Sauðárkrókur verður með atriði á úrslitakeppni Samfés

Undankeppnin Samfés fyrir Norðurland var haldin í Menningarhúsinu Miðgarði í Varmahlíð sl. föstudag og voru þar um 620 unglingar sem skemmtu sér mjög vel. Það voru 13 atriði frá Norðurlandi sem tóku þátt, en nokkrir skólar urðu frá að hverfa vegna veðurs, en m.a. snéru rútur við sem komu frá Ólafsfirði og Siglufirði. Fimm laganna komast áfram í aðalkeppnina sem haldin verður  í Laugardalshöllinni í Reykjavík þann 3. mars.

Þau atriði sem komust áfram voru frá Sauðárkróki, Hrafnagili, Skagaströnd, Akureyri og Húsavík. Meðfylgjandi myndband er af atriði frá Sauðárkróki en þar eru Bergrún Sól Áskelsdóttir sem syngur, Sunna Líf Óskarsdóttir á píanó og Daníel Logi Þorsteinsson á gítar.

Úrslitaleikurinn í Norðurlandsmótinu um næstu helgi

Þór og KA leika til úrslita á Norðurlandsmótinu í knattspyrnu um helgina en bæði lið stóðu uppi sem sigurvegarar í sínum riðli. Þór vann Dalvík/Reyni 4-1 í A-riðli í lokaumferð mótsins sem fram fór í Boganum um helgina. Sigurður Kristjánsson, Ibra Jagne, Orri Freyr Hjaltalín og Jónas Sigurbergsson skoruðu mörk Þórs en Hilmar Daníelsson mark Dalvíkur/Reynis.

Í B-riðli hafði KA betur gegn KF, 5-3. Þeir Elmar Dan Sigþórsson, Guðmundur Steingrímsson, Jóhann Helgason, Hallgrímur Steingrímsson og Bjarki Baldvinsson skoruðu mörk KA í leiknum, en Þórður Birgisson skoraði öll þrjú mörk KF. Í A-riðli mættust einnig KA2 og Völsungur þar sem síðarnefnda liðið sigraði 2-0 með mörkum frá þeim Halldóri Heiðarssyni og Arnþóri Hermannssyni.

Úrslitaleikur Þórs og KA fer fram í Boganum á sunnudaginn kemur kl. 17:00 en Magni og Dalvík/Reynir mætast í leiknum um þriðja sætið kl. 19:00.

Sterna keyrir áfram til Sauðárkróks

Í morgun voru undirritaðir aksturssamningar á milli Samtaka sveitarfélaga á Vesturlandi, Norðurlandi Vestra, Eyþings og Fjórðungssambands Vestfirðinga og Bíla og fólks ehf./Sterna, um áframhaldandi akstur á leiðunum Reykjavík – Snæfellsnes, Reykjavík – Borgarnes – Búðardalur, Reykjavík – Sauðárkrókur – Siglufjörður og milli Reykjavíkur og Akureyrar. Einnig liggur fyrir aksturssamningur við Vegagerðina um akstur frá Búðardal til Hólmavíkur í beinu framhaldi af akstrinum frá Reykjavík í Búðardal. Samningurinn er gerður á grundvelli framlengingarákvæðis aksturssamnings fyrirtækisins við Vegagerðina frá 2008 og er ferðatíðnin sú sama og verið hefur á seinasta ári. Farnar verða 8 ferðir á viku á milli Akureyrar og Reykjavíkur, 6 ferðir á viku milli Snæfellsness og Reykjavíkur, 3 ferðir á viku Reykjavík – Búðardalur – Hólmavík og 3 ferðir á viku (Reykjavík) Sauðárkrókur – Siglufjörður. Frá Sauðárkrók til Varmahlíðar verður ekið í veg fyrir ferðirnar sem eknar eru á milli Akureyrar og Reykjavíkur eins og verið hefur, en þó ekki yfir seinni ferðirnar á virkum dögum yfir sumartímann.

Slökkviliðsstjóri Brunavarna Austur-Húnavatnssýslu segir upp vegna niðurskurðar

Slökkviliðsstjóri Brunavarna Austur-Húnavatnssýslu hefur sagt upp störfum vegna óánægju með fyrirhugaðan niðurskurð sem hann telur ógna öryggi samfélagsins. Hann gagnrýnir sveitarstjórnir Blönduósbæjar og Húnavatnshrepps fyrir að sniðganga reglur um öryggi og viðbrögðum í brunavörnum.

