Keppa fyrir Dalvíkurbyggð í NorðurOrgi

Félagsmiðstöðin Týr í Dalvíkurbyggð hélt nýverið söngkeppni þar sem verið er að velja þann aðila sem tekur þátt í NorðurOrgi (söngkeppni félagsmiðstöðva á Norðurlandi).  Alls kepptu þrjú atriði og voru sigurvegarar að þessu sinni drengir í 8. bekk, þeir Þormar Ernir Guðmundsson, söngur,  Þorsteinn Jakob Klemenzson, píanó og Elvar Freyr Jónsson, bassi.

Á hverju ári halda Samtök félagsmiðstöðva og ungmennahúsa á Íslandi (Samfés) söngkeppni í Laugardalshöllinni. Hver landshluti fær að senda nokkra keppendur í þessa keppni, sem undanfarin ár hefur verið sjónvarpað beint á RÚV.  Undanfarinn er sá að félagsmiðstöðvarnar á Norðurlandi halda undankeppni sem er kölluð NorðurOrg. Fimm atriði eru síðan valin þaðan til að taka þátt fyrir hönd félagsmiðstöðva á Norðurlandi í aðalkeppni Samfés í Laugardalshöllinni í Reykjavík.

Söngkeppnin NorðurOrg fer fram föstudaginn 26. janúar næstkomandi á Sauðárkróki.