All posts by Magnús Rúnar Magnússon

Fleiri ferðamenn koma á Hvammstanga

Ferðafólk er að átta sig á því að margt er hægt að skoða á jaðarsvæðum landsins. Þetta segir formaður Ferðamálafélags Vestur-Húnavatnssýslu í viðtali á Rúv.is.

Hvammstangi er miðstöð verslunar- og þjónustu Vestur-Húnavantssýslu. Höfuð atvinnugreinin í sýslunni er landbúnaður, en ferðaþjónusta hefur verið að sækja í sig veðrið, eins og svo víða á landinu. Með tilkomu Selaseturs  Íslands hefur ferðafólki fjölgað umtalsvert, enda eru fræg sellátur skammt frá, á Vatnsnesi. Heimafólk vill fá sem flesta ferðamenn, og að þeir staldri við lengur en einn sólarhring. Þessi smáhýsi er verið að setja upp á tjaldsvæðinu á Hvammstanga.

„Menn hafa verið að byggja hótel og stækka við sig, þannig að það er mikil uppbygging,” segir Kristinn Karlsson, formaður ferðamálafélags V-Húnavatnssýslu.

Og hann er sannfærður um að uppbyggingin skili sér í framtíðinni. „Já, vissulega. Húnaþing vestra er kannski jaðarsvæði og ég held að menn séu að átta sig á því að það er allt í lagi að fara og skoða jaðarsvæðin líka, það er það mikið að skoða.”

Sjá upptöku og frétt á Rúv.is hér.

Texti: Rúv.is

Færri selir sáust við árlega selatalningu

Selatalningin mikla var haldin á vegum Selasetur Íslands þann 22. júlí s.l. Talningin hefur farið fram árlega síðan árið 2007 og var þetta því sjötta talningin. Markmið talningarinnar er að fylgjast með fjöldi og staðsetningu landsela í kringum Vatnsnes og Heggstaðanes, ásamt því að gefa almenningi tækifæri á að kynnast og taka þátt í rannsóknarstarfsemi Selaseturs Íslands.

Selir voru taldir á allri strandlengjunni á Vatnsnesi og Heggstaðanesi  í Húnaþingi vestra, en það er samtals um 100 km. 40 manns tóku þátt í talningunni og fóru talningarmenn gangandi, ríðandi eða á báti. Talningin byggir algjörlega á þátttöku sjálfboðaliða, en með þessu móti gefst færi á að kanna stórt svæði á mjög stuttum tíma.

Í ár sáust samtals 614 selir á svæðinu. Það eru mun færri selir en hafa sést undanfarin ár. Mikilvægt er að hafa í huga að þessar talningar eru aðeins vísbending um lágmarksfjölda þeirra sela sem dvelja á þessu svæði. Margir þættir hafa áhrif á fjölda sela sem liggja uppi í látrunum og veður er einn þeirra. Veðrið hefur undanfarin ár verið mjög gott, en í gær var þó nokkur úrkoma og fremur hvasst. Getur það verið ein skýring á því að færri selir lágu uppi nú í ár.

Athuga ber að tölurnar segja ekki til um ástand landsselsstofns í heild. Stofnstærðarmat á landsel hefur farið fram reglulega síðan árið 1980 og þá hefur verið talið um land allt úr flugvél. Niðurstöður þeirra talninga benda til þess að landselstofninn hafi staðið í stað síðan árið 2003 og sé tæplega 12 þúsund dýr.

Texti:  www.selasetur.is

 

Þriðjudagsmót í frjálsum í Varmahlíð

Þriðjudagsmót í frjálsum íþróttum var haldið á vellinum í Varmahlíð síðasta þriðjudagskvöld. Keppendur fengu frábært veður til að keppa í en það var logn og hlítt. Mótið gekk vel og voru bæði keppendur og mótshaldarar ánægðir með keppnina. Það voru um 40 þátttakendur sem voru skráðir til leiks. Keppnisgreinar voru kringlukast, kúluvarp, spjótkast og yngstu keppendurnir kepptu líka í langstökki.

Stigahæstu keppendur samkvæmt unglingastigatöflu frjálsíþróttasambandsins voru Björgvin Daði(13) með 824 stig fyrir 9,40m í kúluvarpi, Dalmar Snær(11) með 823 stig fyrir 3,48m í langstökki. Gunnar Freyr(13) með 820 stig fyrir 9,33 í kúluvarpi.

Hjá stelpunum var það Elín Helga(12) sem fékk 820 stig fyrir 23,82m í spjótkasti, Vala Rún(13) með 815 stig fyrir 9,48m í kúluvarpi og Guðný Rúna(10) með 707 stig fyrir 3,06 m í langstökk

Texti: UMSS.is

Skagfirðingar stóðu sig vel á Akureyrarmóti í frjálsumíþróttum

Akureyrarmót í frjálsíþróttum fór fram á frjálsíþróttavellinum við Hamar á Akureyri helgina 21.-22. júlí.  Veður var gott og keppendur margir, alls 149 skráðir til leiks, þar af 27 frá UMSS.

