Endurbætur á skólalóð Dalvíkurskóla hefst í sumar

Í sumar verður hafist handa við endurbætur á skólalóð Dalvíkurskóla í Dalvíkurbyggð.  Lokið var við að að hanna skólalóðina út frá hugmyndum nemenda og starfsfólks síðastliðið vor og stefnt er að því að framkvæmdum ljúki á næstu þrem árum.  Heildarkostnaður við hönnun og frágang lóðar er áætlaður um 43 milljónir. Þetta kemur fram á vef Dalvíkurbyggðar.

Í fyrsta áfanga verður lagður göngustígur frá nýju sleppisvæði við Mímisveg að skólanum, nýr kastali settur upp og undirlag á leiksvæði norðan við skólann endurnýjað. Þá verður keyptur ærslabelgur (merktur gulur á myndinni) sem staðstettur verður norðan við gervigrasvöllinn.  Búið er að kaupa tvo litla færanlega fótboltavelli með lágum böttum og verður þeim komið fyrir við skólann.

Í öðrum áfanga er m.a. gert ráð fyrir að endurbæta malbiksvellina, fótbolta- og körfuboltavöll auk minni leiktækja og í þriðja áfanga verður hugað að útikennslusvæði við skólann og gróðri.

Á teikningunni með fréttinni má sjá hvernig skólalóðin mun líta út eftir rúm tvö ár þegar framkvæmdum lýkur.

Heimild: dalvik.is