GSS tók þátt í Atvinnulífssýningunni

GSS tók þátt í Atvinnulífssýningunni í Skagafirði nú í upphafi Sæluviku. Fjölmargir komu við og fræddust um störf klúbbins og margir sóttust eftir kynningu eða gengu til liðs við klúbbinn.

Gestum sýningarinnar var boðið að taka þátt í getraun, hversu mörg tí voru í blómavasa í bás klúbbsins. Um 500 manns tóku þátt í getrauninni en enginn giskaði á rétta tölu, sem var 1080. Sú sem næst komst var Elísabet Pálmadóttir og skeikaði 18 tíum á hennar giski. Fær hún í verðlaun golfkennslu. Aðrir sem voru nálægt og hljóta golfvörur í vinning voru Eymundur Ás, Helga Dóra Lúðvíksdóttir og Hafsteinn A. Hallgrímsson. Fá þau golfvörur í verðlaun frá GSS og verður haft samband við vinningshafa.

Hiti í mönnum vegna Ársreikninga Skagafjarðar árið 2011

Kristján Jónasson löggiltur endurskoðandi hjá KPMG fór yfir og kynnti ársreikning Sveitarfélagsins Skagafjarðar á sérstökum fundi, sem haldinn  var þann 26. apríl s.l., með sveitarstjórn.
Til máls tók Sigurjón Þórðarson sem lagði fram svohljóðandi bókun:
Niðurstaða reikninga sýna að áætlangerð meirihluta Vg og Framsóknarflokks hefur því miður brugðist en niðurstaðan er talsvert lakari en fjárhagsáætlanir gerðu ráð fyrir. Það sem af er þessu ári hefur verðbólgan verið vaxandi og þar af leiðandi hækkað verðbóta og vaxtakostnað sveitarfélagsins eins og sjá má í rekstraryfirliti . Reikningarnir bera það með sér að það eina rétta í stöðunni sé staldra við og endurmeta núverandi rekstraráætlanir en forsendur þeirra eru augljóslega brostnar. Það er í raun galið að ætla að fara í stórframkvæmdir fyrr en að jafnvægi hefur náðst í rekstrinum en óbreytt stefna kemur sveitarfélaginu í mikla skuldakreppu.
Næst tók til máls Jón Magnússon og óskar bókað:
Ársreikningur Sveitarfélagsins Skagafjarðar sýnir glöggt að varnarorð Sjálfstæðismanna allt frá upphafi yfirstandandi kjörtímabils hafa átt við rök að styðjast. Rekstrarniðurstaðan árið 2011 er ein sú dapurlegasta sem fram hefur komið um árabil. Meirihluta Framsóknarmanna og VG hefur algerlega mistekist að ná tökum á rekstri sveitarfélagsins. Íbúar Skagafjarðar munu þurfa að greiða fyrir óráðsíu þessa meirihluta á komandi árum með skertri þjónustu og vaxandi skuldum. Fyrirætlanir um aðhald í rekstri eru aðeins orðin tóm og heldur léttvæg í þurra sjóði sveitarfélagsins. Sjálfstæðismenn lýsa enn á ný miklum efasemdum um getu núverandi meirihluta til að ná tökum á rekstri Sveitarfélagsins Skagafjarðar.

Vinnumálastofnun styður Skagafjörð um 5 sumarstörf

Vinnumálastofnun hefur tilkynnt að Sveitarfélagið Skagafjörður hafi fengið úthlutað stuðningi fyrir 5 störfum í sumar, til að styðja við sumarráðningar námsmanna og atvinnuleitenda sem er sami fjöldi og árið 2011.  Sveitarfélagið Skagafjörður sótti um 20 störf.

Byggðarráð Skagafjarðar hefur lýst vonbrigðum með niðurstöðuna þar sem Skagafjörður nýtur ekki þeirrar fjölgunar frá fyrra ári, sem auglýst var af hálfu Vinnumálastofnunar.

Drangey réð ekki við KF

Knattspyrnufélag Fjallabyggðar og Drangey frá Skagafirði léku í Bikarkeppni KSÍ í Boganum á Akureyri í dag. KF vann stórsigur á Drangey, og urðu lokatölur 5-1.

KF komst í 5-0 en Drangey náði að minnka muninn í 5-1. Arnór Hallsson skoraði tvö fyrstu mörkin fyrir KF, Sigurjón Sigurðsson skoraði það þriðja, og Sigurbjörn Hafþórsson skoraði svo tvö síðustu mörkin fyrir KF.  Mark Drangeyjar gerði Hilmar Kárason.

Ferðamönnum fjölgaði um 20,4% á fyrsta ársþriðjungi

Um 37 þúsund erlendir ferðamenn fóru frá landinu um Leifsstöð í nýliðnum aprílmánuði eða um fimm þúsund fleiri
en í apríl 2011.

Aukningin 16,5% milli ára
Ferðamenn nú í apríl voru 16,5% fleiri en í apríl í fyrra en á því ellefu ára tímabili sem Ferðamálastofa hefur talið ferðamenn í Leifsstöð hefur aukningin verið að jafnaði 8,2% milli ára í mánuðinum, eins og sjá má í töflunni hér til hliðar.

81% ferðamanna af tíu þjóðernum
Af einstaka þjóðernum voru flestir ferðamenn í apríl frá Bretlandi eða 22,4% af heildarfjölda. Næstfjölmennastir voru Bandaríkjamenn, 11,8% og Norðmenn, 10,3%. Síðan komu Danir (7,6%), Svíar (7,0%), Þjóðverjar (6,8%), Frakkar (5,9%), Kanadamenn (3,4%), Hollendingar (3,1%) og Finnar (2,9%). Samtals voru þessar tíu þjóðir 81,2% af heildarfjölda ferðamanna í apríl.

