All posts by Magnús Rúnar Magnússon

Húsavíkurflug hefst, ekkert bólar á flugi til Sauðárkróks ennþá

Áætlunarflug um Húsavíkurflugvöll hefst að nýju á sunnudag en ekki hefur verið flogið þangað í 12 ár. Það er flugfélagið Ernir sem mun bjóða upp á ferðir þangað fjóra daga vikunnar.

Flugfélag Íslands flaug á Húsavíkurflugvöll í Aðaldal fram til 1998 en eftir það hélt Mýflug upp áætlunarflugi þangað fram til ársins 2000. Tólf ár eru því síðan áætlunarflug um völlinn lagðist af en á sunnudag verður breyting þar á þegar flugfélagið Ernir flýgur fyrstu áætlunarferð sína þangað, en félagið mun í sumar bjóða upp á sjö ferðir á viku, fjóra daga vikunnar, milli Reykjavíkur og Húsavíkur. Ásgeir Örn Þorsteinsson er sölu- og markaðsstjóri flugfélagsins.

„Við erum búnir að vera að skoða möguleikann með Húsavík í töluverðan tíma, nokkur ár og við sáum einfaldlega tækifæri í stöðunni núna. Þannig að það eru bæði heimamenn og ferðaiðnaðurinn sem kveikti í okkur og fékk okkur til þess að starta flugi á Húsavík.”

Bókanir hafa farið vel af stað að sögn Ásgeirs og viðtökur ferðageirans hafa ekki síst verið góðar.

„Þetta er í boði fram á haustið og munum við taka ákvörðun vonandi bara um mitt sumar hvort að áframhald verði en það veltur á heimamönnum að mestu leyti og fyrirtækjum að nýta flugið til þess að hægt sé að halda þessu gangandi yfir veturinn.”

Heimild: Rúv.is

Jarðstrengur of dýr um Skagafjörð

Þórður Guðmundsson, forstjóri Landsnets, segir að ekki komi til greina miðað við núverandi aðstæður að leggja nýja Blöndulínu í jarðstreng um Skagafjörð. Landeigendur þar segjast ekki munu leyfa lagningu loftlínu yfir þeirra lönd.

Landsnet undirbýr nú lagningu nýrrar 220 kílóvolta háspennulínu frá Blönduvirkjun til Akureyrar, Blöndulínu 3. Með henni á að styrkja flutningskerfið því núverandi byggðalína uppfyllir ekki lengur kröfur um flutningsgetu. Tvær tillögur eru um lagningu línunnar um Skagafjörð og gerir önnur ráð fyrir svokallaðri Efribyggðarleið. Landeigendur þar hafa lýst því yfir að þeir muni alfarið hafna lagningu loftlínu og benda þess í stað á lagningu jarðstrengs.

Þórður segist þeirrar skoðunar að Landsnet geti ekki með góðu móti hafið þá vegferð að leggja jarðstrengi á alhæstu spennum vegna þess mikla kostnaðarmunar sem sé á milli línulagningar og jarðstrengs.

Þórður bendir á að nær allar nýjar lagnir fyrir lægri spennu séu í formi jarðstrengja. Blöndulína 3 verði hinsvegar ekki byggð fyrir lægri spennu en 220 kílóvolt og miðað við núverandi aðstæður muni kostnaður við slíkan jarðstreng hafa veruleg áhrif á flutningsverð raforku til lengri tíma litið. Hinsvegar liggi fyrir Alþingi þingsárlyktunartillaga um frekari jarðstrengjavæðingu, niðurstöðu þar sé að vænta næsta haust.

Þórður segir að ekkert sé þannig í pípunum að rjúka þurfi af stað í þetta verkefni að leggja Blöndulínu 3. Landsnet vilji gera það sem allra fyrst en geti alveg beðið í einhverja mánuði í viðbót eftir því að taka skynsamlega ákvörðun.

Heimild: Rúv.is

Stebbi og Eyfi með tónleika í Skagafirði í apríl

Tveir af mestu lagahöfundum Íslands, þeir  Stefán Hilmarsson og Eyjólfur Kristjánsson, Stebbi og Eyfi, verða með tónleika í Sauðárkrókskirkju miðvikudaginn 25. apríl kl. 20:30. Kapparnir eru á tónleikaferð um landið og flytja nokkrar notalegar ábreiður í bland við annað efni sem þeir hafa flutt í gegnum tíðina.

Þeir verða einnig með tónleika í Hofsósskirkju fimmtudaginn 26. apríl kl. 20:30.