Brunavarnir Austur-Húnavatnssýslu sinna hefðbundnum slökkvistörfum á svæðinu auk þess að hafa umsjón með klippibúnaði, en þjóðvegur eitt liggur í gegnum sýsluna. Hilmari Frímannssyni, sem ráðinn var sem slökkviliðsstjóri í haust, líst illa á áform um að skera niður bakvaktir hjá slökkviðliðinu. Það þýðir að enginn verður á bakvakt um kvöld og nætur á virkum dögum og aðeins einn maður um helgar.

Heimild: Mbl.is

Opið hús í Skátaheimilinu á morgun

Dagur kvenfélagskonunnar er þann 1. febrúar. Af því tilefni ætlar Kvenfélag Sauðárkróks að hafa opið hús í Borgartúni 2 (Skátaheimilinu) frá kl. 17. Þangað geta komið konur og karlar og fengið tilsögn í að setja í rennilása, stytta pils og buxur, fatabreytingar, prjóna sokkahæla og ýmislegt þess háttar.

Einnig getur fólk komið með sitt handverk til að vinna, sýna sig og sjá aðra. Saumavélar og það sem til þarf verður á staðnum.

Allir leikir Tindastóls í sumar í 1. deild karla í knattspyrnu

Tindastóll leikur í 1.deildinni í knattspyrnu í sumar. Mótið hefst þann 12. maí með leik við Hauka á útivelli. Þrjú lið frá Norðurlandi eru í deildini í ár, svo það verður hart tekist á í leikjum við KA-menn og Þórsara.

Leikir Tindastóls á Íslandsmótinu sumarið 2012 verða eftirfarandi:
(með fyrirvara um breytingar)

Laugardaginn 12. maí kl. 14 Haukar – Tindastóll Ásvellir
Laugardaginn 19. maí kl. 14 Tindastóll – Víkingur Ó. Sauðárkróksvöllur
Laugardaginn 26. maí kl. 14 BÍ/Bolungarvík – Tindastóll Torfnesvöllur
Laugardaginn 2. júní kl. 14 Tindastóll – ÍR Sauðárkróksvöllur
Laugardaginn 9. júní kl. 14 KA – Tindastóll Akureyrarvöllur
Laugardaginn 16. júní kl. 14 Tindastóll – Víkingur R. Sauðárkróksvöllur
Laugardaginn 23. júní kl. 14 Fjölnir – Tindastóll Fjölnisvöllur
Laugardaginn 30. júní kl. 14 Leiknir R. – Tindastóll Leiknisvöllur
Laugardaginn 7. júlí kl. 14 Tindastóll – Höttur Sauðárkróksvöllur
Laugardaginn 17. júlí kl. 20 Tindastóll – Þróttur R. Sauðárkróksvöllur
Laugardaginn 21. júlí kl. 14 Tindastóll – Haukar Sauðárkróksvöllur
Laugardaginn 24. júlí kl. 20 Þór – Tindastóll Þórsvöllur
Laugardaginn 28. júlí kl. 14 Víkingur Ó. – Tindastóll Ólafsvíkurvöllur
Laugardaginn 1. ágúst kl. 19 Tindastóll – BÍ/Bolungarvík Sauðárkróksvöllur
Laugardaginn 10. ágúst kl. 19 ÍR – Tindastóll ÍR-völlur
Laugardaginn 16. ágúst kl. 19 Tindastóll – KA Sauðárkróksvöllur
Laugardaginn 21. ágúst kl. 18:30 Víkingur R. – Tindastóll Víkingsvöllur
Laugardaginn 25. ágúst kl. 14 Tindastóll – Fjölnir Sauðárkróksvöllur
Laugardaginn 1. september kl. 14 Tindastóll – Leiknir R. Sauðárkróksvöllur
Laugardaginn 8. september kl. 14 Höttur – Tindastóll Vilhjálmsvöllur
Laugardaginn 15. september kl. 14 Tindastóll – Þór Sauðárkróksvöllur
Laugardaginn 22. september kl. 14 Þróttur R. – Tindastóll Valbjarnarvöllur

Unnið að því að fá innanlandsflugið aftur til Sauðárkróks

Ögmundur Jónasson innanríkisráðherra heimsótti Sauðárkrók á laugardaginn síðasta og sat fund með heimamönnum, þar sem ræddir voru möguleikar þess að koma áætlunarflugi aftur í gang til Sauðárkróks. Fundurinn góður og menn einhuga um að leysa verkefnið.

