Undankeppni Samfés í kvöld á Varmahlíð

Undankeppni söngkeppninnar Samfés fyrir Norðurland verður haldin í Miðgarði í Varmahlíð í kvöld. Félagsmiðstöðvar frá Norðurlandi taka þátt, en óveður er nú á Öxnadalsheiði og snéru því Siglfirðingar og Ólafsfirðingar við og taka því ekki þátt í kvöld. Þeir stefna í staðinn til Akureyrar til að sjá myndina Contraband í leikstjórn Baltasars Kormáks.

Um 70 krakkar frá Siglufirði og Ólafsfirði lögðu af stað í tveim rútum til Varmahlíðar, en snéru við á leiðinni sökum veðurs.

Sjómaðurinn útskrifaður af sjúkrahúsi

Íslenski sjómaðurinn sem komst lífs af er togarinn Hallgrímur SI-77 sökk úti fyrir ströndum Noregs í gær, hefur verið útskrifaður af sjúkrahúsi. Hann ætlar sér að leita áfallahjálpar á Íslandi. Þá segir flugstjóri björgunarþyrlunnar, sem bjargaði manninum,  að skipbrotsmaðurinn hafi gert allt rétt eftir að skipið fór að sökkva.

Upplýsingafulltrúi Sjúkrahússins í Álasundi, Arnt Sommerlund, sagði að búið væri að útskrifa manninn þar sem líkamlegir áverkar hans væru ekki miklir og hann þarfnaðist ekki frekari meðhöndlunar vegna þeirra.

Sommerlund segir að maðurinn hafi sjálfur kosið að þiggja ekki áfallahjálp á Sjúkrahúsinu í Álasundi, heldur ætli hann að leita sér slíkrar aðstoðar er hann kemur heim til Íslands.

Barðist fyrir lífi sínu í 15-18 metra ölduhæð

Fréttavefur Sunnmørsposten hefur eftir Olve Arnes, flugstjóra þyrlunnar, að Íslendingurinn, sem er 36 ára, hafi klætt sig í flotbúning strax og ljóst varð að leki var kominn að togaranum. Eftir að maðurinn lenti í sjónum notaði hann orkuna til að halda sér á floti og var nokkuð vel á sig kominn líkamlega þegar honum var bjargað um borð í þyrluna eftir þriggja og hálfs tíma vist í sjónum. 

Ölduhæð var 15-18 metrar og maðurinn fór oft á kaf en komst alltaf upp á yfirborðið að nýju.  

Engin ljós eða sendar voru á búningnum en á honum voru endurskinsmerki og því sá áhöfn þyrlunnar hann í sjónum.

Arnes segir að ofsaveður hafi verið á svæðinu þegar þyrlan kom þangað í gær eftir eins og hálfs klukkutíma flug úr landi. Merki bárust enn frá neyðarsendi sem var í togaranum, og því var ekki erfitt að finna svæðið þar sem báturinn sökk. Þar sá áhöfn þyrlunnar hluti úr skipinu, baujur, ljós og björgunarbát, sem reyndist tómur. Þá fannst sjómaðurinn fljótlega í sjónum. 

„Hann var í afar góðu ásigkomulagi, bæði andlega og líkamlega, þegar við náðum honum um borð. Hann gat sagt okkur hvað gerðist og að það hefðu verið fjórir menn um borð en aðeins tveir þeirra hefðu farið í flotbúning. Þá hefði annar búningurinn líklega lekið. Þess vegna fengum við strax góða yfirsýn yfir stöðuna,“ segir Arnes.   

Svo virðist sem Hallgrímur SI hafi sokkið á skömmum tíma. Íslenski sjómaðurinn segir að áhöfn Hallgríms hafi lent fljótlega í sjónum. Hann hafi eftir það séð björgunarbátinn og einn hinna en björgunarbáturinn fauk strax burtu og engum af skipbrotsmönnunum tókst að komast í hann.

Enn berast merki frá neyðarsendinum. Norska varðskipið Bergen ætlaði í morgun að fara á staðinn en varð að snúa við til Álasunds vegna veðurs og þar verður nú skipt um áhöfn. Eina skipið á svæðinu er loðnuskipið Herøyhav, en það var í vari í morgun og beið þess að veðrinu slotaði.