Skagfirðingarnir stóðu sig mjög vel á mótinu, margir bættu sinn fyrri árangur og sigur vannst í 15 greinum.  Krakkarnir í flokki 12-13 ára voru áberandi í liði UMSS og sigruðu þau í stigakeppni aldursflokksins.

 

Sigurvegarar UMSS í einstökum greinum:

  • Vésteinn Karl Vésteinsson (12-13):  60m grindahlaup, hástökk, langstökk og spjótkast.
  • Fríða Ísabel Friðriksdóttir (14-15):  200m hlaup og 80m grindahlaup.
  • Vala Rún Stefánsdóttir (12-13):  60m grindahlaup, kúluvarp og spjótkast.
  • Hafdís Lind Sigurjónsdóttir (12-13):  200m hlaup og langstökk.
  • Daníel Þórarinsson (16+):  800m hlaup.
  • Hákon Ingi Stefánsson (14-15):  Kringlukast.
  • Ragna Vigdís Vésteinsdóttir (14-15):  Hástökk.
  • Rúnar Ingi Stefánsson (12-13): Kúluvarp.

 

Margir aðrir náðu mjög góðum árangri.  Má þar nefna að Jóhann Björn Sigurbjörnsson bætti sinn fyrri árangur, þegar hann varð í 3. sæti í 100m hlaupi á mjög góðum tíma, 11,16 sek.  Hann hljóp reyndar á 11,13 sek í undanrásum, en þá var meðvindur aðeins yfir leyfilegum mörkum.  Þá bætti Daníel Þórarinsson árangur sinn vel í 400m hlaupi, þegar hann varð í 2. sæti á 52,03 sek..

Írskur framherji í Tindastól

Tindastóll hefur fengið Steven Beattie í sínar raðir en hann hefur  raðað inn mörkunum í bandaríska háskólaboltanum undanfarin ár.
Steven er Írskur leikmaður sem kemur til Tindastóls frá Puerto Rico Islanders en þar áður var hann á mála hjá Toronto FC í Bandarísku MLS-deildinni. Beattie hefur verið síðustu mánuði á æfingum hjá Írska úrvalsdeildarliðinu Dundlak FC.

Hjá Tindastóli er honum ætlað að fylla skarð Ben  Everson sem fór til Breiðabliks í síðustu viku.

Ekki skamma mig séra Tumi á Sauðárkróki

Leik- og söngdagskráin „Ekki skamma mig séra Tumi“ verður sýnd á Bifröst á Sauðárkróki laugardaginn 28. júlí klukkan 20. Dagskráin er um vinina Jónas Hallgrímsson, rithöfund og ljóðskáld og vin hans og Tómas Sæmundsson. Guðrún Ásmundsdóttir rekur sögu þeirra sem hefur verið hulin íslenskum áhorfendum fram að þessu.

Guðrún hefur langa og mikla reynslu í því að flytja sögu sem þessi á lifandi og skemmtilegan hátt. Inn í verkið fléttast síðan ýmiskonar lög frá ýmsum tímum, sum eftir Jónas Hallgrímsson – t.d. Jeg elsker dig, önnur sem tengjast lífi hans og störfum á annan hátt. Alexandra Chernyshova sópran söngkona syngur. Leik- og söngdagskráin fjallar um ævi og störf Jónasar Hallgrímssonar og tengsl hans og vinar Tómasar Sæmundssonar á mismunandi tímum ævi þeirra. Verkið tekur einnig á þeim erlendum áhrifum sem Jónas var fyrir og koma þau vel fram í söngdagskránni en lögin eru sungin á fimm tungumálum alls. Inn í dagskránna fléttast síðan vídeóverk sem Arna Valsdóttir vídeólistamaður hefur gert um Hraundragana í Öxnadal og er tileinkað ljóði Jónasar “Ferðalok”. þrír hljóðfæraleikarar koma að verkinu en leikið er undir lögin á píanó, fiðlu og selló.

Markmið er að kynna fyrir íslenskum áhorfendum ævi og störf Jónasar Hallgrímssonar og vináttutengsl hans við Tómas Sæmundsson á léttan og skemmtilegan hátt með leik- og söngdagkrá. Guðrún Ásmundsdóttir er í hlutverki sögumanns og fléttar inn í söguna leik og söng eins og við á hverju sinni. Ýmislegt kemur fram í verkinu sem íslenskir áhorfendur vissu ekki um Jónas og Tómas og á það því fullt erindi til þeirra.

Sýning:  Bifröst á Sauðárkróki Laugardaginn 28. júlí klukkan 20.