Stefán og Eyjólfur hafa starfað saman í áratugi og komu meðal annars fram í Eurovison fyrir Íslands hönd árið 1991 með lagið Nína. Þá hafa þeir gefið undanfarin ár út plöturnar “Nokkrar notalegar ábreiður” og “Fleiri notalegar ábreiður”

Sauðburður hafinn í Skagafirði

Sauðburður hefst ekki fyrr en í maí á flestum bæjum, en á Minni-Ökrum í Skagafirði hófust vorverkin óvenju snemma í ár og þar skoppa nú nýfædd lömb í túni.

Fyrsta lambið komin í heiminn þann 22. mars og síðan hafa 33 ær borið. Lömbin á Minni-Ökrum eru því orðin 63 talsins.

Þar sem hrútarnir voru teknir frá ánum þremur dögum seinna en vanalega segist Vagn Þormar Stefánsson, bóndi á Minni-Ökrum, hafa reiknað með því að hann fengi nokkur snemmborin lömb.

Hann grunaði hinsvegar ekki að þau yrðu svona mörg. Sauðburðurinn hefur gengið vel að hans sögn og náttúran hefur tekið blíðlega á móti ungviðinu með nýsprottnu grasi í túnum.

Heimild: Rúv.is

Ljósmynd: Sauðárkrókur.is

Skagfirskur stúlknakór gerir það gott

Stúlknakórinn Draumaraddir Norðursins í Skagafirði syngja um súkkulaðilandið sem margir hafa eflaust heimsótt um páskana.

Undir styrkri stjórn Alexöndru Chernyshova hafa stelpurnar náð miklum árangri, ferðast út um allan heim til að syngja og gáfu nýlega út geisladisk þar sem bjartar og fallegar raddir þeirra njóta sín. Alexandra segir stelpurnar vera svona flinkar söngkonur því þær æfa sig stíft en þó er gleðin og ánægjan alltaf í fyrirrúmi. Þarna eru saman komnar söngstjörnur framtíðarinnar enda hafa stelpurnar mikinn metnað til að verða fullnuma í sönglistinni.

Heimasíða stúlknakórsins er hér.
http://www.dreamvoices.is/pages.php?idpage=10915

Heimild: Rúv.is

Tindastóll spilar við ÍR á föstudaginn á ÍR-velli

Tindastóll og ÍR eigast við Lengjubikarnum í knattspyrnu karla í Reykjavík föstudaginn 13. apríl klukkan 19. Leikurinn fer fram á ÍR-vellinum í Breiðholti. Þetta er baráttan um botnsætið en hvorugu liðinu hefur gengið vel A-deild,2. riðli í Lengjubikarnum í ár. ÍR situr á botninum með 0 stig en Tindastóll er með 1 stig. Bæði lið hafa leikið 6 leiki. Tindastóll hefur náð einu jafntefli og tapað 5 leikjum, skorað 2 mörk og fengið á sig 26.

Vonandi verður þetta leikurinn sem verður upphafið af góðu sumri í boltanum. Hvetjum alla til að mæta og styðja sína menn.

Landeigendur í Skagafirði vilja Blöndulínu í jörðina

Mikil óánægja er meðal landeigenda í Skagafirði með að leggja eigi tvö hundruð og tuttugu kílóvolta loftlínu frá Blöndustöð að Akureyri. Landeigendur munu ekki leyfa að línan verði lögð yfir þeirra lönd, segir fulltrúi þeirra.

Landsnet hyggst leggja 200 kílóvolta loftlínu frá Blöndustöð til Akureyrar, svokallaða Blöndulínu, sem yrði samtals 107 kílómetra löng. Línan á meðal annars að liggja um svokallaða Efribyggðarleið í Skagafirði, en samkvæmt frummatsskýrslu er gert ráð fyrir talsvert neikvæðum áhrifum á nokkrum bæjum þar, frá Kolgröf að Brúnastöðum, vegna nálægðar við línuna.

Helga Rós Indriðadóttir, fulltrúi landeigenda, segir kröfu þeirra þá að línan verði lögð í jörð.

„Hins vegar er það ljóst að 220 kílóvolta lína er ansi hreint ríflegt til að sinna raforkuþörf almennings. Hér er um að ræða línu sem mun þjóna hagsmunum stóriðju.“

Landsnet segir hins vegar að tilgangurinn sé að styrkja flutningskerfið. Núverandi byggðalína fullnægi ekki þeim kröfum sem séu gerðar. Helga Rós segir að athugasemdir verði sendar við þessar áætlanir.

„Landeigendur hér munu hafna þessu. Þeir munu ekki leyfa það að loftlína verði lögð í gegnum þeirra lönd.“

Heimild: Rúv.is

Körfuboltamót Molduxa í Skagafirði í maí

Hið árlega vormót Molduxa  í körfuknattleik verður  haldið laugardaginn 5. maí. 2012. Mótið er fyrir körfuknattleikslið  40 ára og eldri hjá körlum og fyrir kvennalið 20 ára og eldri. Stefnt er að því að mótið byrji klukkan  12 á laugardegi og er leiktíminn 2 x 12 mínútur og leikur hvert lið 3- 4 leiki.

