All posts by Magnús Rúnar Magnússon

Landanir og losanir á Sauðárkrókshöfn

Á föstudaginn 13. apríl var verið að losa áburð fyrir Skeljung, úr Hollensku flutningaskipi er Waaldijk heitir, samtals um 1.795 tonn. Þar af eru 315 tonn sem átti að skipa upp á Hvammstanga en eru sett á land á Sauðárkróki.

Í vikunni sem leið lönduðu Klakkur SK-5 og Málmey SK-1.  Málmey var með 403 tonn af frosnum afurðum, mest var af karfa eða 160 tonn, 75 tonn af ýsu, 58 tonn af ufsa og 86 tonn af þorski. Einnig var slæðingur af ýmsum öðrum tegundum.  Klakkur var með 107 tonn af fiski. Uppistaðan þorskur, um 82 tonn, 12 tonn ufsi og slattar af öðrum tegundum.  Þá var hann einnig með 7 tonn af þorsklifur.

Grásleppuveiðin gengur bærilega, en þó var eitthvað um að net vöðluðust saman í NA skoti sem gerði fyrripart vikunnar sem leið, en ekkert stórtjón.

Magnaðar myndir frá AK Extreme

AK Extreme snjóbretta- og tónlistarhátíðin var haldin á Akureyri dagana 12.  – 15. apríl og er þetta í sjötta sinn sem hún er haldin.

Dagskráin í ár var afar fjölbreytt og glæsileg. Þrír skemmtistaðir buðu upp á fjölbreytta tónleikadagskrá þ.e. Græni Hatturinn, Pósthúsbarinn og Kaffi Akureyri. Meðal hljómsveita og tónlistarmanna sem að koma fram eru:Agent Fresco, BlazRoca, Oculus, Óli Ofur, Intro Beats, ThizOne, Eldar, The Vintage Caravan, Endless Dark, Elín Ey, Gísli Pálmi, Konni Conga, Þórunn Antónía, Emmsjé Gauti og Captain Fufanu.

Magnaðar ljósmyndir frá Einari Guðmundssyni er að finna hér.

Íþróttavellir á Akureyri koma vel undan vetri

Íþróttavellir á Akureyri komu mjög illa undan vetri á síðasta ári og vegna kalskemmda var ásigkomulag knattspyrnuvalla og golfvallarins að Jaðri einstaklega slæmt. Fyrir vikið þurftu KA, Þór og GA að leggja í umtalsverðan kostnað við lagfæringar á svæðum sínum, en fengu félögin þó styrki frá Akureyrarbæ.

Útlitið í ár er hins vegar mun bjartara og líta vellirnir vel út miðað við árstíma.  Félögin leituðu eftir fjárframlagi frá Akureyrarbæ vegna ástands vallanna í fyrra og lagði bærinn félögunum til milljónir króna vegna þeirra aðgerða sem grípa þurfti til við lagfæringar. Sú vinna, sem framkvæmd var í fyrra, virðist ætla að skila sér vel, auk þess sem veðurfarslegar aðstæður hafa verið betri í ár en í fyrra.

Tímabundin niðurfelling gatnagerðargjalda í Skagafirði

Á fundi sveitarstjórnar Sveitarfélagsins Skagafjarðar 22. febrúar 2011 var samþykkt að fella tímabundið niður gatnagerðargjöld af byggingum íbúðarhúsnæðis af hálfu einstaklinga og verktaka á lóðum við þegar tilbúnar götur á Sauðárkróki, Hofsósi og Varmahlíð. Niðurfellingin tók þegar gildi eftir samþykktina í sveitarstjórn og gildir hún til 1. júlí 2012. Er miðað við að framkvæmdir hefjist fyrir þann tíma en ákvæðið gildir ekki afturvirkt.

Í greinargerð með tillögu meirihluta sveitarstjórnar segir að mikill skortur hafi verið á íbúðarhúsnæði í Sveitarfélaginu Skagafirði að undanförnu. Eigi það bæði við um húsnæði til sölu og ekki síður framboð á leiguíbúðum. Markmið samþykktarinnar er að greiða fyrir því að einstaklingar og fyrirtæki sjái sér hag í að ráðast í byggingu íbúða, parhúsa og einbýlishúsa í sveitarfélaginu.

Þess má geta að í niðurstöðum þjónustukönnunar sem Capacent Gallup gerði fyrir Sveitarfélagið Skagafjörð árið 2009 kom fram að 50% svarenda voru óánægðir með framboð af leiguhúsnæði í sveitarfélaginu.