Hlutverk:

Tómas Sæmundsson leikur Davíð þór Jónsson Jónas Hallgrímsson leikur Ragnar Kjartansson Sögumaður og höfundur handrits er Guðrún Ásmundsdóttir. Söngkona og leikandi er Alexandra Chernyshova. Myndlistarkonur og leikendur eru Ásdís Sif Gunnarsdóttir og Arna Guðný Valsdóttir Heiðursgestur og leikandi í sýningunni er Þráinn Karlsson.

 

Brother Grass með tónleika í Kántrýbæ í kvöld

Hljómsveitin Brother grass verður með tónleika í Kántrýbæ í kvöld, 23. júlí, og hefjast  þeir kl 21.

 

Hljómsveitin Brother Grass varð til síðla sumars 2010 þegar Hildur, Sandra, Soffía og Ösp ákváðu að halda saman bluegrass tónleika. Þær fengu til liðs við sig gítarleikarann Örn Eldjárn, bróður Aspar, til að spila með sér á litlum tónleikum 25. ágúst 2010 og þá var ekki aftur snúið! Hafa þau týnt til ýmis bluegrass og suðurríkjalög og útsett í eigin stíl, þar sem þvottabali, gyðingaharpa og víbraslappi koma meðal annars við sögu. Tónlist þeirra er bræðingur af Bluegrass, Blues, Folk, Gospel og Old Time Mountain Hillbilly Music.

Húnavökunni lauk í gær

Frétt frá Húna.is:

Húnavöku lauk í gær en það helsta sem var á dagskrá þennan síðasta dag hátíðarinnar var þjóðbúningasýning í Heimilisiðnaðarsafninu og opið hús hjá Heilbrigðisstofnuninni á Blönduósi. Á laugardagskvöld fjölmenntu hátíðargestir á kvöldvöku í Fagrahvammi þar sem í boði voru fjölbreytt skemmtiatriði, bakkasöngur og varðeldur.

 

Á kvöldvökunni stigu meðal annarra á svið þau Jónsi og Alma Rut og sigurvegararnir úr Míkróhúninum en það voru þau Baldur Einarsson, sem sigraði í yngri hópnum og Rakel Marín Jónsdóttir sem sigraði í eldri hópnum. Þá stigu á svið Jói Óda, Ásdís Guðmunds úr Multi Musica og Einar töframaður, sem einnig var kynnir.

 

Á laugardag fór einnig fram hið árlega Blönduhlaup en hlaupið var bæði á götum Blönduósbæjar og á stígum meðfram Blöndu. Hlaupnir voru 2,5 kílómetrar, 5 kílómetrar og 10 kílómetrar. Fljótastur í mark í 10 kílómetra hlaupinu var Hermann Þór Baldursson. Sigurvegari í 5 kílómetra hlaupi hjá stúlkum 15 ára og yngri var Kristrún Hilmarsdóttir en Sæmundur Ólafsson sigraði 5 kílómetra hlaupið hjá drengjum.

 

Fjölda mynda má finna af Húnavöku á fésbókarsíðu hátíðarinnar; www.facebook.com/hunavaka.

Texti: Huni.is – rzg@huni.is

Selir taldir í Húnaþingi vestra

Selir verða taldir á Vatnsnesi og Heggstaðarnesi í Húnaþingi vestra um helgina. Í fyrra voru taldir liðlega eittþúsund selir á þessum slóðum.

Talningin fer þannig fram að allir sjáanlegir selir eru taldir samtímis á stórstreymisfjöru, á um það bil eitthundrað kílómetra strandlengju. Talningin byggir algjörlega á þátttöku sjálfboðaliða sem vilja taka þátt í rannsóknarstörfum, og segir Sandra M. Granquist dýraatferlisfræðingur hjá Selasetri Íslands á Hvammstanga að talningin nýtist Selasetri Íslands við ýmsar rannsóknir sem þar eru stundaðar. Ýmsir koma að talningunni.

„Þetta eru bæði heimamenn, sem hafa áhuga á þessu, og síðan erum við líka með fólk sem er á ferðinni, erlendir og íslenskir ferðamenn sem eru að koma. Margir koma sérstaklega vegna þessarar talningar,” sagði Sandra.

Áætlað er að um 1000 selir séu við Vatnsnesið og á Heggstaðarnesi og hafa talningar verið gerðar á svæðinu síðan árið 2007.

Texti: Rúv.is

Haukar unnu Tindastól

Eftir annasama viku í leikmannamálum hjá Tindastól var komið að Haukum að koma í heimsókn á Sauðárkróksvöll.  Haukar unnu 1-0 sigur með marki undir lok fyrri hálfleiks. Haukamenn voru talsvert betri í fyrri hálfleik en seinni hálfleikurinn var allt annar og heimamenn óheppnir að ná ekki að skora mark.