Atskákmót Sauðárkróks í kvöld kl. 20

20:00 Atskákmót Sauðárkróks í Safnahúsi staðarins. Allir velkomnir.

Á afmælisdegi Friðriks Ólafssonar, fyrsta stórmeistara Íslendinga. Teflt verður víða um land; í sundlaugum, skólum, kaffihúsum og vinnustöðum í tilefni dagsins. Kjörorð dagsins er: Upp með taflið!

Skákdagur Íslands er haldinn í fyrsta sinn æi dag, fimmtudaginn 26. janúar. Skákdagurinn er haldinn til heiðurs Friðrik Ólafssyni, fyrsta stórmeistara Íslendinga. Friðrik verður 77 ára þennan dag og tekur virkan þátt í hátíðahöldum.

Forseti Íslands Ólafur Ragnar Grímsson heldur móttöku til heiðurs Friðrik á Bessastöðum, en meðal annarra gesta verða þau börn sem í febrúar tefla fyrir Íslands hönd á Norðurlandamóti barna. Fjölmiðlum er boðið að vera viðstaddir á Bessastöðum, þar sem Friðrik mun m.a. tefla við Nansý Davíðsdóttur, 10 ára, sem er nýkrýndur Íslandsmeistari barna, fyrst stúlkna á Íslandi.

Að Skákdeginum standa Skáksamband Íslands, Skákakademía Reykjavíkur, Skákskóli Íslands og taflfélög um allt land, í samvinnu við skóla, íþróttafélög, sveitarfélög, fyrirtæki og einstaklinga.

Markmiðið er að heiðra Friðrik Ólafsson, fyrir einstakt framlag til samfélags okkar í heild og skákarinnar sérstaklega, jafnframt því að sýna þá grósku sem er í íslensku skáklífi um allt land.

Knattspyrnumót fjármálafyrirtækja um helgina á Akureyri

Hið árlega knattspyrnumót fjármálafyrirtækja verður haldið á Akureyri um helgina, nánar til tekið laugardaginn 28. janúar. Hvorki fleiri né færri en 28 lið eru skráð til leiks, þar af fjögur kvennalið.

Mótið fer fram í Boganum á Akureyri. Um kvöldið fer svo fram lokahóf mótsins, sem sumir kalla árshátíð fjármálafyrirtækja. Gert er ráð fyrir að um 250 manns mæti í Sjallann um kvöldið en húsið er opið öllum.

Mennirnir taldir af, leit hætt

Norska strandgæslan hefur vegna veðurs hætt leit að mönnunum þremur sem saknað var að togaranum Hallgrími SI-77. Eru mennirnir taldir af, en björgunarbátur fannst mannlaus á þeim slóðum sem talið er að togarinn hafi farist.

Jan Lillebø, talsmaður björgunarmiðstöðvarinnar í Suður-Noregi, segir við vef VG, að aðstæður á svæðinu séu það slæmar að ekki sé lengur gert ráð fyrir að mennirnir finnist á lífi. Tvær björgunarþyrlur og eftirlitsflugvél tóku þátt í leitinni í kvöld ásamt loðnuskipi.

Verið var að flytja togarann til Noregs þegar hann sökk í dag en skipið hafði verið selt í brotajárn. Neyðarkall barst frá neyðarsendi í skipinu klukkan 13:14 í dag þegar skipið var statt um 150 sjómílur norðvestur af Álasundi inni í norskri lögsögu. Síðan náðist ekkert samband við skipið.

Fjórir voru í áhöfninni og var einum bjargað úr sjónum um borð í þyrlu síðdegis. Maðurinn var íklæddur flotgalla. Hann var fluttur til Álasunds með þyrlunni, sem lenti þar um klukkan 20 að íslenskum tíma. Var manninum ekið á sjúkrahús þar sem hann er í rannsókn. Var líðan hans sögð góð miðað við aðstæður.

Heimild: Mbl.is

Áhöfn Hallgríms SI 77 enn ófundin

Mennirnir þrír sem voru á togaranum sem talinn er hafa farist undan ströndum Noregs í dag, eru enn ófundnir. Norska strandgæslan hefur leitað þeirra með tveimur björgunarþyrlum og einni herflugvél í kvöld.