Norður-Ameríkubúar og Bretar báru uppi fjölgun í apríl
Ef litið er til einstakra markaðssvæða má sjá verulega fjölgun Norður-Ameríkubúa og Breta frá því í apríl í fyrra. Þannig fjölgaði Norður-Ameríkubúum um 33,7% og Bretum um 25,5%. Norðurlandabúum fjölgaði nokkuð eða um 10,4% og sama má segja um Breta sem fjölgaði um 7,1%. Ferðamönnum frá löndum sem flokkuð eru undir annað fjölgaði um 13,8% milli ára.

Ferðamönnum hefur fjölgað um 20,4% frá áramótum
Frá áramótum hafa 125.333 erlendir ferðamenn farið frá landinu sem er 20,4% aukning frá árinu áður. Tæplega helmingsaukning (45,9%) hefur verið í brottförum Breta, ríflega fjórðungsaukning (27,7%) í brottförum N-Ameríkana og um fimmtungsaukning (21,8%) frá löndum sem flokkast undir ,,Annað”. Brottförum Norðurlandabúa hefur fjölgað um 8,0% en fjöldi Mið- og S-Evrópubúa hefur hins vegar staðið í stað.

Utanferðir Íslendinga
Svipaður fjöldi Íslendinga fór utan í nýliðnum apríl og í fyrra eða um 29 þúsund. Frá áramótum hafa 100 þúsund Íslendingar farið utan, sex þúsund fleiri en árið 2012. Aukningin nemur 6,4% milli ára.
Talningar Ferðamálastofu ná yfir allar brottfarir frá landinu um Leifsstöð.

Lausar stöður hjá Húnaþingi vestra í sumar

Flokkstjóri í Vinnuskóla
Í starfinu felst skipulagning og stýring á vinnuhópum unglinga á aldrinum 13 til 16 ára við ýmis garðyrkjustörf o.fl. einnig leiðsögn, hópefli og hvatning til góðra verka. Hæfniskröfur: Æskilegur aldur 20 ár eða eldri, menntun og reynsla í störfum tengdum ungu fólki.
Mikilvægt er að umsækjendur séu stundvísir, samviskusamir og góðar fyrirmyndir unglingana. Hafi góða þjónustulund og hæfni í mannlegum samskiptum.

Almenn verkamannastörf í Áhaldahúsi:
Meðal starfa eru  ýmis viðhaldsverkefni á vegum sveitarfélagsins, s.s veitur og fl. Reynsla og hæfniskröfur: Umsækjendur skulu vera fæddir 1994 eða fyrr og nauðsynlegt er að þeir hafi bílpróf og dráttarvélapróf, reynsla af sambærilegu starfi er kostur, Samviskusemi og stundvísi.

Vegna þessara starfa skal skila inn Skriflegri umsókn til skrifstofu Húnaþings vestra fyrir 9. maí næstkomandi. Í umsókninni þarf að koma fram; Almennar upplýsingar, menntun, fyrri störf og annað sem umsækjandi telur viðeigandi. Frekari upplýsingar og upplýsingar um launakjör eru veittar á skrifstofu Húnaþings vestra í síma 455-2400

Styrkir til rannsókna á sviði ferðamála

Rannsóknamiðstöð ferðamála (RMF) er starfrækt af Háskóla Íslands, Háskólanum á Akureyri, Háskólanum að Hólum, Samtökum ferðaþjónustunnar og Ferðamálastofu. RMF auglýsir eftir umsóknum um styrki til rannsókna á sviði ferðamála, en styrkjunum er fyrst og fremst ætlað að standa undir launakostnaði. Styrkirnir verða veittir kennurum eða starfsfólki þeirra skóla sem standa að RMF og geta numið allt að 5 milljónum króna á ári í allt að þrjú ár.
Umsókn með stuttri lýsingu á rannsóknaverkefninu (3-5 bls. 1.500 orð að hámarki) skal m.a. taka á eftirfarandi atriðum:

  •  Stutt lýsing á aðalatriðum rannsóknaverkefnisins (útdráttur með titli).
  •  Hvernig tengist rannsóknarverkefnið einu, eða fleirum, af þremur áherslusviðum RMF, svonefndum rannsóknaáætlunum, en um þau má lesa á heimasíðu RMF (www.rmf.is) undir: Rannsóknir.
  •  Hvernig tengist rannsóknarverkefnið forgangsröðun verkefna RMF og niðurstöðu stefnumótunarvinnu um rannsóknir í ferðamálum sem mótuð var á hótel Reykjavík Natura dagana 10.-11. febrúar 2012, en um stefnuna er nánar fjallað á heimasíðu RMF (www.rmf.is) undir: Stefnumótun.
  •  Hvert er hagnýtt gildi rannsóknarverkefnisins og hvernig mun það nýtast ferðaþjónustunni, fræðasamfélaginu, stjórnvöldum eða öðrum hagsmunaaðilum?
  •  Er um að ræða beint samstarf við aðila í ferðaþjónustu eða aðra hagsmunaaðila? Hverja þá?
  •  Upplýsingar um aðra fjármögnun rannsóknaverkefnisins.
  •  Ef rannsóknaverkefnið felur í sér þátttöku framhaldsnema (meistara- eða doktorsnema) skal gera grein fyrir hlutverki þeirra í verkefninu og hag þeirra af því.
  •  Tímaáætlun (GANT rit) með skilgreindum áföngum.
  •  Kostnaðaráætlun.

Rannsóknaverkefnið skal hefjast eigi síðar en haustið 2012 og ljúka eigi síðar en í lok árs 2014 og skila skal skýrslu eftir hvern áfanga. Þar sem við á verður ákvörðun um framhald styrks tekin árlega á grundvelli framvindu. Styrkurinn verður greiddur við hver skil áfangaskýrslu og í lok verkefnis.
Skilafrestur er til 15. maí 2012 og umsóknum skal skila rafrænt til forstöðumanns RMF; Edward H. Huijbens (edward@unak.is). Stjórn RMF mun taka ákvörðun um hvaða verkefni verða styrkt fyrir 15. júní. Öllum umsóknum verður svarað. Stjórnin áskilur sér rétt til að hafna öllum umsóknum.

