Fjallabyggð styrkir landssöfnun vegna náttúruhamfaranna á Grænlandi

Fjallabyggð hefur samþykkt að styrkja landssöfnunina Vinátta í verki vegna náttúruhamfaranna á Grænlandi sem urðu þann 18. júní síðastliðinn um 100.000 kr. Það er Hjálparstarf kirkjunnar, í samvinnu við KALAK, Hrókinn og fleiri Grænlandsvini, sem hafa hrundið af stað landssöfnuninni. Sveitarfélögin Skagaströnd, Skagafjörður og Grýtubakkahreppur hafa meðal annars gefið í söfnunina.

Flóðbylgja olli gríðarlegu tjóni í þorpinu Nuugaatsiaq.  Grænlendingar eru næstu nágrannar Íslendinga og milli þjóðanna eru sterk og traust vinarbönd. Þegar snjóflóðið mikla féll á Flateyri 1995 var efnt til landssöfnunar á Grænlandi og safnað hárri upphæð.

Margir eiga nú um sárt að binda á Grænlandi og mikilsvert að þeir finni að Íslendingar eru þeim vinir í raun. Söfnunarfé rennur óskert til neyðarhjálpar og uppbyggingar í samvinnu við sveitarfélagið og hjálparsamtök á svæðinu.

Hjálparstarf kirkjunnar hefur opnað söfnunarreikninginn 0334-26-056200, kennitala 450670-0499. Þá er hægt að hringja í 907-2003 og leggja þannig til 2.500 krónur.