Sæluvikunni lýkur um helgina

Sæluviku Skagfirðinga lýkur um helgina en dagskráin er þétt fram á sunnudag og ættu allir að finna sér eitthvað skemmtilegt við hæfi. Laugardagurinn hefst með morgunkaffi í Ljósheimum á vegum kaffiklúbbsins Skín við sólu Skagafjörður og á sama tíma opnar Árskóli á Sauðárkróki og býður gesti velkomna að mæta í skólann og kynnast skólastarfinu. Klukkan 11:00 verða kynnt sjávarböð við smábátahöfnina á Sauðárkróki og myndlistarsýningin í Gúttó verður opin kl. 14-18. Leiksýningin, Beint í æð, verður kl. 16:00 í Bifröst.

Á laugardagskvöldinu verður Karlakórinn Heimir með Sæluvikutónleika í Menningarhúsinu Miðgarði kl. 20:30. Kvöldinu lýkur með dansleik á Mælifelli sem hefst kl. 23:00.

Sunnudagurinn er síðasti dagur Sæluvikunnar.  Klukkan 14:00 verður málþing í Miðgarði, Skagfirsk fræði í nútíð og fortíð, í tilefni 80 ára afmælis Sögufélags Skagfirðinga og 70 ára afmælis Héraðsskjalasafns Skagfirðinga. Guðni Th. Jóhannesson forseti Íslands verður meðal gesta.

Í félagsheimilinu Melsgili verður flóamarkaður kl. 14:00 þar sem ýmislegt verður til sölu, notað og nýtt, og opin myndlistarsýningin í Gúttó. Tveir viðburðir verða í Bifröst, fyrst verður sýnd teiknimynd, Dýrin í Hálsaskógi, kl 16:00 og um kvöldið kl. 20:00 sýnir Leikfélag Sauðárkróks Beint í æð.