Tindastóll var með talsvert breytt lið frá síðasta leik.  Ben Everson og Theo Furness fóru frá félaginu í vikunni og einnig vantaði Fannar Örn sem var í leikbanni. Inn fyrir þá komu Fannar Freyr sem tók framlínuna fyrir Ben og Atli Arnarson fór af miðjunni og var á hægri kantinum. Ingvi fór niður í vinstri bakvörðinn fyrir Fannar og Max var kominn á vinstri kantinn. Strákunum gékk erfiðlega að halda boltanum inná miðjunni og lítil ógn var fram á við hjá Tindastóli. Haukamenn pressuðu stíft og skoruðu sigurmarkið á 44.mín.

 

Seinni hálfleikurinn var betri hjá Tindastóli. Benjamín Gunnlaugarson kom inná á 46. mínútu og við það kom meiri ógn í sóknina. Arnar Sigurðsson kom síðan inná á 62. mínútu og var hann alltaf líklegur til að gera eitthvað, en Arnar er að jafna sig af meiðslum. Tindastóll setti mikla pressu á Hauka undir lokin og voru óheppnir að ná ekki að jafna leikinn. Lokastaðan 0-1 fyrir Hauka.

Leikskýrslu KSÍ má lesa hér.

Miðaldadagar á Gásum

Miðaldadagar á Gásum hefjast í dag, föstudag, og standa yfir til sunnudags. Af því tilefni kemur fjöldi fólks víðsvegar að af landinu og erlendis frá til þess að endurskapa mannlífið við hinn forna verslunarstað Gásir við Eyjafjörð. Gásir eru um 11 km. norðan Akureyrar og stendur sunnan við ósa Hörgár þar sem er að finna ágæta höfn frá náttúrunnar hendi. Þátttakendur eru um 75; kaupmenn, handverksmenn, vígamenn og munkar.

Opið verður á Miðaldadögunum frá föstudegi til sunnudags frá 11-18.

Meira á heimasíðu Gása hér.

Húnavaka hafin

Húnavaka, hin árlega fjölskyldu- og menningarhátíð Blönduósinga hefst í gær. Hátíðin var sett fyrir framan Hafíssetrið og svo var blásið til heljarinnar grillveislu og eftirréttarhlaðborðs í gamla bænum.

Að því loknu voru Umhverfisverðlaun Blönduósbæjar afhent en að þessu sinni var Heilbrigðisstofnunin á Blönduósi verðlaunuð fyrir snyrtilegt umhverfi og Hlíðarbraut 19 fyrir fegursta garðinn en þar búa Njáll Runólfsson, Ásta Þórisdóttir og synir.

 

Tindastóll hefur misst tvo markahæstu mennina

Knattspyrnulið Tindastóls hefur misst tvo leikmenn til liða í efstudeild, en Tindastóll leikur nú í 1. deildinni og er í fjórða sæti.  Benjamin J. Everson fór í Breiðablik en Theodore Furness gekk í  raðir ÍA. Hvorugur leikmaðurinn var á  KSÍ-samningi og hafði Tindastóll því ekkert í höndunum til að stöðva félagskiptin.  Liðið á þó von á að bæta við leikmönnum til að fylla þessi skörð sem þeir skilja eftir, en þeir voru markahæstir hjá Tindastóli.

Þá hefur Benjamín Jóhannes Gunnlaugarson komið til baka úr láni frá Drangey en hann fór þangað á láni í vor frá Tindastóli.

Opna Icelandair golfers á Sauðárkróki

Eitt af stórmótum sumarsins í golfi fer fram að Hlíðarenda á Sauðárkróki  laugardaginn 21. júlí, Opna Icelandair golfers mótið. Hvetum við sem flesta til að skrá sig sem allra fyrst, enn eru lausir rástímar. Góð verðlaun eru í boði Icelandair Golfers, gjafabréf af ýmsu tagi. Skráning og nánari upplýsingar eru á www.golf.is

Tindastóll vann Þrótt

Tindastóll átti góðan seinni hálfleik gegn Þrótturum þann 17. júlí. Staðan var 0-0 í hálfleik en í síðarihálfleik gerðust hlutirnir, fjögur mörk,  rautt spjald og víti. Mörk Tindastóls skoruðu Ben Everson, Max Touloute og Fannar Örn  á 22 mínútum. Þróttur skoraði svo mark úr víti þegar að 15. mínútur voru eftir af leiknum.

Tindastóll er komið upp í 4.sæti deildarinnar eftir leikinn.

Næsti leikur er heimaleikur gegn Haukum á laugardaginn 21. júlí.

Tindastóll burstaði Hött


Tindastóll og Höttur mættust í blíðskaparveðri á Sauðárkróksvelli þann 7.júlí. Fyrir leikinn munaði tveim stigum á liðunum.

Ljóst var fyrir leik að markmaður Hattar, Ryan Allsop myndi ekki spila í dag, Ryan hefur verið stórgóður á milli stangana og aðeins fengið á sig sex mörk.