Þyrlunum hefur nú verið snúið til lands, að sækja eldsneyti, en flugvélin hefur nægt eldsneyti til að leita til miðnættis. Hún leitar mannanna með radar og hitanæmri myndavél. Þá er norskt fiskiskip komið á slysstað og aðstoðar við leitina. Norskir fjölmiðlar greina frá því að fundist hafi brak, sem talið sé úr bátnum, en norska strandgæslan hefur ekki staðfest að togarinn hafi farist.

Togarinn hafði verið seldur í brotajárn og var af þeim sökum á leið til Noregs með fjóra um borð. Einum úr áhöfninni var bjargað en þriggja er enn leitað. Maðurinn sem fannst er nú kominn til Álasunds og er sagður vel á sig kominn, miðað við aðstæður. Hann var í flotbúningi þegar hann fannst.

Norskir fjölmiðlar segja að björgunarlið hafi fundið mannlausan björgunarbát, en aftakaveður er á svæðinu, og nemur ölduhæðin allt að 15 metrum. Togarinn heitir Hallgrímur SI-77, nærri þrjúhundruð tonna togari frá Siglufirði.Hallgrímur var þrjátíu og fimm metra langur, smíðaður 1974 á Englandi og var gerður út frá Siglufirði frá 2010.

Heimild: Rúv.is

Vetrarkort á Skíðasvæðum Norðurlands gilda víða

Þeir sem eiga vetrarkort á skíðasvæðinu í Hlíðarfjalli,  Dalvík, Siglufirði eða Tindastóli geta skíðað á svæðunum helgina 28-29 janúar, þar sem fyrsta skiptihelgin verður að veruleika. Vetrarkortin gilda því á öllum þessum svæðum um næstu helgi !

Vetrarkortshafar framvísa vetrarkortum sínum í afgreiðslu hvers skíðasvæðis og fá þar helgarpassa.  Þetta verður fyrsta skiptihelgin af þremur sem boðið verður uppá í vetur.

Landsbankinn kaupir rekstur Sparisjóðs Svarfdæla

Það ríkir tregablandin gleði í Dalvíkurbyggð eftir að ákveðið var að selja Landsbankanum rekstur Sparisjóðs Svarfdæla. Það er léttir fyrir samfélagið að þar hafi tekist að tryggja áframhaldandi rekstur fjármálastofnunar en um leið eftirsjá í sparisjóðnum.

Á fundi á Dalvík í gærkvöldi samþykktu 99 prósent stofnfjárhafa í Sparisjóði Svarfdæla að selja Landsbankanum rekstur sjóðsins. Um leið var samþykkt að leggja Sparisjóð Svarfdæla niður.

Landsbankinn yfirtekur skuldbindingar vegna lána í sparisjóðnum sem nema 3,2 milljörðum króna og greiðir 165 miljónir að auki. Þá yfirtekur bankinn allar rekstrarlegar skuldbindingar sjóðsins. Mikil óvissa hefur ríkt um rekstur sjóðsins undanfarin misseri og því ákveðinn léttir fyrir samfélagið henni skuli nú hafa verið eytt. Um leið sjá heimamenn eftir sparisjóðnum.

Kristján Hjartarson, formaður bæjjarráðs Dalvíkurbyggðar segir það auðvitað heilmikið áfall  að saga þessarar gömlu traustu stofnunar, Sparisjóðs Svarfdæla, skuli nú öll. Tilfinningar séu mjög blendnar tilfinningar. Á hinn bóginn sé það líka fagnaðarefni að við þessa yfirtöku Landsbankans á Sparisjóðnum sé vonandi tryggð til frambúðar starfsemi peningastofnunar á Dalvík.

Heimild: Rúv

Togari frá Siglufirði fórst undan ströndum Noregs

Íslenskur togari, Hallgrímur SI 77 frá Siglufirði,  með fjögurra manna áhöfn fórst undan strönd Noregs í dag. Norskt björgunarlið bjargaði einum úr áhöfn á lífi úr sjónum, en hinna er leitað. Aðstæður á vettvangi eru afar erfiðar.

