Myndir frá Akureyrarvöku

Akureyrarvöku á 157. ára afmæli Akureyrarbæjar lauk á miðnætti í gærkvöld, 31. ágúst, með miðnætursiglingu eikarbátsins Húna II um Pollinn eftir magnaða stórtónleika í Listagilinu þar sem einvala lið tónlistarmanna steig á stokk. Allar veðurspár brugðust góðu heilli og var veður stillt og sólríkt fyrr um daginn en stjörnubjart þegar leið á kvöldið. Vel var mætt á tónleikana í gærkvöld og allt fór vel fram.

Ljósasýning Almars Freys, Tálsýnar, á byggingum beggja vegna sviðsins í Listagilinu og seinna sjálfri Akureyrarkirkju glöddu augu viðstaddra á meðan Bríet, Eik Haralds, Eyþór Ingi, Friðrik Dór og Helgi Björns sungu sín vinsælustu lög við undirleik hljómsveitarinnar Vaðlaheiðarinnar.

Dagskráin hófst kl. 10:00 á föstudagsmorgun og hefur hver viðburðurinn rekið annan. Sjá nánar á www.akureyrarvaka.is.

Myndir með frétt tóku Helga Gunnlaugsdóttir og Lilja Guðmundsdóttir, birtar með leyfi Akureyrarstofu.