðið er að læra golf í gegn um margvíslega leiki. FISK Seafood færði klúbbnum búnaðinn að gjöf og er það frábær stuðningur við barna- og unglingastarfið.

Þjálfari í golfskólanum alla daga í sumar verður Thomas Olsen golfkennari frá Danmörku. Honum til aðstoðar verða reynslumiklir unglingar úr klúbbnum.

Gjald er kr. 15.000 fyrir 7-11 ára og  kr. 20.000 fyrir 12-16 ára. Þetta gjald er fyrir allt sumarið og inni í því er aðgangur að vellinum fyrir sumarið.

Skráning í golfskólann er hjá Hirti Geirmundssyni – hjortur@fjolnet.is eða í síma 8217041. Hann veitir einnig  frekari upplýsingar.

Hvítasunnumót Loðfelds í golfi

Golfklúbbur Sauðárkróks kynnir:

Punktakeppni hámarksleikforgjöf karla 24 og kvenna 28.  Ræst verður út á öllum teigum klukkan 10:00 – mæting eigi síðar en 9:30. Aðalstyrktaraðili mótsins er Loðfeldur.  Verðlaun fyrir þrjú efstu sætin.

 

Þátttökugjald er 2000.- fyrir félagsmenn í GSS, GÓS og GSK. Gestir greiða vallargjald kr. 3700.-

 

Mótsstjóri Sigríður Elín Þórðardóttir.

Nánari upplýsingar og skráning á golf.is

 

Mótanefnd GSS

GSS tók þátt í Atvinnulífssýningunni

GSS tók þátt í Atvinnulífssýningunni í Skagafirði nú í upphafi Sæluviku. Fjölmargir komu við og fræddust um störf klúbbins og margir sóttust eftir kynningu eða gengu til liðs við klúbbinn.

Gestum sýningarinnar var boðið að taka þátt í getraun, hversu mörg tí voru í blómavasa í bás klúbbsins. Um 500 manns tóku þátt í getrauninni en enginn giskaði á rétta tölu, sem var 1080. Sú sem næst komst var Elísabet Pálmadóttir og skeikaði 18 tíum á hennar giski. Fær hún í verðlaun golfkennslu. Aðrir sem voru nálægt og hljóta golfvörur í vinning voru Eymundur Ás, Helga Dóra Lúðvíksdóttir og Hafsteinn A. Hallgrímsson. Fá þau golfvörur í verðlaun frá GSS og verður haft samband við vinningshafa.

Hlíðarendavöllur í frábæru ástandi eftir veturinn

Sjaldan eða aldrei hefur golfvöllurinn komið betur undan vetri en nú. Vakin er athygli á því að völlurinn er opinn, en einungis fyrir félagsmenn.

Mjög mikilvægt er að félagsmenn lagi boltaför á flötum, á því hefur verið mikill misbrestur. Einnig að laga kylfuför á brautum og færa úr bleytu yfir í karga þar sem hætta er á skemmdum. Jafnframt er ætlast til þess að fólk fari ekki með kerrur inn á völlinn, heldur beri kylfurnar. Völlurinn er ennþá í viðkvæmu ástandi og mikilvægt að gæta að honum okkar allra vegna.

Æfingasvæðið verður opið um helgina og boltavélin í gangi.

Golfklúbbur Sauðárkróks: Æfingasvæðið opið !

Nú geta Skagfirskir kylfingar farið að munda kylfurnar því æfingasvæðið hjá Golfklúbbi Sauðárkróks er opið og vor í lofti. Um páskanna verður boltavélin í gangi. Þeim sem vantar token í vélina er bent á að hafa samband við Pétur Friðjónsson eða Mugg vallarstjóra og þeir munu bjarga málum.

Heimasíða Golfklúbbs Sauðárkróks er hér.