Benedikt Árni Birkisson fæddist 20. júlí á Akureyri og er samkvæmt íbúaskráningu íbúi númer 19.000. Frá þessu er greint á vef Akureyrarbæjar.
Foreldrar drengsins eru Kristjana Árný Árnadóttir og Birkir Rafn Júlíusson. Kristjana er fædd á Akureyri og hefur búið hér alla tíð en Birkir er frá Raufarhöfn. Þau segjast una hag sínum ákaflega vel á Akureyri og vilja hvergi annars staðar búa. Benedikt Árni er að sögn foreldranna ákaflega vær og stækkar hratt og örugglega. Hann var 17,5 merkur og 55 sm þegar hann fæddist.
Akureyrarbær færði fjölskyldunni góðar gjafir; Árskort í Listasafnið á Akureyri og kort í Sundlaug Akureyrar, Sögu Akureyrar í fimm bindum, fallegan blómvönd og silfurskjöld.