Klukkan hálf tvö í dag barst björgunarstöð í Noregi neyðarkall frá íslenska skipinu, togara sem var á leið frá Íslandi til Noregs. Sjálfvirkur neyðarsendir fór þá í gang, en ekkert samband náðist við áhöfnina. Fjórir voru um borð, allt Íslendingar. Á sama tíma datt skipið út úr sjálfvirku kerfi vaktstöðvar siglinga í Reykjavík. Verið var að ferja skipið frá Íslandi til Noregs, þangað sem það var selt í brotajárn.

Þegar neyðarkallið barst var skipið statt 270 sjómílur norðvestur af Álasundi í Norður-Noregi. Aftakaveður er á þessum slóðum og ölduhæð mikil, 10-15 metrar, samkvæmt tilkynningu frá Landhelgisgæslunni. Björgunarlið var þegar ræst og tvær Sea King-þyrlur voru fyrstar á staðinn. Áhöfn annarrar fann mann úr áhöfninni á lífi í sjónum, en hinna er leitað. Orion-vél er einnig á leiðinni, búin hitamyndavél og öflugri ratsjá. Nálægur togari tekur einnig þátt í leitinni, sem miðar að því að finna björgunarbáta þar sem ljóst er að togarinn er sokkinn.

Norska ríkisútvarpið, NRK, skýrði frá því undir kvöld að maðurinn sem bjargað var úr sjónum væri kominn til Álasunds og hann væri vel á sig kominn.

Landanir á Sauðárkróki

23. janúar s.l. var verið að landa úr Klakk SK-5 96 tonnum af þorski og 20 tonnum af ýsu ásamt smávegis af öðrum tegundum. Í síðustu viku landaði Klakkur 88 tonnum af þorski 7 tonnum af ýsu og smáslöttum af öðrum tegundum. Frystiskipin eru svo væntanleg upp úr næstu helgi.

Í byrjun árs var flutningaskipið Svanur hér með 67 tonn af salti og var það til matvælaframleiðslu.

22. janúar var tankskipið Stella Orion með 400 tonn af bitumen fyrir Vegagerðina.

Miðnæturmót Arion banka í sumar á Sauðárkróki

MIÐNÆTURMÓT

Arion banka

7.- 8. JÚLÍ 2012

Á SAUÐÁRKRÓKI FYRIR STRÁKA OG STELPUR Í 4. FLOKKI

Miðnæturmótið er hraðmót með stuttum leikjum, bæði fyrir stráka og stelpur í 4, flokki og verður leikið í 11 manna liðum.

Mótið hefst á laugardagskvöldi og er áætlað að fyrstu leikir hefjist kl 20:00. Leikið verður alla nóttina og fram undir morgun en þá geta keppendur lagt sig og farið úr fótboltaskónum.

Boðið verður upp á ávexti og drykki alla nóttina og svo er pizzuveisla í hádeginu á laugardag.

Þátttökugjald er kr. 3000  á hvern leikmann.

Leikið verður bæði í stráka- og stúlknaflokki á þremur grasvöllum í hjarta bæjarins. Gisting er í skóla sem er næsta hús við vallarsvæðið.

Miðnæturmótið er skemmtileg viðbót við þá flóru fótboltamóta sem í boði er á landinu og eitthvað sem við hvetjum ykkur til að skoða vel.

Ef óskað er fleiri upplýsinga má senda póst á fotbolti@tindastoll.is eða hringja á skrifstofu Tindastóls í síma 453- 6080.

Tindastóll vann BÍ

Lið Tindastóls vann góðan 3-1 sigur þegar liðið lék við BÍ/Bolungarvík í Kórnum í Kópavogi, 22. janúar.

Byrjunarlið Tindastóls:
Markmaður: Arnar Magnús
Varnarmenn: Pálmi Valgeirs, Böddi, Fannar Örn og Bjarni Smári
Miðjumenn: Edvard Börkur og bræðurnir þeir Árni, Alli og Atli
Sóknarmenn:  Fannar Freyr Gíslason og Andri Gíslason
Varamenn sem komu inná: Atli Sigurðsson, Hilmar, Benni og Stefán Hafsteinsson

Eins og sést á liðsuppstillingunni er Donni að prófa ýmsa leikmenn og í dag var það m.a. okkar fyrrum leikmaður, Fannar Freyr Gíslason sem var með okkur.