Hægt er að skrá lið og fá nánari upplýsingar hjá Alla Munda á allimunda@internet.is  eða í síma 865-0819 og lýkur  skráningu 25. apríl. Þess skal getið að mótið er hluti af sæluvikugleði í Skagafirði þannig að nóg er um að vera um þessa helgi á Sauðárkróki.

Heimasíða Molduxa er www.molduxar.is

Skíðasvæðið í Tindastóli opið í dag

Skíðasvæðið í Tindastóli verður opið til klukkan 16 í dag. Núna er snjókoma og hægviðri þessa stundina og færið er alveg ágætt.  Það er um að gera að nota nú páskafríið vel og drífa sig á skíði.

  • kl. 10:00 til 16:00 Opið á skíðasvæðinu.
  • Troðin göngubraut bara fyrir alla.
  • Mætum í eftirtektarverðum fötum 
  • kl. 12.00   Paint ball skotið í mark, verð 1000 kr hver 100 skot
  • kl. 13.00   Þrautabraut fyrir 8 ára og yngri allir fá páskaegg að loknum tveimur ferðum.
  • kl. 13.00   Hæfnisbraut á brettum, páskaegg í verðlaun,  mikið hlegið.  
  • Kl. 14:00   Snjóþotu- og sleðarall – Músík í fjallinu.

Tónleikar á Mælifelli og Kaffi Krók í kvöld

Á Mælifelli í kvöld á Sauðárkróki verða hinir þrautreyndu tónlistarsnillingar Gylfi Ægisson, Rúnar og Megas sem halda tónleika frá kl. 22 í kvöld.

Á morgun Páskadag munu Sigga, Grétar og Pétur úr Stjórninni halda Tónleika á Mælifelli en húsið opnar skömmu eftir miðnætti.

Í kvöld á Kaffi Krók er Trúbbastemning og tilboð á barnum. Opið er til kl. 3 í nótt.

Torfhleðslu- og grindarnámskeið

Fyrirhugað er að halda torfhleðslu- og grindarnámskeið á Tyrfingsstöðum á Kjálka, á vegum Fornverkaskólans, dagana 7. til 10. júní 2012 í samstarfi við heimamenn og Byggðasafn Skagfirðinga.

Kennarar á námskeiðinu verða Helgi Sigurðsson hjá Fornverki ehf. og Bragi Skúlason húsasmíðameistari. Verkefni námskeiðsins verður m.a. að hlaða torfveggi baðstofunnar og smíða einfalda húsgrind, úr timbri.

Nánari upplýsingar um námskeiðið er að finna á heimasíðu Fornverkaskólans og hægt er að skrá sig á námskeiðið hjá Bryndísi í síma 453 5097 eða á netfangið bryndisz@skagafjordur.is .

Öflugur 10.flokkur drengja í körfubolta hjá Tindastóli

Strákarnir í 10. flokki Tindastóls í körfubolta kepptu á sínu síðasta móti á Sauðárkróki um s.l. helgi. Þeir unnu alla sína andstæðinga örugglega og þar með B-riðilinn.

Að sögn Kára Maríssonar þjálfara kom honum mest á óvart hversu yfirburðirnir voru miklir en segir það merki um að menn eru í stöðugri framför. Sannarlega jákvæður og góður endir hjá strákunum.

Úrslit leikjanna:

  • Tindastóll- Hamar/Þór   70-39
  • Tindastóll-Fjölnir b          82-48
  • Tindastóll-Breiðablik     70-44
  • Tindastóll-Fjölnir             80-40

Stigaskor leikmanna: Viðar 57, Pétur 55, Hannes 37, Finnbogi 30, Bjarni 22, Haukur 20, Kristinn 18, Friðrik Hrafn 14, Sigurður Óli 9, Elvar 9, Sighvatur 7, Óli Björn 6,Ingi 6, Ágúst 2.

 

Kári mun nú setja saman 6 lið úr öllum flokkum sínum; 9. 10. og 11. og spila mót út apríl og klára aprílmánuð með einstaklingskeppnum í þrautabraut, þriggja stiga skotum og stinger.

Heimild: Tindastoll.is

Skíðasvæðið í Tindastóli opið í dag

Skíðasvæðið í Tindastóli verður opið frá kl 10 til 16 í dag. Enn er nægur snjór hér til að renna sér á svo það er um að gera drífa sig í fjallið og skemmta sér. Veður klukkan 8:45 hægviðri hiti+ 3c og skýjað.

