Endurbætur á sundlauginni á Dalvík

Unnið er að miklum endurbótum á sundlauginni á Dalvík. Framkvæmdin er allt frá hreinsibúnaði í kjallara upp á allt sundlaugarsvæðið.  Á sundlaugarsvæði er verið að endurnýja allt svæðið án mikilla breytinga.  Allur klórbúnaður  verður endurnýjaður og verður ekki keyptur tilbúinn klór heldur verður hann framleiddur úr salti á staðnum sem þykir mun heilsusamlegra fyrir notendur sem og starfsfólk.  Ný rennibraut verður ekki tekin í notkun í þessari framkvæmd heldur gera áætlanir ráð fyrir henni á næstu árum.

Helstu breytingar verða:

  • Pottar verða endurnýjaðir og stækkaðir (steyptir).
  • Vaðlaugar verða einangraðar frá vatni sundlaugar og verður því hægt að hafa vatnið í þeim mun heitara en verið hefur til þessa.
  • Bláa lónið (sem staðsett er á milli heitu pottanna) verður einnig einangrað og sett á sjálfstætt stýrikerfi. Með þessu móti verður einnig hægt að hafa hitastig nokkrum gráðum heitara en verið hefur.
  • Öll flísalögn verður endurnýjuð en flísaleggja á potta, vaðlaugar og bláalón að utan og kant í sundlaug.
  • Nýju efni verður sprautað innan í sundlaugarkerið, potta og vaðlaugar. Um er að ræða plastefni sem kemur í stað málningar. Markmiðið er að losna við alla málningu sem er undir vatni og þar með gera vatnið tærara.
  • Litla rennibrautin verður endurnýjuð og sveppurinn verður einnig endurnýjaður eða lagaður.

Hér að ofan eru upptalin þau verkefni sem eru sýnileg á svæðinu. Þessu fylgir að allur hreinsibúnaður í kjallara hússins verður endurnýjaður. Gamla rennibrautin mun áfram verða til staðar þar til ný rennibraut kemur.