Leikurinn hófst fjörlega þar sem liðin skiptust á að sækja. Tindastólsmenn pressuðu vel og uppskáru mark á 8.mínutu þegar Ben Everson skoraði laglegt mark. Mikil barátta var í leiknum og sóknir báðu megin þó svo að Hattarmenn hafi ekki að skapa sér neitt afgerandi færi.

Heimamenn náðu síðan hægt og bítandi yfirhöndinni í leiknum og voru þeir að skapa stórhættu í hverri sókn. Það var síðan gegn gangi leiksins að Hattarmenn jafna úr hornspyrnu, en þar var að verki Stefán Þór Eyjólfsson á 30.mín. Strax í næstu sókn fá Tindastólsmenn hornspyrnu og þar hoppar Dominic Furness manna hæst og skallar hann í netið og kemur Tindastóli aftur yfir.

Eftir þetta auka Tindastólsmenn enn frekar í sóknarleikinn og hver sóknin af annari dynur á Héraðsbúum. Það er síðan á 37.mín að yngsti Furness bróðirinn, Theo skorar fínt mark og staðan orðin 3-1. Stólarnir halda áfram að yfirspila Hattarmenn á miðjunni og bæta við fjórða markinu á markamínutuni miklu. Þar var að verki Theodore Furness í annað sinn.

Eysteinn Húni Hauksson þjálfari Hattar hefur væntanlega messað vel yfir sínum mönnum í hálfleik því allt annar bragur var á liðinu í byrjun seinni hálfleiks. Þeir náðu upp betra spili og höfðu undirtökin í leiknum. Það var svo á 60.mínutu að Stefán Þór Eyjólfsson skoraði sitt annað mark eftir klafs í teignum og Höttur eygðu þarna smá von. Stólarnir náðu að koma sér aftur betur inní leikinn og náðu markvissari sóknum sem skilaði sér í enn einu marki fyrir Stólana, Ben Everson bætti við sínu öðru marki í leiknum á 72.mínutu og staðan orðin 5-2.

Eftir þetta voru stólarnir komnir með öll tök á vellinum sóknir liðsins stórhættulegar og þeir hefðu hæglega getað bætt við 2-3 mörkum til viðbótar áður en varamaðurinn Max Toulute bætti við sjötta marki heimamanna á 89.mín. Í uppbótartíma voru Stólarnir klaufar að ná ekki að bæta við sjöunda marki sínu í leiknum.

Jan Erik Jessen dómari leiksins flautaði síðan leikinn af og sanngjarn 6-2 sigur heimamanna staðreynd. Eftir leikinn komu Stólarnir sér upp í fimmta sæti deildarinnar með 11.stig og markatöluna 19-17. Hattarmenn sem voru búnir að fá á sig sex mörk fyrir þennan leik eru stigi á eftir Stólunum í sjöunda sæti með markatöluna 10-12.

Fótboltamót á Akureyri

Akureyri er mikill íþróttabær og fjöldi íþróttamóta er haldinn í bænum allt árið um kring. Um helgina fara fram tvö af stærstu mótum ársins; N1-mót KA og Pollamót Þórs og Icelandair. N1-mót KA hófst á miðvikudaginn og lýkur með lokahófi í KA-heimilinu á morgun, laugardag. Frá fyrsta mótsdegi hefur verið mikið fjör á svæðinu og óhætt að segja að veðurguðirnir hafi leikið við mótsgesti.

Í ár taka þátt 152 lið frá 38 félögum og er fjöldi keppenda um 1.350 auk þjálfara, fararstjóra, foreldra og annarra aðstandenda. Í það heila eru spilaðir á sjötta hundrað leikir á KA-svæðinu um helgina. Á mótinu er spilað í sex deildum og verða undanúrslitaleikir spilaðir síðdegis í dag en leikir um sæti spilaðir á morgun. N1-mótið er haldið með samstilltu átaki gríðarlegs fjölda sjálfboðaliða og knattspyrnuiðkenda hjá KA og er talið að um 300 sjálfboðaliðar komi að framkvæmd mótsins.

Pollamót Þórs og Icelandair, fyrir eldri knattspyrnupilta- og stúlkur, verður haldið í 25. skipti á Þórssvæðinu um helgina. Mikið verður um dýrðir á mótssvæðinu við Hamar og boðið upp á grillveislur gegn vægu gjaldi í kvöld og annað kvöld auk þess sem Jónsi í Svörtum fötum og Ingó veðurguð munu stíga á stokk og skemmta gestum og gangandi. Einnig mun Kristján Kristjánsson, listflugmaður, sýna ævintýralegar listir sínar yfir Þórsvellinum. Um sannkallaða fjölskyldustemningu er að ræða á mótinu og verður boðið upp á leiktæki fyrir börn á öllum aldri alla helgina.