6400 gistinætur á Norðurlandi í mars

Samkvæmt frétt frá Hagstofu Íslands voru gistinætur á hótelum í mars 134.000 samanborið við 97.300 í mars 2011. Gistinætur erlendra gesta voru um 77% af heildarfjölda gistinátta í mars en gistinóttum þeirra fjölgaði um 45% samanborið við mars 2011. Á sama tíma fjölgaði gistinóttum Íslendinga um ríflega 17%. Athygli er vakin á að hér er aðeins átt við gistinætur á hótelum sem opin eru allt árið en til þess flokks gistististaða teljast hvorki gistiheimili né hótel sem eingöngu eru opin yfir sumartímann.

Gistinóttum á hótelum fjölgaði í öllum landshlutum, á höfuðborgarsvæðinu voru ríflega 104.300 gistinætur í mars sem er fjölgun um tæp 40% frá fyrra ári. Gistinætur á Suðurlandi voru 13.100 og fjölgaði um 42%. Á Norðurlandi voru tæplega 6.400 gistinætur á hótelum í mars sem er um 25% aukning samanborið við mars 2011. Gistinætur á Suðurnesjum voru um 5.100 sem jafngildir ríflega 15% aukningu frá fyrra ári. Á samanlögðu svæði Vesturlands og Vestfjarða voru gistinætur á hótelum 3.100 í mars og fjölgaði um 61%. Á Austurlandi fjölgaði gistinóttum um 5%, voru 2.050 samanborið við 1.950 í mars 2011.

Á fyrsta ársfjórðungi ársins 2012 fjölgaði gistinóttum um tæp 34%. Gistinætur á hótelum í janúar, febrúar og mars samanlögðum voru 309.300 en voru 230.800 fyrir sama tímabil árið 2011. Gistinóttum erlendra gesta hefur fjölgað um 39% samanborið við fyrsta ársfjórðung árið 2011 á meðan gistinóttum Íslendinga hefur fjölgað um 18%.

Frjálsíþróttaskóli UMFÍ á Sauðárkróki 11 til 15 júní 2012

Skráning hafin í Frjálsíþróttaskólann sem haldinn verður á Sauðárkróki 11-15. júní.
Frjálsíþróttaskóli UMFÍ verður starfræktur í fimmta sinn í sumar og verður skólinn á fimm stöðum víðs vegar um landið. Námskeiðin verða á Laugum í Reykjadal, Egilsstöðum, Sauðárkróki, Borgarnesi og á Selfossi.

Frjálsíþróttaskólinn er ætlaður ungmennum á aldrinum 11 – 18 ára. Ungmennin koma saman á hádegi á mánudegi en skólanum lýkur á hádegi á föstudegi í sömu viku. Aðaláhersla er lögð á kennslu í frjálsum íþróttum.

Auk frjálsra íþrótta er farið í sund, leiki, óvissuferðir og haldnar kvöldvökur. Ungmennin borga þáttökugjald en innifalið í því er kennsla, fæði og gisting.

Allar nánari upplýsingar og skráning fer fram á heimasíðu skólans /umfi09/veftre/verkefni/ithrottir/frjalsithrottaskoli/frjalsithrottaskoli_umfi_2012/

Opið hestaíþróttamót á Sauðárkróki

Opið hestaíþróttamót (UMSS) verður haldið á Sauðárkróki 5.-6. maí. Keppt verður í hefðbundnum hesta íþróttagreinum ásamt létt tölt T7 (hægt, snúa við, svo frjáls ferð) og létt fjórgang V5 (beðið um frjáls ferð á tölti, hitt er eins) ef næg þátttaka næst (sbr. FIPO – www.feif.org og http://lhhestar.is/is/page/fipo-leidari-2007-islenska).

      Fjórgangur V1, tölt T1 og T2 og fimmgangur F1- fullorðnir – einn inná í einu.
      Fjórgangur V2,  tölt T3, fimmgangur F2 – yngra flokkar – 2-3 inná í einu.

 

Næstu mót eru:

OPIÐ Forkeppnismót – sunnudagur 3. júní – bara forkeppni
Greinar:
1.       5 gangur (F1)
2.       Tölt (T1)
3.       gæðingaskeið
4.       skeiðkappreiðar, 150m. og 250m.
5.       100 m skeið

OPIÐ Kvöldmót – föstudagur 8. júní – bara forkeppni
Greinar:
1.       4 gangur (V1)
2.       Slakataumatölt (T2)
3.       skeiðkappreiðar 150m. og 250m.
4.       100 m skeið

Mótin eru öll (3) viðurkennt sem punktamót fyrir Íslandsmót og T1 á LM.

Vortónleikar Tónlistarskóla Skagafjarðar og innritun

Tónlistarskóli Skagafjarðar býður til tónleikaveislu í Sæluvikunni, þar sem nemendur koma fram á öllum aldri  í stórum sem smáum hópum á eftirtöldum stöðum:

 

 Á Sauðárkróki:

 

  • Sunnudaginn 6. maí
  • Tónlistarskólinn kl.14:00
  • Frímúrarasalurinn kl.15:30  og  kl.17:00 (Lengra komnir nemendur)
  • Mánudaginn 7. maí. Tónlistarskólinn kl.17:00

Innritun fyrir næsta skólaár hófst 1. maí og stendur til 18. maí

Hægt er að skrá í gegnum íbúagátt sveitafélagsins eða  fá umsóknareyðublöð í tónlistarskólunum. Frekari upplýsinga veitir skólastjóri í síma 453-5790.