Fleiri fundir verði haldnir í vikunni um málið og vonandi verði hægt að greina frá niðurstöðu um málið í næstu viku.

Tindastóll fær nýjan leikmann í körfunni

Igor Tratnik, slóvenski körfuboltamaðurinn sem hefur spilað með Valsmönnum í úrvalsdeildinni í vetur, hefur fengið sig lausan undan samningi og er búinn að semja við Tindastól um að spila með þeim út tímabilið.

Tratnik, sem er 22 ára og 2,06 m á hæð, hefur verið í stóru hlutverki í Valsliðinu í vetur en þar hefur hann skorað 15 stig og tekið 10 fráköst að meðaltali í leik. Hann spilaði m.a. áður með KFÍ í 1. deildinni.  Myles Luttman sendur heim frá Tindastólsliðinu í stað Igor Tratnik.

Tindastóll réð ekki við Keflavík í körfunni

Keflvíkingar áttu ekki í erfiðleikum með Tindastól, lokatölur 72-91 og var sigur Keflvíkinga verulega sanngjarn. Tindastólsstrákarnir eru búnir að vera ansi heitir undanfarið en það er ljóst að eitthvað vantar upp á að liðið standi jafnfætis sterkustu liðunum í deildinni.

Keflvíkingar voru fyrri af stað úr ráspólunum og náðu smá forskoti strax í byrjun en Tindastólsliðið var þó ekki langt á eftir og fyrsti leikhluti var nokkuð jafn. Það var ekki fyrr en í lok leikhlutans sem Keflvíkingar náðu smá forskoti þegar Maggi Gunnars kláraði leikhlutann með einum þrist og gaf þannig smá sýnishorn á því sem var í vændum. Staðan 20-25 eftir fyrsta leikhluta.

Keflvíkingar mættu í annan leikhluta með allar byssur á lofti. Það skipti engu máli hverju þeir hentu í loftið eða hvaðan, það fór allt ofan í. Maggi Gunnars dritaði á færi og virtist ekki einu sinni þurfa að horfa á körfuna á köflum, Valur Orri Vals Ingimundar virðist líka hafa erft eitthvað af skothæfileikum föður síns og setti niður nokkra góða og þá kom Halldór Halldórs með nokkra úr eftirvagninum.

Tindastólsstrákarnir vissu ekki hvaðan á sig stóð veðrið og leikmenn liðsins voru hálfslegnir og illa áttaðir eftir þessa flugeldasýningu Keflvíkinga. Jafnvel reyndustu leikmenn Stólanna fóru að gera barnaleg mistök og Keflvíkingar gengu á lagið. Þrátt fyrir það þá voru Stólarnir svo sem ennþá inn í leiknum þegar liðin gengu til búningsklefa í hálfleik, staðan 34-50 og það hefur nú alveg gerst í körfuboltanum að lið nái að snúa þeim mun sér hag.

En því miður fyrir Tindastólsstrákana þá voru Keflvíkingar ekkert hættir að drita í þriðja leikhluta og leikurinn breyttist í létta skotæfingu fyrir Val Orra og Magga, og á köflum var Maggi meira að segja hættur að nenna að yfir miðju til að taka sum skotin.

Tindastólsliðið fór í þann pakka að fara í hlaupandi körfubolta en það var mjög langt frá því að ganga upp og staðinn var boðið upp á sýningu í því hvernig skal tapa körfubolta með sem frumlegustum hætti og hvernig á að klúðra sniðskotum. Hægrihandar sniðskot, vinstrihandar sniðskot, framan á körfuna sniðskot, troðslusniðskot, loftboltasniðskot, ekkert fór ofan í og ekki var liðið langt á þriðja leikhluta þegar öllum í Skagafirði og jafnvel sumum úr Akrahreppi var ljóst í hvað stefndi. 44-71 var staðan eftir þrjá leikhluta og líklega hefðu allir verið sáttir með að flauta leikinn bara af þá.

Tindastólsliðið hélt áfram að hlaupa í fjórða leikhluta og inn komu ungir og sprækir strákar eins og Ingvi Ingvarsson og Loftur Eiríks sem sýndu fín tilþrif. Keflvíkingar gáfu eftir og tóku upp á því að klúðra einu og einu skoti en það er svona á mörkunum að sé hægt að segja að körfuknattleikur hafi verið spilaður í fjórða leikhluta. Lokatölur eins og áður sagði 72-91.