Á fundi Sveitarstjórnar Sveitarfélagins Skagafjarðar þann 28. mars 2012 var þetta ákvæði framlengt til 1. júlí 2013

Akureyrarstofa auglýsir eftir verkefnastjóra

Akureyrarstofa auglýsir 100% starf verkefnastjóra atvinnumála laust til umsóknar. Æskilegt er að viðkomandi geti hafið störf sem fyrst.
Verkefnastjóri atvinnumála heyrir undir framkvæmdastjóra Akureyrarstofu og er jafnframt starfsmaður verkefnisstjórnar um atvinnumál sem er þverpólitískur vinnuhópur.
Helstu viðfangsefni hópsins eru að móta atvinnustefnu og vera stjórn Akureyrarstofu til ráðgjafar um atvinnumál.

Helstu verkefni:

  • Samstarf og samskipti við hagsmunasamtök, fyrirtæki, einstaklinga og stofnanir
  • Leiða mótun nýrrar atvinnumálastefnu og sinna eftirfylgni hennar
  • Halda utan um atvinnuátaksverkefni á vegum Akureyrarbæjar
  • Gagnaöflun um atvinnulífið á Akureyri og framkvæmd viðhorfskannana
  • Þátttaka í verkefnum á sviði atvinnuþróunar og -uppbyggingar
  • Önnur verkefni sem verkefnastjóra eru falin

    Menntunar- og hæfniskröfur:

  • Háskólapróf sem nýtist í starfi
  • Þekking á atvinnulífi svæðisins æskileg
  • Reynsla af þátttöku í atvinnuuppbyggingu og/eða atvinnuþróun æskileg
  • Stjórnunar- og skipulagshæfileikar
  • Góð tölvufærni og geta til að vinna með tölulegar upplýsingar
  • Góð íslensku- og enskukunnátta og geta til að tjá sig í ræðu og riti
  • Sjálfstæði og frumkvæði í vinnubrögðum
  • Jákvæðni og hæfni í mannlegum samskiptum

    Tekið verður tillit til samþykktar bæjarstjórnar Akureyrar um jafnréttismál við ráðningu í starfið. Laun eru samkvæmt kjarasamningi sambands íslenskra sveitarfélaga og viðkomandi stéttarfélags.

    Á Akureyrarstofu fer fram fjölbreytt og öflugt starf en hún heldur utan um atvinnumál, markaðs- og ferðamál og menningarmál fyrir Akureyrarbæ.
    Megináhersla er lögð á að örva kraft og frumkvæði einstaklinga, fyrirtækja og stofnana, finna þeim farveg og koma á samstarfi aðila sem geta gert góðar hugmyndir að veruleika. Akureyrarstofa er til húsa í menningarhúsinu Hofi og eru starfsmenn fimm talsins.

    Umsjón með ráðningu

    Jónína Guðmundsdóttir – jonina.gudmundsdottir@capacent.is
    Sigríður Pétursdóttir – sigridur.petursdottir@capacent.is

    Umsóknafrestur til og með:

    25. apríl 2012

Markaðsetning ferðaþjónustufyrirtækja á Norðurlandi

Yfir 200.000 Íslendingar eru komnir á Facebook og 800 milljónir manna á heims vísu. Yfir 5 milljarðar mynda eru á flickr.com. YouTube er önnur vinsælasta leitarvélin. Tækifærin fyrir markaðssetningu eru gríðarleg, en hætturnar eru líka margar og fyrirtækjum gengur mjög misvel að fóta sig þar.

Fimmtudaginn 26.apríl stendur Markaðsstofa Norðurlands fyrir námskeiði í markaðssetningu á samfélagsmiðlunum. Námskeiðið verður haldið á Hótel KEA frá kl. 09-17.  Á námskeiðinu verður farið yfir hvaða breytingar eru að eiga sér stað og hvað þær þýða, hvernig hægt er að nýta Facebook, twitter, foursquare, flickr, youtube og aðra miðla til þess að breiða út boðskapinn og byggja upp sterkt vörumerki.

Fyrirlesari er Hjörtur Smárason sem unnið hefur við markaðssetningu á netinu frá 1997. Hjörtur hefur haldið námskeið og fyrirlestra um efnið víða um heim og kennir markaðsfræði og nýsköpun við Háskólann á Hólum.
Verðið er 28.000 kr. fyrir samstarfsfyrirtæki Markaðsstofunnar en 38.000 fyrir aðra.

Nánari upplýsingar á skráning hjá Kötu í síma 462-3300 eða á netfangið kata@nordurland.is

Flottir tónleikar í Miðgarði í byrjun Sæluvikunnar

Spennandi tónleikar verða í Menningarhúsinu Miðgarði í byrjun Sæluviku, þann 27. apríl.

