Málverk í eigu Fjallabyggðar til sýnis í MTR í september

Í nýjum sal Menntaskólans á Tröllaskaga eru sett upp listaverk mánaðarlega, oftast af einstökum listamönnum af nærsvæði skólans sem er boðið að sýna verk sín. Í þessum mánuði voru sótt verk í Listasafn Fjallabyggðar.

Yfirskriftin er: „Afstrakt eða Abstrakt“ – en sýningin er helguð óhlutbundnum verkum. Hún samanstendur af fimm verkum úr höfðinglegri gjöf hjónanna Arngríms Ingimundarsonar og Bergþóru Jóelsdóttur til Siglufjarðarkaupstaðar árið 1980. Með henni vildu hjónin sýna Siglfirðingum þakklæti fyrir stuðning þeirra við foreldra Arngríms eftir að þau brugðu búi í Fljótunum vegna heilsubrests og fluttust til Siglufjarðar. Í heild gáfu Arngrímur og Bergþóra Siglufjarðarkaupstað 127 verk eftir marga af frestu listmálurum þjóðarinnar á tuttugustu öld. Er þessi einstaka gjöf grunnurinn að listaverkasafni Fjallabyggðar í dag.

Verkin sem til sýnis eru í Menntaskólanum á Tröllaskaga í september, og eru notuð sem námsefni í grunnáfanga í myndlist.