Trilludagar er ein af þessum hátíðum í Fjallabyggð sem hefur fest sig í sessi og orðin árlegur viðburður. Frítt er inn á hátíðina, sem haldin verður laugardaginn 27. júlí næstkomandi. Hátíðin er fyrir alla fjölskylduna og stendur frá kl. 10-16 á bryggjunni við Rauðkutorg, en þar verða í boði siglingar, grill og gleði.
Hátíðin er haldin af Fjallabyggð í samvinnu við eldhressa trillukarla, Kiwanisklúbbinn Skjöld á Siglufirði sem annast flökun og grill á hafnarbakkanum, Björgunarsveitina Stráka sem annast gæslu á sjó og Ungliðasveitirnar Smá Stráka á Siglufirði og Djarf í Ólafsfirði sem m.a. annast gæslu á landi.
Gestum hátíðarinnar er boðið að stíga um borð í bátana og sigla út á fjörðinn þar sem rennt var fyrir fisk. Þegar í land er komið er fiskurinn grillaður og gestum boðið að smakka. Á bryggjunni standa kátir Kiwanismenn vaktina við flökun og á grillinu. Fiskurinn er svakalega góður og er hann borinn fram með salati.
Á bryggjunni verða hoppukastalar fyrir káta krakka og yfir daginn ómar tónlist á bryggjunni spiluð og leikin af heimamönnum og fjölmargir aðrir viðburðir víðs vegar um bæinn.
Sjáumst á Trilludögum á Siglufirði.