Söngvarar eru; Guðrún Gunnarsdóttir, Óskar Pétursson, Sigvaldi Helgi Gunnarsson, Herdís  Rútsdóttir, Kolbrún Grétarsdóttir, Sigurlína Einarsdóttir,Íris Lúðvíksdóttir, Álftagerðisbræður og Unglingakór Varmahlíðarskóla.
Hljómsveit: Stefán R. Gíslason, Einar Þorvaldsson, Kristján Reynir
Kristjánsson, Margeir Friðriksson, Guðbrandur Guðbrandsson, Sveinn
Sigurbjörnsson og Berglind Stefánsdóttir.
Kórstjóri barnakórsins: Helga Rós Sigfúsdóttir
Kynnir: Jón Hallur Ingólfsson

Námskeið í Fyrstu hjálp 1 á vegum Skagfirðingasveitar

Námskeið í Fyrstu hjálp 1 verður haldið í Sveinsbúð á vegum Björgunarsveitarinnar Skagfirðingasveitar.

Námskeiðin verða dagana:

  • Mánudaginn 16. apríl kl 18-22
  • Þriðjudaginn 17. apríl kl 18-22
  • Sunnudaginn 22. apríl kl 10-17
  • Mánudaginn 23. apríl kl 18-22

Skráning með því að senda sms í síma 892-6073 (Ásta Birna Jónsdóttir).

Heimasíða sveitarinnar er www.bjargari.is

Endurskoðun á húsaleigu fasteigna í Skagafirði

Endurskoðun hefur verið gerð á  húsaleigu fasteigna sveitarfélagsins Skagafjarðar.  Undanfarin misseri  hafa leigusamningar einungis verið gerðir til sex mánaða í senn, svo réttur leigjenda til húsaleigubóta tapaðist ekki.  Sveitarstjórn samþykkt 28. mars 2012 nýjar reglur um húsnæðismál. Frá og með 1. apríl 2012 verður farið eftir þessum nýju reglum við endurnýjun eldir leigusamninga og við gerð nýrra.

Með þessum aðgerðum er verið að færa leiguverð íbúða sveitarfélagsins Skagafjarðar nær því sem gerist á almennum markaði í sveitarfélaginu.  Telja má að í einhverjum tilfellum verði hækkunin töluverð, en á móti kemur að réttur þeirra sem leigja á s.k. félagslegum forsendum verður skýrari og hafa ber í huga að húsaleigubætur hækka á móti hjá þeim sem þann rétt eiga.  Greint er á milli almennrar leigu og félagslegrar leigu.

Í reglunum er almenn húsaleiga fyrir hvern fermetra  ákvörðuð kr. 950 frá og með 1. apríl 2012 (eða síðar við endurnýjun gildandi leigusamninga).  Hámark almennrar mánaðarleigu er kr. 112.500.

Þeir leigjendur sem uppfylla skilyrði sem þarf til félagslegrar leigu, leigja fermetrann á 20% lægra verði, kr. 760.  Hámark þeirrar leigu er kr. 90.000 á mánuði. Athugið að leiguupphæð fylgir  íbúðarstærð (fjölda fermetra).

Ef leigjandi telur eða vill láta á reyna hvort hann eigi rétt á félagslegri leigu, skal hann panta viðtal hjá félagsráðgjafa sveitarfélagsins.

Reglurnar eru aðgengilegar hér á heimasíðu sveitarfélagsins.  Þeir sem ekki hafa aðgang að tölvu geta óskað eftir því að fá þær sendar bréfleiðis. Félagsmálastjóri veitir frekari upplýsingar í síma 455 6000.

ÍR vann Tindastól í Lengjubikarnum

ÍR vann 2-1 sigur á Tindastóli í Lengjubikar karla í gærkvöld. Spilað var á gervigrasinu í Breiðholtinu.

Fyrir leikinn var ljóst að liðin myndu enda í neðstu tveimur sætum riðilsins og það lið sem myndi vinna yrði í næst neðsta sæti.

Axel Kári Vignisson kom ÍR -ingum yfir með furðumarki þegar fyrirgjöf hans utan af kanti fór yfir markvörð Tindastóls og í markið.

Guðjón Gunnarsson bætti svo við öðru marki þegar hann fylgdi eftir skoti sem markvörður Tindastóls hafði varið og þrumaði í þaknetið.

Tindastóll minnkaði svo muninn en þar var að verki Theodore Furness sem kom til félagsins á dögunum. Markið var eins undarlegt og það fyrsta í leiknum því hann skoraði beint úr hornspyrnu.

