Gáfu Síldarminjasafninu hjartastuðtæki

Fulltrúar frá Kiwanisklúbbnum Skildi í Fjallabyggð færðu Síldarminjasafninu hjartastuðtæki að gjöf föstudaginn 8. maí síðastliðinn.
Tækið er hið vandaðasta, af gerðinni Samaritan PAD350, og er hálfsjálfvirkt. Kiwanisklúbburinn Skjöldur gaf að auki fylgihluti með tækinu og skáp til að geyma búnaðinn.  Þetta kemur fram á vef Síldarminjasafnsins.

Fari einstaklingur í hjartastopp utan sjúkrahúss skiptir hver mínúta sköpum og geta hjartastuðtæki verið mikilvægur þáttur í að bjarga mannslífum. Tækinu verður komið fyrir í Bátahúsinu og starfsfólki Síldarminjasafnsins kennt að nota það.

Á meðfylgjandi ljósmynd má sjá Kiwanismennina Ómar Hauksson, Þorgeir Gunnarsson og Albert Gunnlaugsson og Eddu Björk Jónsdóttur og Anitu Elefsen sem veittu gjöfinni viðtöku fyrir hönd Síldarminjasafnsins.

Heimild: sild.is

Mynd: sild.is