Keflvíkingar sáttir með sitt væntanlega, spiluðu vel, áttu fína spretti í vörninni og ef þeir ætla að skjóta svona það sem eftir er móts þá eru varla margir sem halda í við þá. Bestir í liði Keflvíkinga voru Maggi Gunnars og Valur Orri sem mættu með miðið vel stillt og gaman að sjá að Valur hefur náð að bæta sig smá frá því að hann byrjaði að drippla körfubolta í íþróttahúsinu á Sauðárkróki fyrir svona áratug síðan.

Hörð lending fyrir Tindastólsstrákana sem voru rifnir rækilega niður á jörðina í kvöld. Áhyggjuefni kannski hjá liðinu hvað örvæntingin var fljót að hríslast um liðið þegar skotin fóru að detta hjá Keflvíkingum en það er allavega nóg sem Tindastólsliðið þarf að laga fyrir undanúrslitaleikinn á móti KR. Eigilega eini ljósi punkturinn fyrir stuðningsmenn Tindastóls var að handboltinn seinkaði Útsvarinu þannig að Útsvarið var ekki byrjað þegar leiknum lauk. Skástir í liði Tindastóls voru líklega Svavar og Rikki en það verður nú ekki hjá því komist að benda á að Curtis og Luttman áttu mjög erfitt kvöld.
Næsti leikur er 2. febrúar á móti Fjölni úti hjá Stólunum. Þá verður liðið löngu búið að gleyma þessum leik og tilbúnir í lokasprettinn í þessu móti.

Heimild: www.tindastoll.is

Hreindýraveiðar 2012

Auglýsing um hreindýraveiðar árið 2012

Heimilt er að veiða allt að 1009 hreindýr árið 2012. Þessi heimild er veitt með fyrirvara um að ekki verði verulegar breytingar á stofnstærð fram að veiðum sem kalli á endurskoðun fjölda veiðiheimilda. Veiðitími er frá 1. ágúst til og með 15. september. Umhverfisstofnun getur, sbr. reglugerð nr. 636/2010, heimilað veiðar á törfum frá og með 15. júlí og lengt veiðitíma kúa til og með 20. september. Óheimilt er að veiða kálfa. Veturgamlir tarfar eru alfriðaðir og miðast tarfaveiði því við tveggja vetra og eldri tarfa.
Veiðiheimildir árið 2012 skiptast sem hér segir eftir veiðisvæðum og kyni dýra:

             Kýr Tarfar Alls

  • Svæði 1 34 77 111
  • Svæði 2 257 92 349
  • Svæði 3 30 45 75
  • Svæði 4 10 21 31
  • Svæði 5 35 28 63
  • Svæði 6 30 46 76
  • Svæði 7 120 67 187
  • Svæði 8 47 25 72
  • Svæði 9 25 20 45
  • Samtals 588 421 1009

Umhverfisstofnun auglýsir og sér um sölu allra veiðiheimilda.

Veiðisvæðin skiptast þannig eftir sveitarfélögum:

Svæði 1 Vopnafjarðarhreppur og hluti Fljótsdalshéraðs, þ.e. Jökuldalur norðan Jökulsár á Brú og Jökulsárhlíð.
Svæði 2 Fljótsdalshreppur og hluti Fljótsdalshéraðs, áður Jökuldalur austan Jökulsár á Brú, Hróarstunga, Fell, Vellir vestan Grímsár og Skriðdalur vestan Grímsár, Geitdalsár,
Hrútár og línu úr Hrútárpollum í Hornbrynju.
Svæði 3 Borgarfjarðarhreppur og Fljótsdalshérað að hluta, þ.e. Hjaltastaðaþinghá, Eiðaþinghá
Svæði 4 Seyðisfjörður, Fljótsdalshérað að hlut, þ.e. Vellir austan Grímsár, og Fjarðabyggð að hluta, þ.e. Mjóifjörður.
Svæði 5 Fjarðabyggð að hluta, þ.e. Eskifjörður, Norðfjörður og Reyðarfjörður.
Svæði 6 Breiðdalshreppur, hluti Fjarðarbyggðar, þ.e. Fáskrúðsfjörður og Stöðvarfjörður, hluti Fljótsdalshrepps, þ.e. Skriðdalur austan Grímsár, Geitdalsár, Hrútár og línu úr
Hrútárpollum í Hornbrynju.
Svæði 7 Djúpavogshreppur, áður Beruneshreppur, Búlandshreppur og Geithellnahreppur.
Svæði 8 Hornafjörður,– áður Bæjarhreppur og Nesjahreppur (Lón og Nes).
Svæði 9 Hornafjörður, áður Mýrahreppur og Borgarhafnarhreppur (Mýrar og Suðursveit).