Ljósmyndavefur Skagfirðinga hefur opnað

Nú hefur Ljósmyndavefur Skagfirðinga opnað. Ríflega 10.000 myndir eru þar frá Héraðsskjalasafni Skagfirðinga.

Á vefnum er hægt að leita í þremur söfnum sem þar eru varðveitt. Safni Héraðssskjalasafns Skagfirðinga, safni Söguseturs íslenska hestsins og safni Sveitarfélagsins Skagafjarðar.

Hægt er að fara inn á vefinn á þessari slóð

www.skagafjordur.is/myndir

Góða skemmtun.

Sauðárkrókur.is

Tónleikar í Blönduóskirkju á laugardaginn

Vörðukórinn heldur tónleika í Blönduóskirkju klukkan 17, laugardaginn 5. maí næstkomandi. Vorið og vorkoman er að þessu sinni viðfangsefni Vörðukórsins. Fjölbreytt tónlist, íslensk og erlend.

Vörðukórinn er skipaður söngfólki af Suðurlandi, aðallega úr uppsveitum Árnessýslu. Kórinn hefur starfað af krafti frá stofnun árið 1995 og hefur gegnum árin flutt fjölbreytta tónlist við ýmis tækifæri.

Stjórnandi er Eyrún Jónasdóttir.

Kormákur/Hvöt áfram í bikarkeppni KSÍ

Þann 1. maí léku Kormákur/Hvöt gegn Hömrunum á Hvammstangavelli. Þetta var fyrsti leikur þessa sumarsins og var hann í forkeppni bikarkeppni KSÍ.

Sameiginlegt lið Kormáks og Hvatar fengu mörg marktækifæri og voru lokatölur 1-0 Kormáki/Hvöt í vil. Það var hann Sveinbjörn Guðlaugsson sem skoraði á 48. mínútu eftir stoðsendingu frá Herði Gylfasyni. Lið Kormáks/Hvatar leikur ekki í deildakeppni í ár, en tekur þátt í bikarkeppninni.

Lið Kormáks/Hvatar er því komið í gegnum forkeppni bikarkeppni KSÍ og er næsti leikur við Magna frá Grenivík. Sá leikur fer fram á Grenivíkurvelli sunnudaginn 6. maí n.k. kl. 14:00.

Uppskeruhátíð yngri flokka í körfuboltadeild Tindastóls

Unglingaráð Tindastóls heldur uppskeruhátíð fyrir yngri flokkana í körfubolta í íþróttahúsinu þriðjudaginn 8. maí, kl. 16-18.

Á uppskeruhátíðinni verða veittar viðurkenningar fyrir tímabilið í þeim flokkum sem tóku þátt í Íslandsmóti en yngri iðkendur fá sérstakar þátttökuviðurkenningar.

Eitthvað verður gómsætt af grillinu og hvetur unglingaráð alla iðkendur og foreldra til að fjölmenna í íþróttahúsið á Sauðárkróki.

Sæluviku líkur á sunnudaginn

Sæluvika, lista- og menningarhátíð í Skagafirði, var sett sl. sunnudaginn í íþróttahúsinu á Sauðárkróki þar sem jafnframt fór fram glæsileg atvinnulífssýning. Stendur Sæluvikan til sunnudagsins 6. maí.

Sæluvika Skagfirðinga er ein elsta menningarhátíð landsins en upphaf hennar má rekja til ársins 1874 þegar svokallaðir sýslufundir hófust en skemmtanir voru jafnan haldnir í tengslum við þessa fundi og tóku þær smám saman á sig þá mynd sem Sæluvikan er í dag.

Í Sæluviku 2012 er að finna fjölmarga lista- og menningarviðburði, s.s. tónlistarveislur, myndlistasýningar, galakvöld, útgáfutónleika, kirkjukvöld, ljósmyndasýningar, leiksýningar, körfuboltamót, hestasýningar og fjölmargt fleira. Sælan hófst reyndar þegar sl. miðvikudag en í svokallaðri Forsælu, dagana í aðdraganda Sæluviku, er jafnan mikið um að vera í menningarlífinu í Skagafirði.

Nokkrir menningarviðburðir verða í Skagafirði næstu daga.  Má þar nefna Sönglög í Sæluviku – sönglagahátíð í Menningarhúsinu Miðgarði, málverkasýningu Tolla og Sossu, sýningu Leikfélags Sauðárkróks á verkinu Tveir tvöfaldir, tónleika Draumaradda norðursins, opnun ljósmyndavefs Skagafjarðar, tónleika með Multi Musica hópnum þar sem flutt verða lög þekktra söngkvenna frá seinni heimsstyrjöldinni, kóramót í Miðgarði, listasmiðju í Litla-skógi og fjölmargt fleira.

Allir, ungir sem aldnir, eiga því að geta fundið eitthvað við sitt hæfi í Sæluviku Skagfirðinga. Nánari upplýsingar um alla viðburðina má finna á www.saeluvika.is

Nubo fær Grímsstaði á fjöllum á leigu

Huang Nubo fær Grímstaði á Fjöllum á leigu til 40 ára samkvæmt samningi sem lagður verður fyrir ríkisstjórn á morgun. Sveitarfélög á Norður og austurlandi kaupa jörðina. Þetta kom fram í kvöldfréttum RÚV.

Atvinnuþróunarfélögin í Eyjafirði og Þingeyjarsýslu hafa skilað útfærslu á því með hvaða hætti sveitarfélög á Norður- og Austurlandi geti eignast land á Grímsstöðum á Fjöllum, í því skyni að leigja það kínverska fjárfestinum Huang Nubo.