Keppt verður í tveimur flokkum kvenna: 20 ára og eldri etja kappi í Skvísudeild og 30 ára og eldri í Ljónynjudeild. Karlaflokkarnir eru þrír: 30 ára og eldri taka þátt í Polladeild, 40 ára og eldri í Lávarðadeild og 45 ára og eldri reyna með sér í Öldungadeild.

Mörg lið hafa skráð nafn sitt í sögubækur mótsins með frækinni frammistöðu innan vallar sem utan og ber þar helst að nefna hið víðfræga lið Ginola. Að sögn Rúnars Þórs Jónssonar, fyrirliða Ginola, hafa liðssmenn verið að týnast í bæinn á síðustu dögum einn af öðrum. “Mikil tilhlökkun ríkir í okkar herbúðum enda hefur undirbúningur staðið yfir í nokkurn tíma. Pollamótið er orðið stór hluti af sumarfríi liðsmanna Ginola enda eru margir brottfluttir Akureyringar í liðinu. Það er því frábær tilfinning að koma til Akureyrar um hásumar til þess að spila fótbolta með félögunum. Án nokkurs vafa munum við skemmta okkur og andstæðingum okkar með skemmtilegum leik,” segir Rúnar og hlær.

Ísbjörninn fannst ekki í dag

Formlegri leit að hvítabirni sem talinn var vera við Húnaflóa er lokið í dag. Stýrimaður þyrlu Landhelgisgæslunnar sem fór um svæðið í dag segir næsta víst að ef björninn hafi verið á svæðinu hefði sést til hans úr þyrlunni.

Á miðvikudaginn taldi fólk sig sjá til hvítabjarnarins á sundi, þyrlan hefur farið um svæðið síðan og leitað en ekki haft erindi sem erfiði.
Hilmar Þór Hilmarsson, varðstjóri lögreglunnar á Blönduósi segir að á morgun verði metið að nýju hvort þyrlan verður kölluð til leitar. Engin skipulögð leit sé á jörðu niðri.

„Eina formlega leitin sem er er úr lofti með þyrlunni. Það er ekki hægt að leita þetta öðruvísi. Við viljum bara að fólk verði á varðbergi og láti okkur vita ef það sér eitthvað einkennlegt og við viljum eftir sem áður að fólk sé ekki að raska sínum plönum,” saði Hilmar.

Henning Þór Aðalmundsson er stýri- og sigmaður í áhöfn þyrlunnar en hún fór aðallega um Heggstaðanes og Vatnsnes í dag og leitaði vandlega frá fjalli niður í fjöru. Í gær var farið yfir Húnaflóann allan, úti á sjó og meðfram strandlengjunni.

„Það er ekkert 100 prósent, en við teljum að við höfum leitað það vel að við hefðum rekist á hann sé hann þarna. Þetta eru mikil flökkudýr. Stoppa sjaldnast við á sama stað lengi og eru yfirleitt bara á flandri og ef hann hefur verið á sundi gæti hann verið kominn til sjávar eitthvert en það hvítnar aðeins á báru núna en því er það aðeins erfiðara að fylgjast með þar sem það er hvítt á sjónum,” sagði Henning Þór Aðalmundsson.

Heimild: Rúv.is

Ísbirnir auka ferðamennsku

Leitin að hvítabirninum hefur jákvæð áhrif á ferðaþjónustuna á Norðurlandi vestra, segir starfsmaður samtaka sveitarfélaga á svæðinu. Eldri borgarar sem skoðuðu Vatnsnesið í gær sýndu engin merki um hræðslu við hvítabjörn.

Kastljósi fjölmiðlanna hefur verið beint að Húnaþingi, eftir að leitin að hvítabirninum hófst. Vertíðin hjá ferðaþjónustufyrirtækjum stendur sem hæst og segir Gudrun Kloes hjá Samtökum sveitarfélögum á Norðurlandi vestra að þessi mikla athygli skaði síður en svo ferðaþjónustuna á svæðinu.

„Ég ég held að hún hafi bara jákvæð áhrif, við sáum það strax í gær, þá streymdu menn að og voru mjög opnir fyrir því að skoða sig um og svipast eftir dýrinu. Þetta er ekki ólíkt náttúruhamförum, sem hafa svo jákvæð áhrif þegar þeim lýkur og við vonum bara að það gerist ekkert hræðilegt á meðan, þá er þessi björn bara algjör gullmoli fyrir ferðaþjónustuna á svæðinu,” sagði Gudrun. Hún segir að ekki hafi nokkur hræðslumerki verið að sjá á ferðamönnum sem komu í gær.
„Við sáum það í gær, þá fór hópur eldri borgara í Reykjavík um svæðið. Þeir voru bara rólegir,” sagði Gudrun Klaes hjá Samtökum sveitarfélaga á Norðurlandi.

Heimild: Rúv.is

Ísbjörn týndur á Húnaflóasvæðinu

Lögreglan á Blönduósi telur nú að hvítabjörn sé einhvers staðar á Húnaflóasvæðinu. Veginum út á Vatnsnes var lokað fyrr í kvöld.