Þrátt fyrir skiptingu veiðiheimilda eftir veiðisvæðum getur Umhverfisstofnun, í samráði við
Náttúrustofu Austurlands, fært veiðiheimildir milli samliggjandi veiðisvæða þyki sýnt að hjarðir hafi fært sig milli þessara veiðisvæða eða aðrar sérstakar ástæður gefa tilefni til.
Samkvæmt 3. mgr. 9. gr. reglugerðar um stjórn hreindýraveiða, nr. 486/2003 er
Umhverfisstofnun heimilt að gera ráðstafanir til þess að veiði dreifist sem jafnast á veiðitímann á hverju svæði.

Veiðiheimildir þessar eru auglýstar í samræmi við 6. gr. reglugerðar nr. 486/2003 um stjórn hreindýraveiða með áorðnum breytingum, að fengnum tillögum Umhverfisstofnunar, sbr. 14. gr. laga nr. 64/1994 um vernd, friðun og veiðar á villtum fuglum og villtum spendýrum með áorðnum breytingum.
Umhverfisráðuneytinu, 25. janúar 2012.

Auglýsingin beint frá Umhverfisráðuneytinu er hér.

Ferðamenn á Íslandi 2011

Erlendir ferðamenn dvöldu að jafnaði 10,2 nætur á Íslandi sumarið 2011 og ferðuðust langflestir (79,6%) á eigin vegum. Tveir af hverjum þremur höfðu bókað ferðina innan fjögurra mánuða fyrir brottför og við ákvarðanatökuna höfðu langflestir (75,4%) aflað sér upplýsinga um Ísland á netinu. Bílaleigubíll var sá samgöngumáti sem flestir (46,0%) nýttu til ferða sinna um landið en vegakerfið er einn af þeim þáttum sem margir ferðamenn töldu að mætti bæta. Ferðin stóðst væntingar flestra og töldu langflestir (79,1%) líklegt að þeir myndu ferðast til Íslands aftur í framtíðinni og það að sumri til. Þetta er meðal niðurstaðna úr könnun sem Ferðamálastofa fékk MMR til að framkvæma meðal erlendra ferðamanna sumarið 2011.

Fjallabyggð óskar eftir tilboðum í stækkun grunnskóla

Fjallabyggð óskar eftir tilboðum í stækkun grunnskóla Fjallabyggðar við Tjarnarstíg 3 í Ólafsfirði. Um er að ræða viðbyggingu á tveimur hæðum, um 510 fermetrar og 2076 rúmmetrar að stærð. Byggingin er steinsteypt, einangruð og múrhúðuð að innan en múrhúðuð að utan á hefðbundinn hátt.
Þak er stólað valmaþak ofan á einangraðri steyptri plötu.
Innveggir eru ýmist steinsteyptir og múraðir burðarveggir eða hljóðeinangraðir gipsveggir.
Skila skal byggingunni fullfrágenginni að utan og innan en lóðinni í kringum hana skal skila grófjafnaðri.

Verkinu skal vera að fullu lokið eigi síðar en 1. september 2012.

Hægt er að skila inn frávikstilboði er miðast við að verkinu sé að fullu lokið eigi síðar en 21. desember 2012.

Útboðsgögn verða til sýnis og sölu á krónur 5.000 á bæjarskrifstofum Fjallabyggðar, Gránugötu 24, 580 Siglufirði frá og með þriðjudeginum 10. janúar 2012.

Tilboðin verða opnuð á sama stað hjá Deildarstjóra tæknideildar Fjallabyggðar föstudaginn 3. febrúar 2012 klukkan 14.00 að viðstöddum þeim bjóðendum sem þess óska.

Undankeppni Samfés í kvöld á Varmahlíð

Undankeppni söngkeppninnar Samfés fyrir Norðurland verður haldin í Miðgarði í Varmahlíð í kvöld. Félagsmiðstöðvar frá Norðurlandi taka þátt, en óveður er nú á Öxnadalsheiði og snéru því Siglfirðingar og Ólafsfirðingar við og taka því ekki þátt í kvöld. Þeir stefna í staðinn til Akureyrar til að sjá myndina Contraband í leikstjórn Baltasars Kormáks.

Um 70 krakkar frá Siglufirði og Ólafsfirði lögðu af stað í tveim rútum til Varmahlíðar, en snéru við á leiðinni sökum veðurs.