Í frétt RÚV kom fram að það sé lagt til að sveitarfélögin stofni hlutafélag sem kaupi ríflega 70 prósenta hlut jarðarinnar. Lagt er til að íslenskt félag Huang Nubos leigi landið til 40 ára og greiði leigufé fyrirfram. Kaup sveitarfélaganna á landinu verði þannig fjármögnuð með fyrirframgreiddri leigu. Ekki er gert ráð fyrir skuldsetningu sveitarfélaganna vegna þessa.

Heimild: mbl.is

Öldungamótinu í blaki á Tröllaskaga er lokið

37. Öldungamóti BLÍ var slitið á Dalvík á mánudag eftir þriggja daga keppni. Alls voru 424 leikir spilaðir á 9 völlum á Dalvík, Ólafsfirði og á Siglufirði. HK heldur keppnina að ári í Kórnum í Kópavogi.

Það var margt um manninn norðan heiða um liðna helgi þegar Öldungamót BLÍ fór fram á Tröllaskaganum. Í kvennaflokki var spilað í 13 deildum og í karlaflokki 6 deildum, þar af í einni Ljúflingadeild (50 ára og eldri). Öðlingalið (40 ára og eldri) spiluðu inni í deildum en var veitt sérstök verðlaun til meistara í þeim flokki.

Deildakeppnin var hörð milli liðanna og litu óvænt úrslit dagsins ljós eins og svo oft áður. Í efstu deild karla varði lið Massablak titil sinn frá því í fyrra og í kvennaflokki vann HK Utd.1 sinn fyrsta titil í efstu deild en liðið vann lið HK í úrslitaleik um titilinn 2-1.

Eitt lið fellur úr 1. deildinni og deildarmeistarar 2. deildar fara upp. Á milli annarra deilda í mótinu falla tvö lið og tvö lið fara upp.

Deildameistarar í Öldungamóti BLÍ – Trölli 2012 voru:
1. deild karla:  Massablak
1. deild kvenna: HK Utd.1
2. deild karla: Snörtur
2. deild kvenna: Stjarnan A
3. deild karla: Höttur
3. deild kvenna: Bresi A
4. deild karla: Steinunn Gamla
4. deild kvenna: Stjarnan B
5. deild karla: Fylkir/Verkís
5. deild kvenna: Skellur
6. deild karla eru Ljúflingameistarar: Óðinn/Skautar
6. deild kvenna: ÍK B
7. deild kvenna: Þróttur R 2
8. deild kvenna: HK Wunderblak A
9. deild kvenna: Rimar B
10. deild kvenna: Skutlur A
11. deild kvenna: Laugdælur 2
12. deild kvenna: Súlur 3
13. deild kvenna: Krækjur C
Öðlingameistarar kvenna: KA-Freyjur C
Öðlingameistarar karla: ÍBV

Öll úrslit í mótinu má finna á mótavefnum www.blak.is

Á lokahófi mótsins, sem haldið var á Siglufirði á mánudagskvöld var tilkynnt um að HK yrði mótshaldari fyrir árið 2013. Öldungamót BLÍ verður því haldið í Kórnum í Kópavogi, sbr. umsókn félagsins sem má finna á heimasíðu Trölla2012 (sjá hlekk hér hægra megin efst). Þar má einnig finna myndir frá mótinu og fleira skemmtilegt.

Sumarstarfsmaður óskast á Hafíssetrið

Blönduósbær óskar eftir að ráða sumarstarfsmann í starf við Hafíssetrið frá 1. júní til 31.
ágúst 2012. Um er að ræða vinnu á opnunartímum Hafíssetursins, frá kl. 11 – 17 alla daga
og aðra hverja helgi.

Umsóknarfrestur er til 15. maí.

Nánari upplýsingar um starfið veitir Katharina A. Schneider, forstöðumaður Hafíssetursins í
síma 8999271.

Óskað er eftir tilboðum í jarðvegsskipti á lóð Kvennaskólans á Blönduósi

Stoð, verkfræðistofa, f.h. Byggðasamlag um atvinnu og menningarmál í A-Húnavatnssýslu
óskar eftir tilboðum í jarðvegsskipti á lóð Kvennaskólans á Blönduósi.

Helstu magntölur eru:

1.1.    Gröftur á burðarhæfu efni, endurnýtt í fyllingu           750 mᶟ
1.2.    Gröftur á óburðarhæfu efni, flutt á losunarstað       1.325 mᶟ
1.3.    Fylling með burðarhæfu efni úr námu                             590 mᶟ

Útboðsgögn fást afhent á bæjarskrifstofu Blönduósbæjar. Tilboðum skal skila þann 7. maí
2012 kl. 13:00 á bæjarskrifstofunni á Blönduósi og verða opnuð að viðstöddum þeim sem
þess óska.

Verkefnastyrkir frá Menningarráði Norðurlands vestra

Menningarráð Norðurlands vestra úthlutaði verkefnastyrkjum í apríl til 68 aðila, alls að upphæð 23.900.000 kr. Umsóknarfrestur fyrir árið 2012 rann út 15. mars. Alls bárust 108 umsóknir þar sem óskað var eftir rúmum 66 milljónum króna.

 

Þeir sem hluti styrki voru:

 

1.500.000 kr.

  • Byggðasaga Skagafjarðar – Byggðasaga Skagafjarðar 7. bindi

 

1.200.000 kr.          

  • Þjóðleikur á Norðurlandi vestra – Þjóðleikur – leiklistarhátíð ungs fólks

 

1.000.000 kr.

  • Söfn og setur á Norðurlandi vestra – Söguleg safnahelgi 2012
  • Akrahreppur – Akrahreppur við upphaf nýrrar aldar – heimildarmynd
  • Lafleur útgáfan – Sundið – heimildarmynd
  • Laxasetur Íslands – Hönnun og uppsetning sýningar

 

900.000 kr.  

