Berjadagar haldnir í Ólafsfirði um Verslunarmannahelgina

Tónlistarhátíðin Berjadagar verður haldin í fyrsta skipti um Verslunarmannahelgi, 1.-4. ágúst næstkomandi. Hátíðin sem haldin verður í tuttugasta og fyrsta sinn í Ólafsfirði fer af stað fimmtudaginn 1. ágúst með kraftmiklu upphafskvöldi. Kvöldið hefst með íslenskum þjóðlögum og hljóðfæraslætti Spilmanna Ríkínís í Ólafsfjarðarkirkju.

Því næst rölta gestir saman yfir í hljómleikasal Menningarhússins Tjarnarborgar þar sem haldið verður áfram inn í norðlenska nótt með bæjarlistamönnunum Guito og Rodrigo sem leiða brasilíska hljómsveit Berjadaga.

Ekki má missa af hátíðarkvöldi með Bjarna Frímanni Bjarnasyni, föstudaginn 2. ágúst en síðar sama kvöld kemur fram tvíeykið Hundur í óskilum undir berum himni. Morgunstund með söng fyrir börn og fullorðna prýðir dagskrá laugardagsins 3. ágúst. Sviðsuppfærsla á 1. þætti La Traviata verður flutt og markar tímamót. Sem fyrr verður gengið með Maríu Bjarney inn í dal til að leggjast í móinn og tína fjallagrös, göngutúr sem fjölskyldan getur notið saman í kyrrð og fegurð fjarðarins. „Hátíðarbrunch“ með djassívafi og Femke Smit á Kaffi Klöru slær botninn í helgina.

Fjöldi listamanna kemur fram á Berjadögum 2019. Þeir eru meðal annars Sigrún Pálmadóttir, Elmar Gilbertsson, Femke Smit, Páll Palomares, Örn Magnússon, Marta Guðrún Halldórsdóttir, Halldór Bjarki Arnarson, Ásta Sigríður Arnardóttir, Bjarni Frímann Bjarnason, Jana Salóme Ingibjargardóttir, Ágúst Ólafsson, Hugi Jónsson, Tómas Haarde, Jón Þorsteinsson, Hanna Þóra Guðbrandsdóttir, Nathalía Druzin Halldórsdóttir, Elfa Dröfn Stefánsdóttir, Edda Björk Jónsdóttir, Björg Jóhannesdóttir, Halla Ólöf Jónsdóttir, Þóra Björnsdóttir, Ingrid Nugteren, Lilja Gísladóttir, Guðrún Ösp Sævarsdóttir, Ólafur Rúnarsson, Örvar Már Kristinsson, Ólöf Sigursveinsdóttir, Diljá Sigursveinsdóttir, Sigursveinn Magnússon, Sigrún Valgerður Gestsdóttir, tvíeykið Hundur í óskilum skipað Hjörleifi Hjartarsyni og Eiríki Stephensen, brasilíska bandið með Rodrigo Lopes, Rodrigo Guito Thomas og Stefáni Daða Ingólfssyni, og að venju leiðir María Bjarney Leifsdóttir gönguna inn Árdalinn.

Framkvæmdastjóri og listrænn stjórnandi: Ólöf Sigursveinsdóttir
Kynningarfulltrúi: Kristín Mjöll Jakobsdóttir

Aðstoð við listræna stjórnun:
Jón Þorsteinsson
Bjarni Frímann Bjarnason

Fylgist með okkur á facebook eða á skilvirkum vef Berjadaga:
www.berjadagar-artfest.com

Berjadagar tónlistarhátíð 2019 er haldin með styrk úr Uppbyggingarsjóði Norðurlands eystra, Bæjarsjóði Fjallabyggðar og Tónlistarsjóði, íbúum af svæðinu og fjárstyrktaraðilum á Norðurlandi.

No photo description available.