Þyrla Landhelgissælsunnar fann fyrir skömmu spor í fjörunni fyrir neðan Geitafell á vestanverðu Vatnsnesi og eru sporin að öllum líkindum eftir hvítabjörn. Kristján Þorbjörnsson, yfirlögregluþjónn á Blönduósi, segir að björn sé á svæðinu og biður fólk við allan Húnaflóa um að hafa varann á uns búið er að finna dýrið.

Ítalskir ferðalangar töldu sig hafa séð björn á Húnaflóa í dag og var  þyrla Landhelgisgæslunnar send til leitar. Eftir að fréttir voru fluttar um leitina í kvöld hafði ung kona samband við lögreglu og sagðist hafa séð ljósgulan blett út á hafi snemma í morgun. Hún hefði talið að hugsanlega gæti verið um hvítabjörn að ræða en þótt það svo ólíklegt að hún sagði ekki frá því fyrr en aðrar fréttir bárust um hugsanlegar hvítabjarnarferðir.

Ítölsku ferðamennirnir voru í fjörunni fyrir neðan Geitafell þegar þau töldu sig sjá hvítabjörn. Þeir sýndu heimilisfólki á Geitafelli myndir og myndskeið. Heimilisfólkið var ekki visst um að um hvítabjörn væri að ræða, en lét lögregluna engu að síður vita og í kjölfarið fóru lögreglumenn að svipast um. EFtir að Ítalarnir fórú frá Geitafelli
Lögreglan vill ná sambandi við ítölsku ferðamennina, um er að ræða miðaldra ítölsk hjón með tvo drengi á gráum jepplingi. Lögreglan biður því ferðaþjónustufólk að hafa samband ef það veit um ferðir þeirra.

Heimild: Rúv.is

Opið fyrir skráningu á 15. Unglingalansmóti UMFÍ

1. júlí verður opnað fyrir skráningu á 15. Unglingalandsmót UMFÍ sem haldið verður á Selfossi um verslunarmannahelgina. Skráningu lýkur á miðnætti 29. júlí.

Unglingalandsmótin hafa svo sannarlega sannað gildi sitt sem glæsilegar fjölskyldu- og íþróttahátíðir þar sem saman koma þúsundir barna og unglinga ásamt fjölskyldum sínum og taka þátt í fjölbreyttri dagskrá.

Unglingalandsmót UMFÍ er vímuefnalaus fjölskylduhátíð þar sem börn og unglingar á aldrinum 11 – 18 ára reyna með sér í fjölmörgum íþróttagreinum. Samhliða er boðið upp á fjölbreytta afþreyingu, leiki og skemmtun fyrir alla fjölskylduna.

Unglingalandsmótin hafa hvarvetna vakið mikla athygli og þeir fjölmörgu sem þau hafa sótt hafa verið öðrum til mikillar fyrirmyndar með allri framkomu hvort sem er í keppni eða leik. Unglingalandsmótin eru klárlega með stærri íþróttaviðburðum á Íslandi ár hvert og eru nú orðin árlegur viðburður um verslunarmannahelgina.

Texti og mynd: umss.is

Rektor Hólaskóla vill samning við ráðuneytið

Hluti skýringarinnar á fjárhagsvanda Hólaskóla er sá að skólinn hefur aldrei haft samning við menntamálaráðuneytið um kennslu á háskólastigi. Þetta segir nýr rektor skólans.

Erla Björk Örnólfsdóttir tók nýlega við stöðu rektors við háskólann á Hólum. Erla boðar enga byltingu í rekstri skólans, sem situr uppi með uppsafnaðan rekstrarhalla, en eitt af hennar fyrstu verkum í starfi hefur verið að ýta á eftir samningi við mennta – og menningarmálaráðuneytið um kennslu á háskólastigi. Að hennar sögn er slíkur samningur í undirbúningi.

„Eins og staðan er í dag er Hólaskóli ekki með samning við Menntamálaráðuneytið um kennslu á háskólastigi, allir aðrir háskólar hafa það. Háskólinn á Hólum hefur aldrei haft samning við mennta- og menningarmálaráðuneytið um kennslu á háskólastigi.  Þannig að Háskólinn á Hólum fær ekki greitt samkvæmt þeim nemendum og nemendaígildum sem hér eru. Þannig að Háskólinn á Hólum hefur fengið greiddar upphæðir samkvæmt samingum sem eru ekki tengdar því námi sem kennt er hérna. Sem er hluti af því afhverju háskólinn áhólum er í fjárhagsörðugleikum af því að reksturinn er kannski ekki í takt við kennsluna.”

Erla segir að samningurinn skipti miklu máli fyrir allan rekstur skólans auk þess sem hann sé mikil viðurkenning fyrir skólann.