Mörk okkar voru öll afar glæsileg en Eddi skoraði með skalla eftir hornspyrnu, Atli skoraði beint úr aukaspyrnu og Hilmar Þór Kárason skoraði eftir hjólhestaspyrnu.  Hilmar kættist gríðarlega við þetta mark enda fallegt með eindæmum.

Útboð og tilrauna strandsiglingar á næsta ári?

Strandsiglingar verði boðnar út með ríkisstyrk

Starfshópur innanríkisráðherra um hvernig koma megi strandsiglingum á að nýju hefur skilað ráðherra tillögum sínum. Leggur hópurinn til að leitað verði tilboða í siglingarnar samkvæmt ákveðnum forsendum þar sem boðið verði í meðgjöf ríkisins til nokkurra ára meðan siglingarnar koma undir sig fótunum. Miðað er við tilraunaverkefni til nokkurra ára og að því loknu standi siglingarnar undir sér.

Innanríkisráðherra skipaði snemma á síðasta sumri starfshóp til að leggja fram tillögur um hvernig standa megi að því að koma á strandsiglingum að nýju. Markmiðið er að hefja strandsiglingar sem tryggja hagkvæma sjóflutninga á vörum innanlands og stuðla að lægri flutningskostnaði, jákvæðri byggðaþróun með auknum tækifærum og samkeppnishæfni fyrirtækja á landsbyggðinni. Hópurinn skoðaði mögulega flutninga, greindi skipakost, áætlaðan rekstrarkostnað útgerða, viðkomuhafnir, tíðni ferða, áætlun um sjálfbært flutningsverð og önnur atriði sem skipt geta máli. Hópurinn fór yfir ýmsar skýrslur og greinargerðir sem fyrri starfshópar höfðu lagt fram. Hópurinn gerði markaðsrannsóknir í samvinnu við atvinnuþróunarfélög undir stjórn Atvinnuþróunarfélags Vestfjarða. Var kannaður áhugi flutningsaðila á strandflutningum svo og áhugi framleiðenda og annarra kaupenda vöruflutninga.

Vikulegar siglingar

Niðurstaða hópsins er sú að leggja til að strandsiglingar verði boðnar út. Gerð hafa verið drög að rekstraráætlun fyrir skipið og undirbúin gögn fyrir hugsanlegt útboð en Ríkiskaup voru til ráðgjafar um þann þátt. Samkvæmt markaðsrannsóknum er líklegt að flytja megi í strandsiglingum rúmlega 70 þúsund tonn á ári til að byrja með. Flutningar muni aukast þegar þjónustan hefur fest sig í sessi. Miðað er við að skip sigli hringinn frá höfuðborgarsvæðinu umhverfis landið í viku hverri og sinni flutningum milli hafna á Vestfjörðum, Norðurlandi og Austfjörðum. Gefur það möguleika á flutningi milli þessara hafna bæði á hráefni og afurðum fyrir framleiðslufyrirtæki en einnig á margs konar dagvöru fyrir verslun og þjónustu.

Þá eru gerðar ákveðnar kröfur til skips sem notað yrði til flutninganna. Skal það geta lestað að minnsta kosti 1.500 tonn, vera með síðuport og með frystilest fyrir 1.000 tonn að lágmarki. Þá skal skipið hafa pláss fyrir að minnsta kosti 20 gámaeiningar og krana sem lyft getur 40 feta gámi allt að 25 tonnum í 20 metra frá síðu skipsins. Einnig er áskilið að umsjónaraðili sé í hverri viðkomuhöfn og gert er að skilyrði að bjóðandi hafi minnst tveggja ára reynslu af rekstri flutningaskipa.