Þetta var fyrsti og eini sigur ÍR í riðlinum og enda þeir því með þrjú stig. Tindastóll endar með eitt stig eftir að hafa aðeins náð einu jafntefli úr sjö leikjum.
ÍR 2-1 Tindastóll:
1-0 Axel Kári Vignisson
2-0 Guðjón Gunnarsson
2-1 Theodore Eugene Furness

1 Keflavík 7 6 0 1 20  –    9 11 18
2 ÍA 7 5 1 1 19  –    8 11 16
3 Víkingur R. 7 3 3 1 16  –    8 8 12
4 Stjarnan 7 3 2 2 13  –  12 1 11
5 ÍBV 6 3 0 3 14  –  10 4 9
6 KA 6 2 1 3 11  –    9 2 7
7 ÍR 7 1 0 6   6  –  18 -12 3
8 Tindastóll 7 0 1 6   3  –  28 -25 1

Heimild: Fótbolti.net

Hlíðarendavöllur í frábæru ástandi eftir veturinn

Sjaldan eða aldrei hefur golfvöllurinn komið betur undan vetri en nú. Vakin er athygli á því að völlurinn er opinn, en einungis fyrir félagsmenn.

Mjög mikilvægt er að félagsmenn lagi boltaför á flötum, á því hefur verið mikill misbrestur. Einnig að laga kylfuför á brautum og færa úr bleytu yfir í karga þar sem hætta er á skemmdum. Jafnframt er ætlast til þess að fólk fari ekki með kerrur inn á völlinn, heldur beri kylfurnar. Völlurinn er ennþá í viðkvæmu ástandi og mikilvægt að gæta að honum okkar allra vegna.

Æfingasvæðið verður opið um helgina og boltavélin í gangi.

Húsavíkurflug hefst, ekkert bólar á flugi til Sauðárkróks ennþá

Áætlunarflug um Húsavíkurflugvöll hefst að nýju á sunnudag en ekki hefur verið flogið þangað í 12 ár. Það er flugfélagið Ernir sem mun bjóða upp á ferðir þangað fjóra daga vikunnar.

Flugfélag Íslands flaug á Húsavíkurflugvöll í Aðaldal fram til 1998 en eftir það hélt Mýflug upp áætlunarflugi þangað fram til ársins 2000. Tólf ár eru því síðan áætlunarflug um völlinn lagðist af en á sunnudag verður breyting þar á þegar flugfélagið Ernir flýgur fyrstu áætlunarferð sína þangað, en félagið mun í sumar bjóða upp á sjö ferðir á viku, fjóra daga vikunnar, milli Reykjavíkur og Húsavíkur. Ásgeir Örn Þorsteinsson er sölu- og markaðsstjóri flugfélagsins.

„Við erum búnir að vera að skoða möguleikann með Húsavík í töluverðan tíma, nokkur ár og við sáum einfaldlega tækifæri í stöðunni núna. Þannig að það eru bæði heimamenn og ferðaiðnaðurinn sem kveikti í okkur og fékk okkur til þess að starta flugi á Húsavík.”

Bókanir hafa farið vel af stað að sögn Ásgeirs og viðtökur ferðageirans hafa ekki síst verið góðar.

„Þetta er í boði fram á haustið og munum við taka ákvörðun vonandi bara um mitt sumar hvort að áframhald verði en það veltur á heimamönnum að mestu leyti og fyrirtækjum að nýta flugið til þess að hægt sé að halda þessu gangandi yfir veturinn.”

Heimild: Rúv.is

Jarðstrengur of dýr um Skagafjörð

Þórður Guðmundsson, forstjóri Landsnets, segir að ekki komi til greina miðað við núverandi aðstæður að leggja nýja Blöndulínu í jarðstreng um Skagafjörð. Landeigendur þar segjast ekki munu leyfa lagningu loftlínu yfir þeirra lönd.

Landsnet undirbýr nú lagningu nýrrar 220 kílóvolta háspennulínu frá Blönduvirkjun til Akureyrar, Blöndulínu 3. Með henni á að styrkja flutningskerfið því núverandi byggðalína uppfyllir ekki lengur kröfur um flutningsgetu. Tvær tillögur eru um lagningu línunnar um Skagafjörð og gerir önnur ráð fyrir svokallaðri Efribyggðarleið. Landeigendur þar hafa lýst því yfir að þeir muni alfarið hafna lagningu loftlínu og benda þess í stað á lagningu jarðstrengs.

Þórður segist þeirrar skoðunar að Landsnet geti ekki með góðu móti hafið þá vegferð að leggja jarðstrengi á alhæstu spennum vegna þess mikla kostnaðarmunar sem sé á milli línulagningar og jarðstrengs.

