Áforma að loka meðferðarheimilinu Háholt í Skagafirði

Byggðarráð Sveitarfélagsins Skagafjarðar hefur lýst yfir þungum áhyggjum af stöðu meðferðarheimilisins Háholts en uppi eru áform um að loka heimilinu frá og með næsta hausti. Fyrirhugað er að færa starfsemina á höfuðborgarsvæðið og áætlað að veita um 500 milljónum króna í nýbyggingu undir starfsemina.  Meðferðar- og skólaheimilið Háholti tók til starfa í janúar 1999. Heimilið er í Skagafirði u.þ.b. 6 km. frá Varmahlíð og 22 km. frá Sauðárkróki.  Húsið er 386 fm á stærð og tekur 4 börn á aldrinum 15 – 18 ára. Í Háholti starfa alls 17 starfsmenn (12,7 stöðugildi) sem ganga vaktir. Þá er sálfræðingur í hlutastarfi og auk þess sérkennari í hlutastarfi.

Byggðarráð Skagafjarðar telur það vera undarleg vinnubrögð að hálfu ráðuneytis og Barnaverndarstofu að aldrei hefur verið rætt við forsvarsmenn sveitarfélagsins í aðdraganda þessarar ákvörðunar en Sveitarfélagið Skagafjörður er eigandi húsnæðis sem hýsir starfsemi Háholts. Sveitarfélagið byggði húsið sérstaklega undir starfsemina á sínum tíma og fór í miklar endurbætur á húsnæðinu árið 2014 til að aðlaga það betur að starfseminni. Samningur sveitarfélagsins og barnaverndarstofu um húsnæðið undir meðferðarheimilið rennur út í ágúst á næsta ári. Sveitarfélagið er jafnframt tilbúið að þróa áfram þjónustuna í samvinnu við ráðuneytið og Barnaverndarstofu.

Byggðaráð Sveitarfélagsins Skagafjarðar hefur óskð eftir að fá fund með velferðarráðherra til að ræða framtíð meðferðarheimilisins Háholts í Skagafirði.