Sjómaðurinn útskrifaður af sjúkrahúsi

Íslenski sjómaðurinn sem komst lífs af er togarinn Hallgrímur SI-77 sökk úti fyrir ströndum Noregs í gær, hefur verið útskrifaður af sjúkrahúsi. Hann ætlar sér að leita áfallahjálpar á Íslandi. Þá segir flugstjóri björgunarþyrlunnar, sem bjargaði manninum,  að skipbrotsmaðurinn hafi gert allt rétt eftir að skipið fór að sökkva.

Upplýsingafulltrúi Sjúkrahússins í Álasundi, Arnt Sommerlund, sagði að búið væri að útskrifa manninn þar sem líkamlegir áverkar hans væru ekki miklir og hann þarfnaðist ekki frekari meðhöndlunar vegna þeirra.

Sommerlund segir að maðurinn hafi sjálfur kosið að þiggja ekki áfallahjálp á Sjúkrahúsinu í Álasundi, heldur ætli hann að leita sér slíkrar aðstoðar er hann kemur heim til Íslands.

Barðist fyrir lífi sínu í 15-18 metra ölduhæð

Fréttavefur Sunnmørsposten hefur eftir Olve Arnes, flugstjóra þyrlunnar, að Íslendingurinn, sem er 36 ára, hafi klætt sig í flotbúning strax og ljóst varð að leki var kominn að togaranum. Eftir að maðurinn lenti í sjónum notaði hann orkuna til að halda sér á floti og var nokkuð vel á sig kominn líkamlega þegar honum var bjargað um borð í þyrluna eftir þriggja og hálfs tíma vist í sjónum. 

Ölduhæð var 15-18 metrar og maðurinn fór oft á kaf en komst alltaf upp á yfirborðið að nýju.  

Engin ljós eða sendar voru á búningnum en á honum voru endurskinsmerki og því sá áhöfn þyrlunnar hann í sjónum.

Arnes segir að ofsaveður hafi verið á svæðinu þegar þyrlan kom þangað í gær eftir eins og hálfs klukkutíma flug úr landi. Merki bárust enn frá neyðarsendi sem var í togaranum, og því var ekki erfitt að finna svæðið þar sem báturinn sökk. Þar sá áhöfn þyrlunnar hluti úr skipinu, baujur, ljós og björgunarbát, sem reyndist tómur. Þá fannst sjómaðurinn fljótlega í sjónum. 

„Hann var í afar góðu ásigkomulagi, bæði andlega og líkamlega, þegar við náðum honum um borð. Hann gat sagt okkur hvað gerðist og að það hefðu verið fjórir menn um borð en aðeins tveir þeirra hefðu farið í flotbúning. Þá hefði annar búningurinn líklega lekið. Þess vegna fengum við strax góða yfirsýn yfir stöðuna,“ segir Arnes.   

Svo virðist sem Hallgrímur SI hafi sokkið á skömmum tíma. Íslenski sjómaðurinn segir að áhöfn Hallgríms hafi lent fljótlega í sjónum. Hann hafi eftir það séð björgunarbátinn og einn hinna en björgunarbáturinn fauk strax burtu og engum af skipbrotsmönnunum tókst að komast í hann.

Enn berast merki frá neyðarsendinum. Norska varðskipið Bergen ætlaði í morgun að fara á staðinn en varð að snúa við til Álasunds vegna veðurs og þar verður nú skipt um áhöfn. Eina skipið á svæðinu er loðnuskipið Herøyhav, en það var í vari í morgun og beið þess að veðrinu slotaði.

Atskákmót Sauðárkróks í kvöld kl. 20

20:00 Atskákmót Sauðárkróks í Safnahúsi staðarins. Allir velkomnir.

Á afmælisdegi Friðriks Ólafssonar, fyrsta stórmeistara Íslendinga. Teflt verður víða um land; í sundlaugum, skólum, kaffihúsum og vinnustöðum í tilefni dagsins. Kjörorð dagsins er: Upp með taflið!

Skákdagur Íslands er haldinn í fyrsta sinn æi dag, fimmtudaginn 26. janúar. Skákdagurinn er haldinn til heiðurs Friðrik Ólafssyni, fyrsta stórmeistara Íslendinga. Friðrik verður 77 ára þennan dag og tekur virkan þátt í hátíðahöldum.