Þórður bendir á að nær allar nýjar lagnir fyrir lægri spennu séu í formi jarðstrengja. Blöndulína 3 verði hinsvegar ekki byggð fyrir lægri spennu en 220 kílóvolt og miðað við núverandi aðstæður muni kostnaður við slíkan jarðstreng hafa veruleg áhrif á flutningsverð raforku til lengri tíma litið. Hinsvegar liggi fyrir Alþingi þingsárlyktunartillaga um frekari jarðstrengjavæðingu, niðurstöðu þar sé að vænta næsta haust.

Þórður segir að ekkert sé þannig í pípunum að rjúka þurfi af stað í þetta verkefni að leggja Blöndulínu 3. Landsnet vilji gera það sem allra fyrst en geti alveg beðið í einhverja mánuði í viðbót eftir því að taka skynsamlega ákvörðun.

Heimild: Rúv.is

Stebbi og Eyfi með tónleika í Skagafirði í apríl

Tveir af mestu lagahöfundum Íslands, þeir  Stefán Hilmarsson og Eyjólfur Kristjánsson, Stebbi og Eyfi, verða með tónleika í Sauðárkrókskirkju miðvikudaginn 25. apríl kl. 20:30. Kapparnir eru á tónleikaferð um landið og flytja nokkrar notalegar ábreiður í bland við annað efni sem þeir hafa flutt í gegnum tíðina.

Þeir verða einnig með tónleika í Hofsósskirkju fimmtudaginn 26. apríl kl. 20:30.

Stefán og Eyjólfur hafa starfað saman í áratugi og komu meðal annars fram í Eurovison fyrir Íslands hönd árið 1991 með lagið Nína. Þá hafa þeir gefið undanfarin ár út plöturnar “Nokkrar notalegar ábreiður” og “Fleiri notalegar ábreiður”

Sauðburður hafinn í Skagafirði

Sauðburður hefst ekki fyrr en í maí á flestum bæjum, en á Minni-Ökrum í Skagafirði hófust vorverkin óvenju snemma í ár og þar skoppa nú nýfædd lömb í túni.

Fyrsta lambið komin í heiminn þann 22. mars og síðan hafa 33 ær borið. Lömbin á Minni-Ökrum eru því orðin 63 talsins.

Þar sem hrútarnir voru teknir frá ánum þremur dögum seinna en vanalega segist Vagn Þormar Stefánsson, bóndi á Minni-Ökrum, hafa reiknað með því að hann fengi nokkur snemmborin lömb.

Hann grunaði hinsvegar ekki að þau yrðu svona mörg. Sauðburðurinn hefur gengið vel að hans sögn og náttúran hefur tekið blíðlega á móti ungviðinu með nýsprottnu grasi í túnum.

Heimild: Rúv.is

Ljósmynd: Sauðárkrókur.is

Skagfirskur stúlknakór gerir það gott

Stúlknakórinn Draumaraddir Norðursins í Skagafirði syngja um súkkulaðilandið sem margir hafa eflaust heimsótt um páskana.

Undir styrkri stjórn Alexöndru Chernyshova hafa stelpurnar náð miklum árangri, ferðast út um allan heim til að syngja og gáfu nýlega út geisladisk þar sem bjartar og fallegar raddir þeirra njóta sín. Alexandra segir stelpurnar vera svona flinkar söngkonur því þær æfa sig stíft en þó er gleðin og ánægjan alltaf í fyrirrúmi. Þarna eru saman komnar söngstjörnur framtíðarinnar enda hafa stelpurnar mikinn metnað til að verða fullnuma í sönglistinni.

Heimasíða stúlknakórsins er hér.
http://www.dreamvoices.is/pages.php?idpage=10915

Heimild: Rúv.is

Tindastóll spilar við ÍR á föstudaginn á ÍR-velli

Tindastóll og ÍR eigast við Lengjubikarnum í knattspyrnu karla í Reykjavík föstudaginn 13. apríl klukkan 19. Leikurinn fer fram á ÍR-vellinum í Breiðholti. Þetta er baráttan um botnsætið en hvorugu liðinu hefur gengið vel A-deild,2. riðli í Lengjubikarnum í ár. ÍR situr á botninum með 0 stig en Tindastóll er með 1 stig. Bæði lið hafa leikið 6 leiki. Tindastóll hefur náð einu jafntefli og tapað 5 leikjum, skorað 2 mörk og fengið á sig 26.

Vonandi verður þetta leikurinn sem verður upphafið af góðu sumri í boltanum. Hvetjum alla til að mæta og styðja sína menn.

Landeigendur í Skagafirði vilja Blöndulínu í jörðina

Mikil óánægja er meðal landeigenda í Skagafirði með að leggja eigi tvö hundruð og tuttugu kílóvolta loftlínu frá Blöndustöð að Akureyri. Landeigendur munu ekki leyfa að línan verði lögð yfir þeirra lönd, segir fulltrúi þeirra.

