Rán framið í kjörbúð á Akureyri

Rán var framið í kjörbúð á Akureyri á sjöunda tímanum í morgun. Karlmaður á þrítugsaldri ógnaði tveimur starfsmönnum með hnífi og krafðist þess að fá afhenta peninga úr sjóðsvélum. Er hann hafði fengið peningana hljóp hann á brott frá versluninni. Lögreglumenn á Akureyri fengu upplýsingar af ráninu meðan það var yfirstandandi og gátu brugðist skjótt við. Lögreglan á Norðurland eystra greindi frá þessu.

Unnt var að rekja ferðir mannsins í nýföllnum snjó og ganga að honum þar sem hann hafði falið sig. Maðurinn veitti ekki mótspyrnu við handtökuna en er talinn hafa verið undir áhrifum bæði áfengis og fíkniefna. Var hann vistaður í fangageymslu meðan víman rennur af honum og unnt verður að yfirheyra hann. Peningaupphæðin sem hann rændi var óveruleg.

Rannsókn málsins miðar vel og starfsmönnum verslunarinnar var boðin áfallahjálp. Ekki er talið að maðurinn hafi átt sér vitorðsmenn. Ákvörðun um gæsluvarðhald verður tekin í kvöld.