Forseti Íslands Ólafur Ragnar Grímsson heldur móttöku til heiðurs Friðrik á Bessastöðum, en meðal annarra gesta verða þau börn sem í febrúar tefla fyrir Íslands hönd á Norðurlandamóti barna. Fjölmiðlum er boðið að vera viðstaddir á Bessastöðum, þar sem Friðrik mun m.a. tefla við Nansý Davíðsdóttur, 10 ára, sem er nýkrýndur Íslandsmeistari barna, fyrst stúlkna á Íslandi.

Að Skákdeginum standa Skáksamband Íslands, Skákakademía Reykjavíkur, Skákskóli Íslands og taflfélög um allt land, í samvinnu við skóla, íþróttafélög, sveitarfélög, fyrirtæki og einstaklinga.

Markmiðið er að heiðra Friðrik Ólafsson, fyrir einstakt framlag til samfélags okkar í heild og skákarinnar sérstaklega, jafnframt því að sýna þá grósku sem er í íslensku skáklífi um allt land.

Knattspyrnumót fjármálafyrirtækja um helgina á Akureyri

Hið árlega knattspyrnumót fjármálafyrirtækja verður haldið á Akureyri um helgina, nánar til tekið laugardaginn 28. janúar. Hvorki fleiri né færri en 28 lið eru skráð til leiks, þar af fjögur kvennalið.

Mótið fer fram í Boganum á Akureyri. Um kvöldið fer svo fram lokahóf mótsins, sem sumir kalla árshátíð fjármálafyrirtækja. Gert er ráð fyrir að um 250 manns mæti í Sjallann um kvöldið en húsið er opið öllum.

Mennirnir taldir af, leit hætt

Norska strandgæslan hefur vegna veðurs hætt leit að mönnunum þremur sem saknað var að togaranum Hallgrími SI-77. Eru mennirnir taldir af, en björgunarbátur fannst mannlaus á þeim slóðum sem talið er að togarinn hafi farist.

Jan Lillebø, talsmaður björgunarmiðstöðvarinnar í Suður-Noregi, segir við vef VG, að aðstæður á svæðinu séu það slæmar að ekki sé lengur gert ráð fyrir að mennirnir finnist á lífi. Tvær björgunarþyrlur og eftirlitsflugvél tóku þátt í leitinni í kvöld ásamt loðnuskipi.

Verið var að flytja togarann til Noregs þegar hann sökk í dag en skipið hafði verið selt í brotajárn. Neyðarkall barst frá neyðarsendi í skipinu klukkan 13:14 í dag þegar skipið var statt um 150 sjómílur norðvestur af Álasundi inni í norskri lögsögu. Síðan náðist ekkert samband við skipið.

Fjórir voru í áhöfninni og var einum bjargað úr sjónum um borð í þyrlu síðdegis. Maðurinn var íklæddur flotgalla. Hann var fluttur til Álasunds með þyrlunni, sem lenti þar um klukkan 20 að íslenskum tíma. Var manninum ekið á sjúkrahús þar sem hann er í rannsókn. Var líðan hans sögð góð miðað við aðstæður.

Heimild: Mbl.is

Áhöfn Hallgríms SI 77 enn ófundin

Mennirnir þrír sem voru á togaranum sem talinn er hafa farist undan ströndum Noregs í dag, eru enn ófundnir. Norska strandgæslan hefur leitað þeirra með tveimur björgunarþyrlum og einni herflugvél í kvöld.

Þyrlunum hefur nú verið snúið til lands, að sækja eldsneyti, en flugvélin hefur nægt eldsneyti til að leita til miðnættis. Hún leitar mannanna með radar og hitanæmri myndavél. Þá er norskt fiskiskip komið á slysstað og aðstoðar við leitina. Norskir fjölmiðlar greina frá því að fundist hafi brak, sem talið sé úr bátnum, en norska strandgæslan hefur ekki staðfest að togarinn hafi farist.

Togarinn hafði verið seldur í brotajárn og var af þeim sökum á leið til Noregs með fjóra um borð. Einum úr áhöfninni var bjargað en þriggja er enn leitað. Maðurinn sem fannst er nú kominn til Álasunds og er sagður vel á sig kominn, miðað við aðstæður. Hann var í flotbúningi þegar hann fannst.

Norskir fjölmiðlar segja að björgunarlið hafi fundið mannlausan björgunarbát, en aftakaveður er á svæðinu, og nemur ölduhæðin allt að 15 metrum. Togarinn heitir Hallgrímur SI-77, nærri þrjúhundruð tonna togari frá Siglufirði.Hallgrímur var þrjátíu og fimm metra langur, smíðaður 1974 á Englandi og var gerður út frá Siglufirði frá 2010.