Landsnet hyggst leggja 200 kílóvolta loftlínu frá Blöndustöð til Akureyrar, svokallaða Blöndulínu, sem yrði samtals 107 kílómetra löng. Línan á meðal annars að liggja um svokallaða Efribyggðarleið í Skagafirði, en samkvæmt frummatsskýrslu er gert ráð fyrir talsvert neikvæðum áhrifum á nokkrum bæjum þar, frá Kolgröf að Brúnastöðum, vegna nálægðar við línuna.

Helga Rós Indriðadóttir, fulltrúi landeigenda, segir kröfu þeirra þá að línan verði lögð í jörð.

„Hins vegar er það ljóst að 220 kílóvolta lína er ansi hreint ríflegt til að sinna raforkuþörf almennings. Hér er um að ræða línu sem mun þjóna hagsmunum stóriðju.“

Landsnet segir hins vegar að tilgangurinn sé að styrkja flutningskerfið. Núverandi byggðalína fullnægi ekki þeim kröfum sem séu gerðar. Helga Rós segir að athugasemdir verði sendar við þessar áætlanir.

„Landeigendur hér munu hafna þessu. Þeir munu ekki leyfa það að loftlína verði lögð í gegnum þeirra lönd.“

Heimild: Rúv.is

Körfuboltamót Molduxa í Skagafirði í maí

Hið árlega vormót Molduxa  í körfuknattleik verður  haldið laugardaginn 5. maí. 2012. Mótið er fyrir körfuknattleikslið  40 ára og eldri hjá körlum og fyrir kvennalið 20 ára og eldri. Stefnt er að því að mótið byrji klukkan  12 á laugardegi og er leiktíminn 2 x 12 mínútur og leikur hvert lið 3- 4 leiki.

Hægt er að skrá lið og fá nánari upplýsingar hjá Alla Munda á allimunda@internet.is  eða í síma 865-0819 og lýkur  skráningu 25. apríl. Þess skal getið að mótið er hluti af sæluvikugleði í Skagafirði þannig að nóg er um að vera um þessa helgi á Sauðárkróki.

Heimasíða Molduxa er www.molduxar.is

Skíðasvæðið í Tindastóli opið í dag

Skíðasvæðið í Tindastóli verður opið til klukkan 16 í dag. Núna er snjókoma og hægviðri þessa stundina og færið er alveg ágætt.  Það er um að gera að nota nú páskafríið vel og drífa sig á skíði.

  • kl. 10:00 til 16:00 Opið á skíðasvæðinu.
  • Troðin göngubraut bara fyrir alla.
  • Mætum í eftirtektarverðum fötum 
  • kl. 12.00   Paint ball skotið í mark, verð 1000 kr hver 100 skot
  • kl. 13.00   Þrautabraut fyrir 8 ára og yngri allir fá páskaegg að loknum tveimur ferðum.
  • kl. 13.00   Hæfnisbraut á brettum, páskaegg í verðlaun,  mikið hlegið.  
  • Kl. 14:00   Snjóþotu- og sleðarall – Músík í fjallinu.

Tónleikar á Mælifelli og Kaffi Krók í kvöld

Á Mælifelli í kvöld á Sauðárkróki verða hinir þrautreyndu tónlistarsnillingar Gylfi Ægisson, Rúnar og Megas sem halda tónleika frá kl. 22 í kvöld.

Á morgun Páskadag munu Sigga, Grétar og Pétur úr Stjórninni halda Tónleika á Mælifelli en húsið opnar skömmu eftir miðnætti.

Í kvöld á Kaffi Krók er Trúbbastemning og tilboð á barnum. Opið er til kl. 3 í nótt.

Torfhleðslu- og grindarnámskeið

Fyrirhugað er að halda torfhleðslu- og grindarnámskeið á Tyrfingsstöðum á Kjálka, á vegum Fornverkaskólans, dagana 7. til 10. júní 2012 í samstarfi við heimamenn og Byggðasafn Skagfirðinga.

Kennarar á námskeiðinu verða Helgi Sigurðsson hjá Fornverki ehf. og Bragi Skúlason húsasmíðameistari. Verkefni námskeiðsins verður m.a. að hlaða torfveggi baðstofunnar og smíða einfalda húsgrind, úr timbri.

Nánari upplýsingar um námskeiðið er að finna á heimasíðu Fornverkaskólans og hægt er að skrá sig á námskeiðið hjá Bryndísi í síma 453 5097 eða á netfangið bryndisz@skagafjordur.is .

