Samstarf Alzheimersamtakanna og Öldrunarheimila Akureyra

Árni Sverrisson formaður Alzheimersamtakanna og Halldór S. Guðmundsson, framkvæmdastjóri Öldrunarheimila Akureyrar, hafa undirritað viljayfirlýsingu til að staðfesta og efla enn frekar samstarf Alzheimersamtakanna og Öldrunarheimila Akureyrar.

Undanfarin ár hafa Öldrunarheimili Akureyrar og Alzheimersamtökin unnið saman að ýmsum verkefnum á sviði almennrar fræðslu, ráðgjafar og stuðnings við einstaklinga með heilabilun og fjölskyldur þeirra, en viljayfirlýsingin staðfestir enn meira samstarf á þessu sviði.

Viljayfirlýsingin tekur til að mynda til áframhaldandi samstarfs um uppbyggingu náms og námskeiða fyrir almenning og fagfólk, samstarfs um að bjóða til samverustunda, Alzheimerkaffis og fræðslu- og hópastarfs líkt og hefur verið haldið í húsakynnum Öldrunarheimila Akureyrar. Einnig er stefnt að samstarfi um að byggja upp á Akureyri ráðgjafarþjónustu sem sérhæfir sig í heilabilun en ráðgjafastofunni er ætlað að þjóna íbúum og starfsfólki á Norðurlandi.