„Það er mjög stórt skref í viðurkenningu á því starfi, því góða starfi sem er unnið hér, þannig að já við bíðum í ofvæni.”

Norðurorka veitti styrki til samfélagsverkefna

Styrkjum Norðurorku hf. til samfélagsverkefna var úthlutað fimmtudaginn 21. júní við athöfn í sal fyrirtækisins að Rangárvöllum á Akureyri.
Haustið 2011 ákvað stjórn Norðurorku hf. að fara í endurskoðun á ýmsum þáttum í stefnumótun félagsins og var einn þeirra styrkveitingar til samfélagsverkefna.
Samþykkt var stefna félagsins í styrkveitingum og þar með þau grundvallarsjónarmið sem líta skal til við styrkveitingar. Þáttur í nýju ferli var að auglýsa eftir umsóknum um styrki til samfélagsverkefna og leitast við að gera ferlið opnara og gegnsærra þannig að öllum gæfist kostur á að koma óskum sínum á framfæri við félagið.
Í kjölfar þessarar vinnu voru síðan birtar auglýsingar um styrki Norðurorku til samfélagsverkefna. Um þetta sagði í frétt á heimasíðu félagsins að þessu tilefni:
„Veittir eru styrkir til menningar- og lista, íþrótta- og æskulýðsstarfs og góðgerðarmála. Markmið með styrkjum Norðurorku hf. er að styðja við sjálfsprottið starf, starfsemi frjálsra félagasamtaka og framtak einstaklinga sem stuðlar að farsælli þróun samfélagsins, lífsgæðum og fjölbreyttu mannlífi.“
Í framhaldi af þessu skipaði framkvæmdaráð Norðurorku hf. vinnuhóp starfsmanna til þess að fara yfir þær rúmlega eitthundrað og fimmtíu umsóknir sem bárust. Vinnuhópurinn skilaði tillögum sínum til stjórnar Norðurorku hf. sem afgreiddi þær óbreyttar á fundi sínum þann 31. maí s.l.
Fram kom hjá hópnum að verkefnið var erfitt enda gífurlega mörg góð verkefni sem sótt var um styrk til. Sýna umsóknirnar þá miklu grósku sem er á öllum sviðum samfélagsins og styrkja okkur í þeirri niðurstöðu að ástæða hafi verið til að opna vinnuferli okkar og gera það gegnsærra.

Eftirtaldir aðilar hljóta styrk að þessu sinni:

Nafn styrkþega verkefnið fjárhæð
Aflið – Samtök gegn kynferðis og heimilisofbeldi á Nl. rekstrarstyrkur 100.000
Leikfélagið Adrenalín leiklist eflir lífsleikni 150.000
Æskulýðssamtök Laufásprestakalls æskulýðsstarf 100.000
Hjólabrettafélag Akureyrar bætt aðstaða 100.000
Hrafnhildur Ósk Birgisdóttir afreksstyrkur – landsliðið á skautum 75.000
Norræna félagið Ólafsfirði norrænar sumarbúðir 200.000
Kvennahandbolti KA og Þór – 8. til 4. flokkur keppnistreyjur kvfl. KA/Þór 400.000
Safnasafnið úrbætur á aðgengi að safninu 200.000
Textílbomban – 19 textíllistamenn samsýning – Listasumar 300.000
Öldrunarheimilin á Akureyri garður og hænsnahús 200.000
Karatefélag Akureyrar félagsstarfið 100.000
Multicultural Council fjölmenning viðburðir o.fl. 100.000
Fimleikafélag Akureyrar æfingabúðir – koma erl. þjálfara 150.000
Gamli barnaskólinn Skógum Fnjóskadal uppbygging safns 100.000
Sundfélagið Óðinn startbúnaður 100.000
Skíðafélag Akureyrar bætt aðstaða við gönguhús 100.000
Lionsklúbburinn Vitaðsgjafi lyftukaup – sundlaugin að Hrafnagili 100.000
Birna Guðrún Baldursdóttir tilr. verkefni klúbbur einhverfa unglinga 75.000
Ungmennafélagið Smárinn – Hörgársveit fótboltamörk við Þelamerkurskóla 250.000
Leikklúbburinn Krafla – Hrísey leiklistarnámskeið fyrir börn 100.000
Sumarbúðir KFUM og KFUK Hólavatni viðbygging við félagsmiðstöð 250.000
Skátafélagið Klakkur námskeið fyrir foringja 100.000
Klakarnir – útivistarklúbbur fatlaðra barna námskeið fyrir þjálfara 150.000
Alberto Porro Carmona tónlistarkennsla – barnabók 100.000
Hafdís Sigurðardóttir afreksstyrkur – frjálsar íþróttir 75.000
Akureyrarkirkja sumaropnun 200.000
Foreldrafélag strengjadeildar Tónlistarskólans félagsstarf – strengjamót í Hörpu 150.000