Dagskráin í dag í Tindastóli:

  • Kl. 10:00 – 16:00 Opið á skíðasvæðinu í Tindastóli – Músík í fjallinu.
  • Troðin göngubraut fyrir styttra og lengra komna.
  • kl.12:00 til 14:00 Paint ball skotið í mark, athugið verð: 1000kr hver 100 skot
  • kl. 13:00 til 15:00 þrautabraut á brettum

 

Dagskráin á Páskadag í Tindastóli:

 

Páskadagur 8. apríl

  • kl. 10:00 til 16:00 Opið á skíðasvæðinu.
  • Troðin göngubraut bara fyrir alla.
  • Mætum í eftirtektarverðum fötum 
  • kl. 12.00     Paint ball skotið í mark, verð 1000 kr hver 100 skot
  • kl. 13.00     Þrautabraut fyrir 8 ára og yngri allir fá páskaegg að loknum tveim ferðum.
  • kl. 13.00     Hæfnisbraut á brettum páskaegg í verðlaun,  mikið hlegið.  
  • Kl. 14:00     Snjóþotu- og sleðarall – Músík í fjallinu.

Meistarakeppni Norðurlands

Bjarni Jónasson fagnaði sigri á lokakvöldi Meistaradeildar Norðurlands sem fram fór í Svaðastaðahöllinni á Sauðárkróki í vikunni en keppt var í slaktaumatölti og skeiði.

Keppnin var æsispennandi og á endanum voru það fimm sekúndubrot sem réðu úrslitum. Mesta baráttan stóð á milli Bjarna Jónassonar sem hafði fyrir lokakvöldið 22 stig og Sölva Sigurðarsonar sem var með einu stigi minna. Sölvi endaði svo einu sæti ofar en Bjarni í fyrri keppnisgrein kvöldsins, slaktaumatölti, og þeir voru jafnir fyrir lokagreinina sem var skeið.

Mette Mannseth á Þúsöld frá Hólum rann skeið sprettinn á fimm sekúndum sléttum. Hestur Sölva, Steinn frá Bakkakoti, lá ekki í fyrri ferð en Bjarni og Hrappur frá Sauðárkróki náðu frábærum tíma 5,09 og settu pressu á Sölva fyrir seinni umferðina. Mette bætti tímann í 4,96 en Sölvi jafnaði tíma Bjarna og Hrapps og spennan í loftinu var mikil. Seinni sprettur Bjarna og Hrapps var magnaður og tíminn 5,04 sem tryggði honum sigur í heildarstigakeppni Meistaradeildar Norðurlands þetta árið.

Atvinnumál kvenna úthlutar styrkjum

Kanína ehf, fyrirtæki Birgit Kositzke á Hvammstanga, fékk 1,5 milljón króna styrk úr úthlutun styrkja til atvinnumála kvenna sem fram fór í vikunni en alls hlutu 36 verkefni styrk að upphæð alls 26 milljónum króna. Þá hlaut Guðbjörg Guðmundsdóttir frá Sauðárkróki 850 þúsund króna styrk fyrir verkefnið “Járnviðja – færanlegur skjólveggur”. Einnig hlaut Hildur Þóra Magnúsdóttir frá Skagafirði 400 þús. kr. styrk fyrir verkefnið “Culture tasting”.

Alls fóru 22 styrkir fóru til kvenna á höfuðborgarsvæðinu en 14 til kvenna á landsbyggðinni og eru styrkirnir veittir til markaðssetningar, vöruþróunar, launakostnaðar og ennfremur til gerðar viðskiptaáætlana.

Hæstu styrkina hlutu Icelandic Cinema online, 2.000.000 vegna vöruþróunar verkefnisins Icelandic film locations og Tungumál og menning, 1.600.000 vegna verkefnisins Lifandi tungumálakennsla. Þriðja hæsta styrkinn hlaut Birgit Kositzke á Hvammstanga vegna uppbyggingar kanínuræktar.

Styrkir voru til fjölbreyttra verkefna og má þar nefna styrk til þarabaða á Reykhólum, vegna baðvörulínu, bílabingós, framleiðslu á duftkerum, til framleiðslu jurtakryddsalts úr íslensku salti, handtuftaðra motta, markaðssetningu prjónaferða, snúningslaka, færanlegs skjólveggur, heilsukodda og ostagerðar.

Sjá má lista yfir styrkhafa ársins 2012 með því að smella hér.