  • Fornleifadeild BSK og Byggðasaga Skagafjarðar. Tvö verkefni: Málmey – rannsókn á byggðaleifum og  Gagnagrunnur um eyðibyggð í Skagafirði.
  • Leikfélag Sauðárkróks. Þrjú verkefni: Gamanleikritið Tveir tvöfaldir, Barnaleikrit og Ritun leikverks fyrir Sæluviku 2013

 

600.000 kr.

  • Eldur í Húnaþingi – Eldur í Húnaþingi 2012
  • Raggmann ehf. – Tónlistarhátíðin Gæran 2012
  • Grettistak ses. Tvö verkefni: Grettishátíð 2012 og Barn i Vikingtid – norrænt samstarf um sameiginlegan menningararf.

 

500.000 kr.  

  • Selasetur Íslands – Samstarf Selaseturs Íslands og Hvalasafnsins á Húsavík
  • Blöndubyggð ehf – Eyvindarhellir – sögumiðlun og leiksýning
  • Karlakórinn Heimir og sms film ehf „Bestir í Heimi“ – Karlakórinn Heimir 85 ára – heimildarmynd.
  • Menningarhúsið Miðgarður – Skagfirskir tónar í Menningarhúsinu Miðgarði
  • Nes listamiðstöð – Dvalar- og verkefnisstyrkir

 

400.000 kr.  

  • Leikfélag Hofsóss – Enginn með Steindóri – leiksýning
  • Guðbrandsstofnun á Hólum – Sumartónleikar á Hólum 2012
  • Karlakórinn Heimir – Tónleikaröð 2012 og Þrettándatónleikar 2013
  • Ólafur Þ. Hallgrímsson. Tvö verkefni: Útgáfa smásagnasafns Guðmundar L. Friðfinnssonar  og  Vorvaka í Húnaveri.

 

350.000 kr.

  • Bændasjóður Bólstaðarhlíðarhrepps – Hlíðhreppingar – Ábúendatal Bólstaðarhlíðarhrepps

300.000 kr.

  • Kvennaband Vestur-Húnavatnssýslu – Kvennaband V-Hún. – 90 ára afmælisrit
  • Sigurður Hansen – Haugsnesbardagi – leiðsögubæklingur
  • Heimilisiðnaðarsafnið á Blönduósi. Tvö verkefni: Sumarsýning 2012 og Þjóðbúningasýning á Húnavöku.
  • Ungmennasamband A-Hún. – Útgáfa Húnavökuritsins á 100 ára afmæli USAH
  • Verslunarminjasafnið Hvammstanga og Byggðasafn Húnvetninga og Strandam. Stemning í Krambúð.
  • Lárus Ægir Guðmundsson – Saga Spákonufellskirkju og kirkjugarðs 1300-2012
  • Töfrakonur / Magic Women ehf. Tvö verkefni: Ævintýri tvíb. á Spáni og Nokkur lauf að norðan III.
  • Stefán R Gíslason og Einar Þorvaldsson – Sönglög á Sæluviku – tónleikar
  • Karlakórinn Lóuþrælar – Tónleikaröð 2012

 

250.000 kr.  

  • Sögusetur íslenska hestsins – County of origin – Íslenska hestatorgið á Landsmóti hestamanna 2012.
  • Handtak – Drangeyjarferðir – Fjölskyldan í fjörunni og Rökkurstund að Reykjum – bl. dagskrá.
  • Jón Hilmarsson – Ljós og náttúra Norðurlands vestra – ljósmyndabók
  • Húnaþing vestra – Gamlar ljósmyndir með sögulegum texta á útisvæði
  • Contalgen Funeral – Pretty Red Dress – geisladiskur
  • Barokksmiðja Hólastiftis – Barokkhátíð á Hólum 2012
  • Blönduósbær – Tónar, list og sögur á Húnavöku 2012
  • Fornverkaskólinn – Alþjóðlegt námskeið í torfhleðslu

 

200.000 kr.  

  • Skagabyggð – Leiðsögubæklingur um Kálfshamarsvík
  • Sönghópur Félags eldri borgara í Skagafirði – Tónleikaröð 2012-2013
  • Stefán Friðrik Stefánsson og Sigfús Arnar Benediktsson – Fúsi fer á flakk
  • Rósmundur Ingvarsson – Örnefnaskráning í Skagafirði – Sléttuhlíð
  • Byggðasafn Skagfirðinga – Smíði kljásteinavefstóls
  • Multi Musica – Það er draumur að vera með dáta – tónleikar
  • Kirkjukórar í A- og V-Hún. – Menningardagskrá í tali og tónum
  • Skagfirski kammerkórinn – Söngur allt árið – tónleikaröð
  • Félag harmonikuunnenda í Skagafirði – Manstu gamla daga 3 – bl. dagskrá
  • Vinir Kvennaskólans o.fl. – Hátíðardagskrá í tilefni af 100 ára afmæli Kvennaskólahússins
  • Jónsmessunefnd Hofsósi – Jónsmessuhátíð  2012

 

150.000 kr.

  • Gunnar Halldórsson – Sú fagra sveit – barnabók
  • Kvennakórinn Sóldís – Tónleikar á Konudegi 2013
  • Erla Gígja Þorvaldsdóttir og Hulda Jónasdóttir – Vornótt – geisladiskur með lögum Erlu Gígju Þorvaldsdóttur
  • Héraðsbókasafn Skagfirðinga – Gyrðisvaka – dagskrá til heiðurs Gyrði Elíassyni
  • Alexandra Chernyshova – Jól í Kallafjöllum – bl. dagskrá
  • Á Sturlungaslóð – Sögudagur á Sturlungaslóð 2012
  • Textílsetur Íslands – Dvalar- og verkefnastyrkir til lista- og fræðimanna

100.000 kr.  