Tilraunasiglingar hefjist á næsta ári

Innanríkisráðherra mun nú fara yfir tillögurnar og í framhaldinu kynna hugsanlegt útboð í ríkisstjórninni. Stefnt er að því að undirbúningur og útboð geti farið fram á þessu ári og að tilraunastrandsiglingar gætu þá hafist í byrjun næsta árs. Starfshópinn skipuðu: Guðmundur Kristjánsson, hafnarstjóri Ísafjarðarhafnar, formaður, Sigurður Örn Guðleifsson, lögfræðingur innanríkisráðuneytinu, Pétur Ólafsson, skrifstofustjóri Akureyrarhöfn, Ögmundur Hrafn Magnússon, lögfræðingur fjármálaráðuneytinu, Kristján Helgason, deildarstjóri hafnasviðs hjá Siglingastofnun Íslands,  Unnar Jónsson, rekstrarfræðingur og Etna Sigurðardóttir hjá Vegagerðinni. Þetta kemur fram í fréttatilkynningu frá innanríkisráðuneytinu.

Texti: Vikudagur.is

Heimsókn mennta- og menningarmálaráðherra

Laugardaginn 14. janúar lagði mennta- og menningarmálaráðherra, Katrín Jakobsdóttir, lykkju á leið sína á Vínartónleika Karlakórsins Heimis og heimsótti Kvikmyndafjélagið Skottu og Hátæknimenntasetur Fjölbrautarskóla Norðurlands vestra.  Hún kynnti sér aðstöðu til náms í kvikmyndagerð og aðstöðu til verknáms við skólann.  Kvikmyndanám við FNV er í nánu samstarfi við Kvikmyndafjélagið Skottu, sem leggur til kennara aðstöðu og tækjabúnað til kvikmyndanámsins. Ráðherra var sýnd stuttmynd sem nemendur gerðu og vann til fyrstu verðlauna á kvikmyndahátíðinni Stullanum á Akureyri í haust.  Þess má geta að önnur verðlaun á hátíðinni féllu einnig í skaut nemenda í kvikmyndagerð við skólann.

Ráðherra voru m.a. sýndar tölvustýrðar vélar  í verknámsdeildum skólans og Fab Lab stofan, en mikil áhersla er lögð á að nemendur kunni að nota tölvustýrðar vélar og tæki sem byggja á CNC tækni. Auk þessa gefst nemendum færi á að spreyta sig á nýsköpun í FAb Lab stofunni

Sauðárkrókur

Skagafjörður er nálægt miðju Norðurlandi, um 40 km langur og fullir 30 km á breidd mill i Húnsness á Skaga ogumdaemid Straumness innan við Fljótavík, þrengist þó nokkuð innar en er samt 15 km breiður þvert yfir frá Reykjadiski, alls 5230 km2. Fram í botn Skagafjarðar gengur Hegranes og eru breiðar víkur báðum megin þess og sandar miklir í botni. Á firðinum eru Drangey og Málmey. Siglingaleið um fjörðinn er greið og er hann djúpur, þó gengur hryggur neðansjávar út frá Hegranesi og annar frá Drangey, 4-5 km til norðurs, og er Hólmasker nyrst á honum. Kemur það upp um fjöru. Innar á hryggnum eru Kvíslasker. Boðar og grunn eru út frá báðum endum Málmeyjar.

Undirlendi er mikið í vestanverðu héraðinu, nema undir Tindastóli. Að firðinum austanverðum er nokkuð undirlendi og há fjöll að baki. Náttúrlegar hafnir eru engar en skipalægi nokkur, þó flest ill frá náttúrunnar hendi.

Inn af botni Skagafjarðar gengur mikill dalur samnefndur. Er hann einn mesti dalur landsins, breiður og grösugur, kringdur svipmiklum fjöllum. Aðalhéraðið er um 50 km langt en klofnar innst í þrönga dali er ganga langt inn í hálendið. Kallast þeir einu nafni Skagafjarðardalir en hafa líklega heitið Goðdalir til forna. Undirlendið er 5-10 km breitt en út frá því ganga þverdalir, bæði byggðir og óbyggðir. Aðalvatnsfall í Skagafirði er Héraðsvötn.
Þjóðvegur 1 gengur í gegn um héraðið frá Vatnsskarði í vestri að Öxnadalsheiðar í austri. Þrír þéttbýliskjarnar eru í Skagafirði, Sauðárkrókur, Hofsós og Varmahlíð og af þeim er Sauðárkrókur stærstur.

Bæjar- og menningarvefur