Heimild: Rúv.is

Vetrarkort á Skíðasvæðum Norðurlands gilda víða

Þeir sem eiga vetrarkort á skíðasvæðinu í Hlíðarfjalli,  Dalvík, Siglufirði eða Tindastóli geta skíðað á svæðunum helgina 28-29 janúar, þar sem fyrsta skiptihelgin verður að veruleika. Vetrarkortin gilda því á öllum þessum svæðum um næstu helgi !

Vetrarkortshafar framvísa vetrarkortum sínum í afgreiðslu hvers skíðasvæðis og fá þar helgarpassa.  Þetta verður fyrsta skiptihelgin af þremur sem boðið verður uppá í vetur.

Landsbankinn kaupir rekstur Sparisjóðs Svarfdæla

Það ríkir tregablandin gleði í Dalvíkurbyggð eftir að ákveðið var að selja Landsbankanum rekstur Sparisjóðs Svarfdæla. Það er léttir fyrir samfélagið að þar hafi tekist að tryggja áframhaldandi rekstur fjármálastofnunar en um leið eftirsjá í sparisjóðnum.

Á fundi á Dalvík í gærkvöldi samþykktu 99 prósent stofnfjárhafa í Sparisjóði Svarfdæla að selja Landsbankanum rekstur sjóðsins. Um leið var samþykkt að leggja Sparisjóð Svarfdæla niður.

Landsbankinn yfirtekur skuldbindingar vegna lána í sparisjóðnum sem nema 3,2 milljörðum króna og greiðir 165 miljónir að auki. Þá yfirtekur bankinn allar rekstrarlegar skuldbindingar sjóðsins. Mikil óvissa hefur ríkt um rekstur sjóðsins undanfarin misseri og því ákveðinn léttir fyrir samfélagið henni skuli nú hafa verið eytt. Um leið sjá heimamenn eftir sparisjóðnum.

Kristján Hjartarson, formaður bæjjarráðs Dalvíkurbyggðar segir það auðvitað heilmikið áfall  að saga þessarar gömlu traustu stofnunar, Sparisjóðs Svarfdæla, skuli nú öll. Tilfinningar séu mjög blendnar tilfinningar. Á hinn bóginn sé það líka fagnaðarefni að við þessa yfirtöku Landsbankans á Sparisjóðnum sé vonandi tryggð til frambúðar starfsemi peningastofnunar á Dalvík.

Heimild: Rúv

Togari frá Siglufirði fórst undan ströndum Noregs

Íslenskur togari, Hallgrímur SI 77 frá Siglufirði,  með fjögurra manna áhöfn fórst undan strönd Noregs í dag. Norskt björgunarlið bjargaði einum úr áhöfn á lífi úr sjónum, en hinna er leitað. Aðstæður á vettvangi eru afar erfiðar.

Klukkan hálf tvö í dag barst björgunarstöð í Noregi neyðarkall frá íslenska skipinu, togara sem var á leið frá Íslandi til Noregs. Sjálfvirkur neyðarsendir fór þá í gang, en ekkert samband náðist við áhöfnina. Fjórir voru um borð, allt Íslendingar. Á sama tíma datt skipið út úr sjálfvirku kerfi vaktstöðvar siglinga í Reykjavík. Verið var að ferja skipið frá Íslandi til Noregs, þangað sem það var selt í brotajárn.

Þegar neyðarkallið barst var skipið statt 270 sjómílur norðvestur af Álasundi í Norður-Noregi. Aftakaveður er á þessum slóðum og ölduhæð mikil, 10-15 metrar, samkvæmt tilkynningu frá Landhelgisgæslunni. Björgunarlið var þegar ræst og tvær Sea King-þyrlur voru fyrstar á staðinn. Áhöfn annarrar fann mann úr áhöfninni á lífi í sjónum, en hinna er leitað. Orion-vél er einnig á leiðinni, búin hitamyndavél og öflugri ratsjá. Nálægur togari tekur einnig þátt í leitinni, sem miðar að því að finna björgunarbáta þar sem ljóst er að togarinn er sokkinn.

Norska ríkisútvarpið, NRK, skýrði frá því undir kvöld að maðurinn sem bjargað var úr sjónum væri kominn til Álasunds og hann væri vel á sig kominn.

Bæjar- og menningarvefur