  • Héraðsskjalasafn Skagfirðinga – Ljósmyndavefur Skagfirðinga – málþing og opnun vefs
  • Ríkíní, félag um forna tónlist – Fjórða þing Ríkíní á Hólum 2012
  • Menningarfélagið Spákonuarfur – Margt býr í myrkrinu
  • Gísli Þór Ólafsson – Bláar raddir – geisladiskur
  • Sigurður Helgi Oddsson – Uppáhaldslögin okkar – tónleikar
  • Árni Geir Ingvarsson – Mannlíf á Skagaströnd  – ljósmyndasýning
  • Jón Hilmarsson og Arnar Ólafur Viggósson – Náttúra og landslag Norðurlands vestra – ljósmyndasýning
  • Pétur Jónsson – Selskap – ljósmyndasýning
  • Húsfreyjur á Vatnsnesi – Örnefnaskilti við Hamarsrétt
  • Álfaklettur ehf – Culture tasting in Skagafjörður – viðburðir f. erl. ferðamenn
  • Ferðaþjónustan Hólum – Í fótspor Guðmundar góða – gönguferðir með leiðsögn

·         Landnám Ingimundar gamla – Námskeið um tvísöng og kvæðahefðina í Vatnsdal

Menningarstyrkir til Háskólans á Hólum og tengdra aðila

Menningarráð Norðurlands vestra úthlutaði nýlega verkefnastyrkjum fyrir árið 2012. Háskólinn  á Hólum eða aðilar tengdir honum eru skrifaðir fyrir nokkrum þessara verkefna:

Guðbrandsstofnun – kr. 400.000 vegna Sumartónleika á Hólum 2012.
Sögusetur íslenska hestsins – kr. 250.000, m.a. til þátttöku í Íslenska hestatorginu á Landsmóti 2012.
Barokksmiðja Hólastiftis – kr. 250.000 til Barokkhátíðar á Hólum 2012.
Fornverkaskólinn – kr. 250.000 vegna alþjóðlegs torfhleðslunámskeiðs
Ferðaþjónustan á Hólum – kr. 100.000 í gönguferðirnar Í fótspor Guðmundar góða.

Ljósmyndavefur Skagafjarðar opnar 2. maí

Nú styttist í að ljósmyndavefur Skagafjarðar opni en miðvikudagskvöldið 2. maí kl. 20:00 verður opnunarhátíð í Bóknámshúsi Fjölbrautaskóla Norðurlands vestra. Á vefnum verða í upphafi um 9000 ljósmyndir frá Héraðsskjalasafni Skagfirðinga gerðar aðgengilegar, en þeim mun síðan fjölga smátt og smátt.

Allir eru velkomnir á opnunarhátíð vefsins en þar munu meðal annars verða fjallað um gamlar myndir frá ýmsum hliðum.

Sæluvikan, dagskráin 2. maí

Dagskráin Sæluviku, 2. maí.

Talnaspeki :: SUNDLAUG SAUÐÁRKRÓKS
Benedikt Lafleur býður upp á talnagreiningu.

Nudd og dekur :: SUNDLAUG SAUÐÁRKRÓKS
Þorgerður Eva Þórhallsdóttir býður upp á nudd og dekur í vatni.

07-18.00 Hesturinn sem ferðafélagi og fararskjóti :: SAUÐÁRKRÓKSBAKARÍ
Ljósmyndasýning Guðbjargar Guðmundsdóttur.

7.45-11.00 Listahátíð barnanna eldra stig :: LEIKSKÓLINN ÁRSALIR v/árkíl

8.00-11.00 Listahátíð barnanna yngra stig :: LEIKSKÓLINN ÁRSALIR v/Víðigrund

9:15-16:00 Sölusýning á verkum notenda Iðju-Hæfingar :: LANDSBANKINN
Sýning í boði Landsbankans.

13-16.30 Listahátíð barnanna eldra stig :: LEIKSKÓLINN ÁRSALIR v/árkíl

13-17.00 Stefnumót á Krók :: SAFNAHÚSIÐ
Myndlistarsýning Sossu og Tolla er opin í Safnahúsinu frá kl. 13–17 alla daga.

14-16.00 Listahátíð barnanna yngra stig :: LEIKSKÓLINN ÁRSALIR v/Víðigrund
16-18.00 Opið hús :: GISTIHEIMILIÐ MIKLIGARÐUR

16-19.00 Litbrigði samfélags :: GÚTTÓ, SAUÐÁRKRÓKI
Samsýning listamanna í Myndlistarfélaginu Sólon úr Skagafirði og nágrenni.

20.00 Opnun Ljósmyndavefs Skagafjarðar
:: Á SAL BÓKNÁMSHÚSS FNV
Dagskrá í tilefni af opnun Ljósmyndavefs Skagafjarðar.

20.30 Hringferð með harmonikuna :: HOFSÓSSKIRKJA
Jón Þorsteinn Reynisson hefur tónleikahringferð um landið á Hofsósi.

Sæluvikan 2012 er hafin í Skagafirði

Sæluvikan í Skagafirði er hafin. Dagskráin er fjölbreytt að vanda. Hægt er að sjá alla dagskránna í bæklingi hérna fyrir alla dagana.

Dagskráin í dag 1. maí.

Talnaspeki :: SUNDLAUG SAUÐÁRKRÓKS
Benedikt Lafleur býður upp á talnagreiningu.

Nudd og dekur :: SUNDLAUG SAUÐÁRKRÓKS
Þorgerður Eva Þórhallsdóttir býður upp á nudd og dekur í vatni.