Sumarstörf í Húnaþingi vestra

Flokkstjórar í Vinnuskóla
Í starfinu felst skipulagning og stýring á vinnuhópum unglinga á aldrinum 13 til 16 ára við ýmis garðyrkjustörf o.fl. einnig leiðsögn, hópefli og hvatning til góðra verka. Hæfniskröfur: Æskilegur aldur 20 ár eða eldri, menntun og reynsla í störfum tengdum ungu fólki.
Mikilvægt er að umsækjendur séu stundvísir, samviskusamir og góðar fyrirmyndir unglingana. Hafi góða þjónustulund og hæfni í mannlegum samskiptum. Áhugi af garðyrkjustörfum nauðsynlegur.

Flokkstjóri við slátt
Flokkstjóri ber ábyrgð á sláttuhóp og stýrir á verkstað, gerir vinnuskýrslur fyrir hópinn og hefur umsjón með vélum og búnaði sláttuhóps. Hæfniskröfur: umsækjendur skulu vera 20 ára eða eldri og bílprófs er  krafist. Flokkstjóri skal vera stundvís, jákvæður, lipur og eiga auðvelt með að vinna með öðru fólki. starfsreynsla af garðyrkjustörfum nauðsynleg.

Daglegur vinnutími er virka daga frá kl. 8:00-17:00.

Grassláttur og almenn garðyrkjustörf.
Umsækjendur sjái um grasslátt á opnum svæðum sveitarfélagsins og sinni almennum garðyrkjustörfum einnig. Umsækjendur skulu vera 17 ára eða eldri.
Krafist er stundvísi, ástundar og dugnaðar.

Daglegur vinnutími er virka daga frá kl. 08:15-16:15.

Frekari upplýsingar veitir Ína Björk Ársælsdóttir Umhverfisstjóri í síma: 455-2400.

Almenn verkamannastörf í Áhaldahúsi
Meðal starfa eru  ýmis viðhaldsverkefni á vegum sveitarfélagsins, s.s veitur og fl. Reynsla og hæfniskröfur: Umsækjendur skulu vera fæddir 1994 eða fyrr og nauðsynlegt er að þeir hafi bílpróf og dráttarvélapróf, reynsla af sambærilegu starfi er kostur, Samviskusemi og stundvísi.

Daglegur vinnutími er virka daga frá kl. 08:00-17:00.

Frekari upplýsingar veitir Guðmundur Erlendsson verkstjóri í síma: 894-2909.

Skriflegri umsókn skal skilað á skrifstofu Húnaþings vestra fyrir 15. apríl næstkomandi. Íumsókninni þarf að koma fram; Almennar upplýsingar, menntun, fyrri störf og annað sem umsækjandi telur viðeigandi. Frekari upplýsingar og upplýsingar um launakjör eru veittar á skrifstofu Húnaþings vestra í síma 455-2400

Golfklúbbur Sauðárkróks: Æfingasvæðið opið !

Nú geta Skagfirskir kylfingar farið að munda kylfurnar því æfingasvæðið hjá Golfklúbbi Sauðárkróks er opið og vor í lofti. Um páskanna verður boltavélin í gangi. Þeim sem vantar token í vélina er bent á að hafa samband við Pétur Friðjónsson eða Mugg vallarstjóra og þeir munu bjarga málum.

Heimasíða Golfklúbbs Sauðárkróks er hér.

Opið um páskana á Skíðasvæði Tindastóls

Það verður líf og fjör á skíðasvæði Tindastóls um páskahelgina og fjölbreytt dagskrá í boði. Þar verður meðal annars farið í paint ball, þrautabrautir á brettum og snjóþotu- og  sleðarall. Grillað verður að hætti Skagfirðinga og músík í fjallinu.

Dagskráin um páskahelgina:

Miðvikudagur 4. apríl

  • Kl. 12:00 -19:00 Skíðasvæðið í Tindastól opið.
  •                   Troðin göngubraut.

Skírdagur 5. apríl

  • Kl. 10:00 -16:00 Skíðasvæðið í Tindastóli opið.
  • Kl. 14:00              Troðin göngubraut,  Skíðagöngutrimm.

Föstudagurinn langi 6. apríl

  • Kl. 10:00 – 16:00 Opið á skíðasvæðinu fyrir gesti og skíðagangandi.
  •                                Troðin göngubraut fyrir skíðagangandi fólk.
  • kl. 12:00-14:00 Paint ball skotið í mark, ath. 1000 kr. 100 skot
  • Kl. 12:00                 Grillað að hætti Skagfirðinga.
  • Kl. 13:00 – 15:00  Músík í fjallinu.

Laugardagur 7. apríl

  • Kl. 10:00 – 16:00 Opið á skíðasvæðinu í Tindastóli – Músík í fjallinu.
  •                             Troðin göngubraut.
  • kl.12:00 -14:00 Paint ball skotið í mark, ath 1000kr. fyrir 100 skot.
  • kl. 13:00 -15:00 Þrautabraut á brettum.