Öflugur 10.flokkur drengja í körfubolta hjá Tindastóli

Strákarnir í 10. flokki Tindastóls í körfubolta kepptu á sínu síðasta móti á Sauðárkróki um s.l. helgi. Þeir unnu alla sína andstæðinga örugglega og þar með B-riðilinn.

Að sögn Kára Maríssonar þjálfara kom honum mest á óvart hversu yfirburðirnir voru miklir en segir það merki um að menn eru í stöðugri framför. Sannarlega jákvæður og góður endir hjá strákunum.

Úrslit leikjanna:

  • Tindastóll- Hamar/Þór   70-39
  • Tindastóll-Fjölnir b          82-48
  • Tindastóll-Breiðablik     70-44
  • Tindastóll-Fjölnir             80-40

Stigaskor leikmanna: Viðar 57, Pétur 55, Hannes 37, Finnbogi 30, Bjarni 22, Haukur 20, Kristinn 18, Friðrik Hrafn 14, Sigurður Óli 9, Elvar 9, Sighvatur 7, Óli Björn 6,Ingi 6, Ágúst 2.

 

Kári mun nú setja saman 6 lið úr öllum flokkum sínum; 9. 10. og 11. og spila mót út apríl og klára aprílmánuð með einstaklingskeppnum í þrautabraut, þriggja stiga skotum og stinger.

Heimild: Tindastoll.is

Skíðasvæðið í Tindastóli opið í dag

Skíðasvæðið í Tindastóli verður opið frá kl 10 til 16 í dag. Enn er nægur snjór hér til að renna sér á svo það er um að gera drífa sig í fjallið og skemmta sér. Veður klukkan 8:45 hægviðri hiti+ 3c og skýjað.

Dagskráin í dag í Tindastóli:

  • Kl. 10:00 – 16:00 Opið á skíðasvæðinu í Tindastóli – Músík í fjallinu.
  • Troðin göngubraut fyrir styttra og lengra komna.
  • kl.12:00 til 14:00 Paint ball skotið í mark, athugið verð: 1000kr hver 100 skot
  • kl. 13:00 til 15:00 þrautabraut á brettum

 

Dagskráin á Páskadag í Tindastóli:

 

Páskadagur 8. apríl

  • kl. 10:00 til 16:00 Opið á skíðasvæðinu.
  • Troðin göngubraut bara fyrir alla.
  • Mætum í eftirtektarverðum fötum 
  • kl. 12.00     Paint ball skotið í mark, verð 1000 kr hver 100 skot
  • kl. 13.00     Þrautabraut fyrir 8 ára og yngri allir fá páskaegg að loknum tveim ferðum.
  • kl. 13.00     Hæfnisbraut á brettum páskaegg í verðlaun,  mikið hlegið.  
  • Kl. 14:00     Snjóþotu- og sleðarall – Músík í fjallinu.

Meistarakeppni Norðurlands

Bjarni Jónasson fagnaði sigri á lokakvöldi Meistaradeildar Norðurlands sem fram fór í Svaðastaðahöllinni á Sauðárkróki í vikunni en keppt var í slaktaumatölti og skeiði.

Keppnin var æsispennandi og á endanum voru það fimm sekúndubrot sem réðu úrslitum. Mesta baráttan stóð á milli Bjarna Jónassonar sem hafði fyrir lokakvöldið 22 stig og Sölva Sigurðarsonar sem var með einu stigi minna. Sölvi endaði svo einu sæti ofar en Bjarni í fyrri keppnisgrein kvöldsins, slaktaumatölti, og þeir voru jafnir fyrir lokagreinina sem var skeið.

Mette Mannseth á Þúsöld frá Hólum rann skeið sprettinn á fimm sekúndum sléttum. Hestur Sölva, Steinn frá Bakkakoti, lá ekki í fyrri ferð en Bjarni og Hrappur frá Sauðárkróki náðu frábærum tíma 5,09 og settu pressu á Sölva fyrir seinni umferðina. Mette bætti tímann í 4,96 en Sölvi jafnaði tíma Bjarna og Hrapps og spennan í loftinu var mikil. Seinni sprettur Bjarna og Hrapps var magnaður og tíminn 5,04 sem tryggði honum sigur í heildarstigakeppni Meistaradeildar Norðurlands þetta árið.

Atvinnumál kvenna úthlutar styrkjum

Kanína ehf, fyrirtæki Birgit Kositzke á Hvammstanga, fékk 1,5 milljón króna styrk úr úthlutun styrkja til atvinnumála kvenna sem fram fór í vikunni en alls hlutu 36 verkefni styrk að upphæð alls 26 milljónum króna. Þá hlaut Guðbjörg Guðmundsdóttir frá Sauðárkróki 850 þúsund króna styrk fyrir verkefnið “Járnviðja – færanlegur skjólveggur”. Einnig hlaut Hildur Þóra Magnúsdóttir frá Skagafirði 400 þús. kr. styrk fyrir verkefnið “Culture tasting”.

