Alþjóðleg ráðstefna haldin í Ólafsfirði

Hnattræn menntun í dreifbýli er yfirskrift alþjóðlegrar ráðstefnu sem Menntaskólinn á Tröllaskaga heldur í Ólafsfirði í næstu viku. Nýjar aðferðir, hreyfanleiki og aðlögun verða í forgrunni margvíslegrar umfjöllunar um upplýsingatækni í skólastarfi. Þetta er þrettánda ecoMEDIAeurope ráðstefnan. Starfsmenn MTR hafa sótt margar þeirra fyrri og verið áberandi þar. Þess vegna lögðu ecoMEDIAeurope samtökin til að skólinn héldi ráðstefnuna í ár til að starfsmenn annarra skóla gætu fræðst um kennsluaðferðir og skipulag náms í MTR. Leiðtogar, sérfræðingar, kennarar og aðrir starfsmenn frá nokkrum löndum auk Íslands sækja ráðstefnuna sem stendur í fimm daga. Um áttatíu hafa skráð sig til leiks – um helmingur frá öðrum löndum. Meðal annars koma gestir frá Þýskalandi, Sviss, Grikklandi, Lettlandi, Danmörku og Bandaríkjunum. Frá þessu er greint á vef mtr.is.

Gestirnir koma sunnudaginn 14. október með rútu frá Keflavík og hittast á Kaffi Klöru og í Pálshúsi um kvöldið. Ráðstefnan hefst á mánudag með heimsókn um skólana í Fjallabyggð og Háskólann á Akureyri. Um kvöldið verður svo móttaka í Síldarminjasafninu og heldur Gunnar Birgisson bæjarstjóri Fjallabyggðar ræðu fyrir viðstadda. Eftir þann viðburð verður boðið upp á Norðurljósaferð.  Á þriðjudagskvöld verður kvöldvaka á Kveldúlfur Bar á Siglufirði. Á fimmtudagskvöld verður svo veislumatur á Kaffi Rauðku. Á föstdeginum verður svo rútuferð aftur til Keflavíkur.

Nánar um ráðstefnuna hér: https://www.mtr.is/ecomedia