Páskadagur 8. apríl

  • kl. 10:00 -16:00 Opið á skíðasvæðinu.
  •                      Troðin göngubraut bara fyrir alla.
  •                    Mætum í eftirtektarverðum fötum
  • kl. 12.00     Paint ball skotið í mark, ath. 1000 kr. fyrir 100 skot.
  • kl. 13.00     Þrautabraut fyrir 8 ára og yngri allir fá páskaegg að loknum tveim   ferðum.
  • kl. 13.00     Hæfnisbraut á brettum páskaegg í verðlaun, mikið hlegið.
  • Kl. 14:00     Snjóþotu- og sleðarall – Músík í fjallinu.

Annar í páskum 9. apríl

  • Kl. 10:00 – 16:00 Opið á skíðasvæðinu. Troðin göngubraut fyrir alla bæði langa og mjóa.

Tindastóll fær til sín erlendan leikmann í meistaraflokkinn í knattspyrnu

Tindastóll hefur fengið liðsstyrk fyrir fyrstu deildina í sumar en markvörðurinn Sebastian Furness mun leika með liðinu í sumar. Hann er væntanlegur til landsins í maí.

Furness er fæddur árið 1986 en hann var á mála hjá Middlesbrough frá tíu ára aldri og þar til hann varð 17 ára.

Eftir það fór hann til Hartlepool og í kjölfarið lék Seb með liðum í ensku neðri deildunum. Undanfarin ár hefur Sebastian spilað í bandaríska háskólaboltanum í Texas auk þess að vera markmannsþjálfari þar.

Theo Furness bróðir Sebastian lék með Tindastóli á síðasta ári og bróðir þeirra Dominic mun einnig leika með liðinu í sumar. Auk bræðranna þriggja mun enski sóknarmaðurinn Ben J. Everson leika með Tindastóli í sumar.

Gísli Eyland Sveinsson varði mark Tindastóls þegar liðið komst upp úr annarri deildinni í fyrra en hann lagði hanskana á hilluna í vetur.

Arnar Magnús Róbertsson hefur varið mark Stólanna í Lengjubikarnum en Sebastian mun nú berjast við hann um markvarðarstöðuna.

Heimild: fótbolti.net

Kaffi- og menningarhúsið Bjarmanes á Skagaströnd til leigu

Sveitarfélagið Skagaströnd auglýsir eftir umsóknum um að leigja og reka Kaffi-og menningarhúsið Bjarmanes á Skagaströnd. Húsið er laust til afnota í lok maí og í því er allur búnaður til reksturs kaffihúss.

Bjarmanes er fallegt steinhús, byggt 1913 en var allt endurbyggt 2004,og hefur þann einstaka anda sem einkennir mörg gömul hús. Það stendur miðsvæðis með góðu útsýni yfir höfnina og Húnaflóann.

Óskað er eftir að umsækjendur leggi fram með umsókn sinni hugmyndir um rekstrarform og menningarlegt hlutverk kaffihússins.

Umsóknum skal skilað á skrifstofu Sveitarfélagsins Skagastrandar fyrir 15. apríl 2012. Umsóknum má einnig skila rafrænt á netfangið skagastrond@skagastrond.is

Fyrir hönd sveitarstjórnar,

2. apríl 2012.

Sveitarstjóri

Laxasetur Íslands á Blönduósi

Á fyrsta degi veiðitímabilsins þann 1. apríl, opnaði Laxasetur Íslands ehf. heimasíðu félagsins. Á síðunni www.laxasetur.is munu koma fram upplýsingar um starfsemi félagsins en nú er verið að setja upp lifandi sýningu laxfiska að Efstubraut 1 á Blönduósi sem verður opnuð í júní n.k.

Á sýningunni verða lifandi laxfiskar í búrum og þá verður einnig kvikmynd um laxfiska og annað efni tengt lifnaðarháttum og sögu laxfiska og veiði á Íslandi í máli og myndum. Stefnt er að því að sýningin verði áhugaverð fyrir veiðimenn og fjölskyldufólk.

Laxasetrið mun koma að ýmsum rannsóknum í samstarfi við Veiðimálastofnun, Háskólann á Hólum, Landssamband veiðifélaga og Þekkingasetur á Blönsuósi. Framkvæmdastjóri og tengiliður er Valgarður Hilmarsson laxasetur@laxasetur.is.

Heimild: Húni.is

Hljómsveit úr Skagafirði í 3. sæti í Músíktilraunum 2012

Skagfirska hljómsveitin Funk that Shit! lenti í þriðja sæti í Músíktilraunum 2012 á úrslitakvöldi keppninnar í Austurbæ í gærkvöldi. Gítarleikar sveitarinnar, Reynir Snær Magnússon, hlaut nafnbótina Gítarleikari Músíktilrauna 2012 og Guðmundur Ingi Halldórsson, félagi hans úr Funk that Shit!, var valinn besti bassaleikarinn.