Alls fóru 22 styrkir fóru til kvenna á höfuðborgarsvæðinu en 14 til kvenna á landsbyggðinni og eru styrkirnir veittir til markaðssetningar, vöruþróunar, launakostnaðar og ennfremur til gerðar viðskiptaáætlana.

Hæstu styrkina hlutu Icelandic Cinema online, 2.000.000 vegna vöruþróunar verkefnisins Icelandic film locations og Tungumál og menning, 1.600.000 vegna verkefnisins Lifandi tungumálakennsla. Þriðja hæsta styrkinn hlaut Birgit Kositzke á Hvammstanga vegna uppbyggingar kanínuræktar.

Styrkir voru til fjölbreyttra verkefna og má þar nefna styrk til þarabaða á Reykhólum, vegna baðvörulínu, bílabingós, framleiðslu á duftkerum, til framleiðslu jurtakryddsalts úr íslensku salti, handtuftaðra motta, markaðssetningu prjónaferða, snúningslaka, færanlegs skjólveggur, heilsukodda og ostagerðar.

Sjá má lista yfir styrkhafa ársins 2012 með því að smella hér.

Sumarstörf í Húnaþingi vestra

Flokkstjórar í Vinnuskóla
Í starfinu felst skipulagning og stýring á vinnuhópum unglinga á aldrinum 13 til 16 ára við ýmis garðyrkjustörf o.fl. einnig leiðsögn, hópefli og hvatning til góðra verka. Hæfniskröfur: Æskilegur aldur 20 ár eða eldri, menntun og reynsla í störfum tengdum ungu fólki.
Mikilvægt er að umsækjendur séu stundvísir, samviskusamir og góðar fyrirmyndir unglingana. Hafi góða þjónustulund og hæfni í mannlegum samskiptum. Áhugi af garðyrkjustörfum nauðsynlegur.

Flokkstjóri við slátt
Flokkstjóri ber ábyrgð á sláttuhóp og stýrir á verkstað, gerir vinnuskýrslur fyrir hópinn og hefur umsjón með vélum og búnaði sláttuhóps. Hæfniskröfur: umsækjendur skulu vera 20 ára eða eldri og bílprófs er  krafist. Flokkstjóri skal vera stundvís, jákvæður, lipur og eiga auðvelt með að vinna með öðru fólki. starfsreynsla af garðyrkjustörfum nauðsynleg.

Daglegur vinnutími er virka daga frá kl. 8:00-17:00.

Grassláttur og almenn garðyrkjustörf.
Umsækjendur sjái um grasslátt á opnum svæðum sveitarfélagsins og sinni almennum garðyrkjustörfum einnig. Umsækjendur skulu vera 17 ára eða eldri.
Krafist er stundvísi, ástundar og dugnaðar.

Daglegur vinnutími er virka daga frá kl. 08:15-16:15.

Frekari upplýsingar veitir Ína Björk Ársælsdóttir Umhverfisstjóri í síma: 455-2400.

Almenn verkamannastörf í Áhaldahúsi
Meðal starfa eru  ýmis viðhaldsverkefni á vegum sveitarfélagsins, s.s veitur og fl. Reynsla og hæfniskröfur: Umsækjendur skulu vera fæddir 1994 eða fyrr og nauðsynlegt er að þeir hafi bílpróf og dráttarvélapróf, reynsla af sambærilegu starfi er kostur, Samviskusemi og stundvísi.

Daglegur vinnutími er virka daga frá kl. 08:00-17:00.

Frekari upplýsingar veitir Guðmundur Erlendsson verkstjóri í síma: 894-2909.

Skriflegri umsókn skal skilað á skrifstofu Húnaþings vestra fyrir 15. apríl næstkomandi. Íumsókninni þarf að koma fram; Almennar upplýsingar, menntun, fyrri störf og annað sem umsækjandi telur viðeigandi. Frekari upplýsingar og upplýsingar um launakjör eru veittar á skrifstofu Húnaþings vestra í síma 455-2400

Golfklúbbur Sauðárkróks: Æfingasvæðið opið !

Nú geta Skagfirskir kylfingar farið að munda kylfurnar því æfingasvæðið hjá Golfklúbbi Sauðárkróks er opið og vor í lofti. Um páskanna verður boltavélin í gangi. Þeim sem vantar token í vélina er bent á að hafa samband við Pétur Friðjónsson eða Mugg vallarstjóra og þeir munu bjarga málum.

Heimasíða Golfklúbbs Sauðárkróks er hér.