13-16.00 Opinn dagur hjá Skotfélaginu Ósmann :: SKOTSVÆÐI ÓSMANNS Á REYKJASTRÖND
13-17.00 Stefnumót á Krók

:: SAFNAHÚSIÐ
Myndlistarsýning Sossu og Tolla er opin í Safnahúsinu frá kl. 13–17 alla daga.
14.00 Vortónleikar Tónlistarskóla Skagafjarðar

:: MENNINGARHÚSIÐ MIÐGARÐUR
Almennir tónleikar kl. 14:00 og 14:30.
o15.00 Hátíðarhöld 1. maí

:: BÓKNÁMSHÚS FNV
Stéttarfélögin í Skagafirði bjóða félagsmönnum sínum
til hátíðardagskrár í tilefni dagsins.
16-19.00

Litbrigði samfélags :: GÚTTÓ, SAUÐÁRKRÓKUR
Samsýning listamanna í Myndlistarfélaginu Sólon úr Skagafirði og nágrenni.
16-18.00

Opið hús :: GISTIHEIMILIÐ MIKLIGARÐUR
17.00 Vortónleikar Tónlistarskóla Skagafjarðar

:: MENNINGARHÚSIÐ MIÐGARÐUR Tónleikar strengjadeildar.
20.30 Tveir tvöfaldir :: BIFRÖST
Leikfélag Sauðárkróks sýnir leikrit eftir Ray Cooney. Leikstjóri: Ingrid Jónsdóttir.
Miðapantanir í síma 849 9434.

Eyfirski safnadagurinn verður haldinn 5. maí

Eyfirski safnadagurinn er haldinn árlega og í ár er þemað vinabæir. Safnadagurinn í ár verður haldinn laugardaginn 5. maí. Frítt er inn á fjölmörg söfn á Norðurlandi í tilefni dagsins. Vefsíðan sofn.is hefur að geyma fjölmörg söfn á landinu, og þar er hægt að skoða öll söfn á Norðurlandi.

Markmiðið með deginum er að vekja athygli á þeirri fjölbreyttu og áhugaverðu safnaflóru sem Eyjafjörður og Norðurland hefur upp á að bjóða. Söfnin munu þennan dag kynna starfssemi sína og bjóða uppá margt áhugavert þar má nefna listflug, ratleik, upplestur, leiðsögn, bátsferð, brauðbakstur á hlóðum og gamaldags leiki.

Tindastóll og Drangey léku æfingaleiki um helgina

Drangey spilaði æfingaleik gegn Magna frá Grenivík laugardaginn 28. apríl. Spilað var á Hofsósvelli. Skelfileg byrjun hjá Drangey þeim dýrkeypt,  og komst Magni í 3-0 á fyrstu 20.mín. Eftir þetta komust Drangey meira inn í leikinn og var það Hilmar Þór Kárason sem minnkaði muninn. Góð spilamennska var í liðinu á köflum, og var það síðan Ingvi Rafn Ingvarsson sem minnkaði muninn í 3-2. Það var síðan undir lokinn sem Magni komst í 4-2, og urðu það lokatölur leiksins. Fínir taktar oft á tíðum hjá Drangey og eiga þeir bara eftir að verða betri þegar líður nær sumri. Næsti leikur hjá strákunum er bikarleikur gegn KF, 6.maí á Ólafsfirði.

Tindastóll spilaði gegn Völsungi sunnudaginn 29. apríl á Hofsósvelli. Leikurinn var hin besta skemmtun en fullt af færum voru í leiknum, en mörkin létu á sér standa. Það mátti sjá á leikmönnum að þeir voru pínu ryðgaðir, enda orðið langt síðan spilað var úti, í íslenskri veðráttu og á grasi. Þegar menn fundu taktinn og byrjuðu að halda boltanum betur á grasinu, þá byrjaði að ganga betur. Tindastólsliðið var mun betra í þessum leik og fengu fullt af færum en skoruðu hinsvegar ekki fyrsta markið fyrr en á 70.mín. Þar var að verki Benjamin Everson eftir laglega sendingu frá Theodore Eugene Furness. 10.mín seinna komst Ingvi Hrannar upp vinstri kantinn og sendi fyrir markið, þar sem Ben var fyrstu á boltann og kláraði vel.

Leikfélag Sauðárkróks frumsýnir Tvo tvöfalda

Leikfélag Sauðárkróks frumsýnir Tveir tvöfaldir eftir Ray Cooney í þýðingu Árna Ibsen á opnunardegi Sæluvikunnar þann 29. apríl næstkomandi í Félagsheimilinu Bifröst á Sauðárkróki. Leikstjóri er Ingrid Jónsdóttir. Sýningin er styrkt af Menningarráði Norðurlands vestra.

Tveir tvöfaldir er dæmigerður farsi sem gerist á Hótel Höll, en þangað fer alþingismaðurinn Ormur Karlsson ásamt konu sinni Pálínu til að slaka á undir lok þingsins. Við bætist Hreinn, aðstoðarmaður Orms og æsast þá leikar töluvert og upphefst hinn klassíski farsi.

Leikfélag Sauðárkróks hefur áður sýnt leikrit eftir Ray Cooney, Með vífið í lúkunum, 2006 og Viltu finna milljón?, 2008, auk þess að frumflytja Ray Cooney á íslensku leiksviði árið 1978 er félagið setti upp leikritið Eltu mig, félagi.

Áætlaðar eru 8 sýningar sem hér segir:

 

  • Frumsýning sunnudaginn 29. apríl kl. 20:30
  • 2. sýning þriðjudaginn 1. maí kl. 20:30
  • 3. sýning fimmtudaginn 3. maí  kl. 20:30 uppselt
  • 4. sýning sunnudaginn 6. maí kl. 20:30
  • 5. sýning fimmtudaginn 10. maí kl. 20:30
  • 6. sýning miðnætursýning föstudaginn 11. maí kl. 23:00
  • 7. sýning laugardaginn 12. maí kl. 17:00
  • Lokasýning sunnudaginn 13. maí kl. 20:30

 

Miðasala er í anddyrinu í Bifröst, virka daga frá kl. 16-18 og 30. mínútum fyrir sýningu. Miðasölusími er: 849-9434

Bæjar- og menningarvefur