Á heimasíðu Rúv.is kemur fram að hljómsveitin RetRobot hafi fagnað sigri í keppninni og í öðru sæti varð hljómsveitin Þoka. Hljómborðsleikari Músíktilrauna er Heimir Klemensson úr Þoku, trommari ársins var valinn Sólrún Mjöll Kjartansdóttir úr White Signal og rafheili ársins er Daði Freyr Pétursson úr RetRobot. Söngvaraverðlaunin hlaut Agnes Björgvinsdóttir úr hljómsveitinni Þoku. Hljómsveit fólksins var hljómsveitin White Signal en hún var valin í símakosningu.

Nemendafélag Fjölbrautarskóla Norðurlands vestra óánægt með Söngkeppnina

Nemendafélag Fjölbrautarskóla Norðurlands vestra á Sauðárkróki hefur sagt sig úr Sambandi íslenskra framhaldsskólanema vegna óánægju við undirbúning söngkeppni framhaldsskólanna.

Keppnin hefur undanfarin ár verið haldin á Akureyri en nú flyst hún til Reykjavíkur á ný. Fyrirkomulag keppninnar er jafnframt með öðru sniði en áður. Framleiðslufyrirtækið Sagafilm hefur tekið að sér framkvæmd keppninnar og aðeins 12 atriði munu keppa til úrslita í aðalkeppninni sem sýnd verður í beinni útsendingu á RÚV.

Í bréfi nemendafélagsins til stjórnar SÍF segir að keppnin eigi að vera skemmtun fyrir nemendur í framhaldsskólum landsins og skuli byggð þannig upp, að fækka atriðum gangi gegn hagsmunum nemenda. Þá segir í bréfinu að ákvarðanataka í kringum söngkeppnina hafi farið fram í lokuðum bakherbergjum. Ef breyta eigi viðburði sem þessum á svo róttækan hátt verði að gæta þess að allir hagmunaaðilar fái áheyrn.

Heimild: Rúv.is

Varmahlíðarskóli gerði góða hluti í Skólahreysti

Varmahlíðarskóli varð hlutskarpastur í sínum riðli í Skólahreysti sem fram fór á Akureyri á fimmtudag og er þar með kominn í úrslitakeppnina sem fram fer þann 26. apríl í Laugardalshöll. Skagfirsku skólarnir í Varmahlíð, austan Vatna og á Sauðárkróki röðuðu sér í þrjú efstu sætin en Húnavallaskóli kom þar næstur.

Það verða því Varmahlíðarskóli, Hvolsskóli, Lindaskóli, Heiðarskóli, Foldaskóli, Hagaskóli, Grunnskóli vestur Húnvetninga, Grunnskólinn á Ísafirði, Egilsstaðaskóli og Giljaskóli sem etja kappi í úrslitum í Skólahreysti 2012-03-30

Úrslitin voru eftirfarandi:

Skóli Gildi Stig
Varmahlíðarskóli 40 40,00
Grunnskólinn austan Vatna 38 38,00
Árskóli 37 37,00
Húnavallaskóli 31 31,00
Hafralækjarskóli 29 29,00
Grunnskóli Fjallabyggðar 28 28,00
Grenivíkurskóli 25 25,00
Blönduskóli 24 24,00
Dalvíkurskóli 18 18,00

Svartur á leik sýnd í Króksbíói

Íslenska stórmyndin Svartur á leik hefur fengið góðar viðtökur hjá landsmönnum og vegna fjölda áskorana mun myndin fara í sýningu um allt land á næstu dögum, þar á meðal verður hún til sýningar á Sauðárkróki.

Myndin verður til sýningar í Króksbíói mánudaginn 2. apríl og fimmtudaginn 5. apríl kl. 20. Miðapantanir fara fram í síma 4535216 og miðaverð er 1500 kr. Þess má geta að myndin er bönnuð innan 16 ára.

Tindastóll átti ekkert í lið KA

KA 5 – 0 Tindastóll:
1-0 Ævar Ingi Jóhannesson (’10)
2-0 Elmar Dan Sigþórsson (’44)
3-0 Jóhann Helgason (’53)
4-0 Gunnar Örvar Stefánsson (’83)
5-0 Brian Gilmour (’89)

Í gærkvöldi tók KA á móti Tindastól í Lengjubikar karla í knattspyrnu. Það er skemmst frá því að segja að KA vann yfirburðasigur á lánlausum Tindastólsmönnum. KA skoraði tvö mörk í fyrri hálfleik og þrjú í þeim seinni. Áhorfendur voru aðeins 45 í Boganum á Akureyri. Fannar Freyr hjá Tindastóli fékk rautt spjald á 87 mínútu og léku því Tindastólsmenn einum færri síðustu mínúturnar.

Nánari lýsing:

Leikið var í Boganum á Akureyri og það voru heimamenn í KA sem komust yfir á 10. mínútu. Ævar Ingi Jóhannesson skoraði þá laglegt skallamark eftir sendingu frá Hallgrími Mar Steingrímssyni sem hafði leikið vörn Tindastóls grátt.

Á þeirri 44. mínútu bætti Elmar Dan Sigórsson fyrirliði KA manna öðru marki við eftir gott samspil við Jóhann Helgason.

Jóhann Helgason skoraði svo þriðja markið sjálfur í byrjun seinni hálfleiks með flottu skoti vinstra megin fyrir utan teig sem fór í stöngina og inn.

Gunnar Örvar Stefánsson kom KA svo í 4-0 þegar um 7 mínútur voru eftir. Hann fékk þá flotta fyrirgjöf frá varamanninum Kristjáni Frey Óðinssyni og potaði boltanum yfir línuna.

Fimmta markið skoraði svo Skotinn Brian Gilmour sem smellti boltanum í samskeytin úr aukaspyrnu á lokamínútunni.

KA fór ekki upp úr sjötta sæti riðilsins með þessum sigri en er nú komið með sjö stig úr sex leikjum. Tindastóll í sjöunda og næst neðsta sætinu með eitt stig.

Leikskýrslu KSÍ má finna hér.

Liðin voru þannig skipuð:

KA Tindastóll
Byrjunarlið
4 Haukur Hinriksson 2 Loftur Páll Eiríksson
5 Þórður Arnar Þórðarson 3 Pálmi Þór Valgeirsson
6 Srdjan Tufegdzic 4 Magnús Örn Þórsson
8 Brian Gilmour 5 Edvard Börkur Óttharsson
11 Jóhann Helgason 6 Björn Anton Guðmundsson
15 Elmar Dan Sigþórsson  (F) 7 Aðalsteinn Arnarson  (F)
18 Ómar Friðriksson 8 Atli Arnarson
22 Hallgrímur Mar Steingrímsson 10 Fannar Freyr Gíslason
24 Ævar Ingi Jóhannesson 11 Fannar Örn Kolbeinsson
28 Jakob Hafsteinsson 12 Arnar Magnús Róbertsson  (M)
30 Fannar Hafsteinsson  (M) 20 Árni Arnarson

KR lagði Tindastól í fyrsta leik

Úrslitakeppnin í Iceland Express deild karla í körfubolta hófst á fimmtudagskvöld og héldu Tindastólsmenn suður til að mæta KR. Fjölmennum og fríður flokkur stuðningsmanna Tindastóls mættu á leikinn til að hvetja sína menn. KR-ingar höfðu frumkvæðið lengstum í leiknum og lönduðu nokkuð öruggum sigri þó Stólarnir hafi gert góða atlögu að þeim undir lok þriðja leikhluta. Lokatölur 84-68.

Nú er annar leikur liðanna á sunnudag í Síkinu á Sauðárkróki og eru stuðningsmenn Tindastóls hvattir til að fjölmenna og hvetja liðið til sigurs. KR-ingar hafa heimsótt Síkið tvisvar áður í vetur og hafa þeir ekki riðið feitum hesti frá þeim viðureignum. Áfram Tindastóll!

Stig Tindastóls: Allen 16, Miller 13, Þröstur Leó 12, Svabbi 11, Helgi Rafn 9, Tratnik 5 og Hreinsi 2.

Stóðhestaveisla á Sauðárkróki

Hin árlega „Stóðhestaveisla“ fer fram í reiðhöllinni Svaðastöðum á Sauðárkróki á laugardagskvöldið kemur, 31. mars og hefst kl. 20 þar sem á fjórða tug stóðhesta mun koma fram ásamt mörgum knáum knöpum.

Samkvæmt fréttatilkynningu hófst forsala miða í gær, miðvikudag, en forsalan fer fram hjá N1 í Staðarskála, á Blönduósi, á Sauðárkróki og við Hörgárbraut á Akureyri. Miðaverð er 3.000 kr. í forsölu, en 3.500 kr. við innganginn. Innifalið í miðaverðinu er 370 blaðsíðna stóðhestabók þar sem kynntir eru 310 stóðhestar víðs vegar af landinu.

Gustur frá Hóli verður heiðurshestur sýningarinnar fyrir norðan og mun gleðja gesti með nærveru sinni.

Það verður því nóg um að vera fyrir hestaáhugamenn í Skagafirði á laugardagskvöldið.

Heimild: Mbl.is